15 ناۋرىزدا ەلىمىزدە وتەتىن رەسپۋبليكالىق رەفەرەندۋم قارساڭىندا قازاقستاننىڭ بەلسەندى ازاماتتارى تاۋەلسىز باقىلاۋشىلار ۇيىمدارىن قۇرىپ, داۋىس بەرۋ پروتسەسسىن باقىلايتىنىن جاريالادى, دەپ حابارلايدى Egemen.kz.
سونداي باستاماشىل توپتىڭ ءبىرى – «حالىق ءۇنى» تاۋەلسىز باقىلاۋشىلار توبى. بۇگىن الماتىدا ارنايى ءباسپاسوز ءماسليحاتىن وتكىزىپ, باقىلاۋشىلىق ينستيتۋتتىڭ ماڭىزدىلىعى جايلى ايتتى.
قازىر ساياساتتانۋشىلار – نۇربولات نىشانباي, بەكنۇر كيسيكوۆ, نۇرگەلدى ابدىعاني, يسلامبەك داستار باستاعان توپ ەلىمىزدىڭ بىرقاتار وڭىرىندە باقىلاۋشىلاردى دايارلاۋ, وقىتۋ جۇمىستارىن ۇيلەستىرىپ جاتقانىن ايتادى. ولار الداعى رەفەرەندۋمدا «حالىق ءۇنى» باقىلاۋشىلار توبىنىڭ اتىنان داۋىس بەرۋ ۋچاسكەلەرىندە باقىلاۋشىلىق جاساۋعا دايارلانىپ جاتىر.
ء«بىز استانا, الماتى, شىمكەنت, تالدىقورعان, تۇركىستەن سەكىلدى بىرنەشە وڭىردە باقىلاۋشىلاردى وقىتۋ جۇمىسىن جۇرگىزىپ جاتىرمىز. رەفەرەندۋم كۇنى ءبىز ءوزىمىز وقىتىپ, دايارلاعان باقىلاۋشىلاردى ۋچاسكەلەرگە كىرگىزۋگە, رەفەرەندۋم بارىسىن باقىلاۋعا نيەتتىمىز. ءبىزدىڭ بۇل ىستە تاجىربيەمىز دە جەتكىلىكتى. وسىعان دەيىن ەلىمىزدە وتكەن سايلاۋلار مەن رەفەرەندۋمداردا باقىلاۋشىلىق جاساپ, باقىلاۋشىلاردى وقىتۋ جۇمىستارىن جاساعانبىز. بۇگىندە ءبىزدىڭ قاتارىمىزدا قازاقستانعا تاۋەلسىز باقىلاۋشىلىق ينستيتۋتىن العاش اكەلگەندەردىڭ ءبىرى, ساقا ساياساتكەر دوس كوشىم, بەكنۇر كيسيكوۆ باستاعان اعالارىمىز بار. شىن مانىندە, تاۋەلسىز باقىلاۋشىلاردىڭ بولۋى – قوعامدىق جاۋاپكەرشىلىك. ويتكەنى, تاۋەلسىز باقىلاۋشى دەگەنىڭىز – قوعامنىڭ ءاربىر سەرگەك سانالى ازاماتى دەگەن ءسوز. ءسىز دە, ءسىزدىڭ اينالاڭىزداعى بەلسەندى ازاماتتار دا باقىلاۋشىلىق جاساي الادى. ول ءۇشىن ءبىز سەكىلدى باستاماشىل توپتاردىڭ قاتارىنا قوسىلۋ كەرەك. ەلمەن بىرگە, ەلدىڭ مۇددەسىن قورعاۋ ءاربىرىمىزدىڭ پارىزىمىز», دەيدى «حالىق ءۇنى» باقىلاۋشىلار توبىن قۇرۋعا باستاماشى بولعان ساياساتتانۋشى نۇربولات نىشانباي.
ال بەلگىلى پۋبليتسيست, ساياساتتانۋشى بەكنۇر كيسيكوۆ:
«كەز كەلگەن ساياسي پروتسەسس – تاۋەلسىز باقىلاۋشىلارسىز ءادىل وتپەيدى. سوڭعى جىلدارى ەلىمىزدە تاۋەلسىز باقىلاۋشىلار مەن توپتار كوپتەپ قۇرىلۋدا جانە بۇل جاقسى ءۇردىس. بۇل قوعامنىڭ ساياسي بەلسەندىلىگى ارتىپ كەلە جاتقانىن كورسەتەدى. ءبىز قازىر «حالىق ءۇنى» اتىنان باقىلاۋشىلاردى وقىتىپ جاتىرمىز. بۇل قىز-جىگىتتەر ەرتەڭ ۋچاسكەلەردە باقىلاۋشىلىق جاسايتىن بولادى. بىزدەن كوبىنە «باقىلاۋشىلارعا نە بەرە الاسىڭدار؟» دەپ سۇرايدى. ءبىز باقىلاۋشىلارعا اقشا نەمەسە ماتەريالدىق يگىلىكتەر بەرە المايمىز. بىراق, ءبىز باقىلاۋشىلار ءوز تاجىربيەمىزدى ۇيرەتۋدەمىز, بىلگەنىمىزدى ايتىپ, بىلىمىمىزبەن بولىسۋدەمىز. ونىڭ ۇستىنە, باقىلاۋشىلاردىڭ وزدەرى دە بۇل ىستە ماتەريالدىق يگىلىك جوق ەكەنىن جاقسى بىلەدى. تاۋەلسىز باقىلاۋشىمىز دەپ جۇرگەن ازاماتتاردىڭ بارلىعى, ءتىپتى مەيلى ءبىزدىڭ ۇيىم نەمەسە باسقالار بولسىن, ءادىل, تازا سايلاۋ ۇستانىمى ءۇشىن جۇرگەن ازاماتتار», دەيدى.
جۋرناليست يسلامبەك داستان:
ء«بىز «حالىق ءۇنى» باقىلاۋشىلار توبى اتىنان تاراز قالاسىندا باقىلاۋشىلاردى وقىتىپ, دايارلاپ جاتىرمىز. الداعى رەفەرەندۋمدا ءبىزدىڭ باقىلاۋشىلارىمىز ءوز مىندەتتەرىن مۇلتىكسىز اتقارىپ, رەفەرەندۋمنىڭ تازا وتۋىنە ۇلەس قوساتىن بولادى. جالپى تاۋەلسىز باقىلاۋشىلاردىڭ بولۋىنىڭ ءوزى ءاربىر ۋچاسكەگە سالماق بولادى. تاۋەلسىز باقىلاۋشىلار وتىرعان ۋچاسكەلەر مەن باقىلاۋشىلار وتىرماعان ۋچاسكەلەردەگى قورىتىندى ناتيجەلەردىڭ ءوزى-اق, كوپ دۇنيەدەن حابار بەرەدى», دەيدى.
ونەر مايتالماندارى رەفەرەندۋم تۋرالى پىكىرلەرىن ءبىلدىردى
ال حالىقارالىق ساراپشى نۇرگەلدى ابدىعاني ۇلى:
ء«بىزدىڭ بۇعان دەيىنگى جيناعان تاجىربيەلەرىمىزگە سۇيەنىپ, مىنانى ايتا الامىز: تاۋەلسىز باقىلاۋشىلار – كەز كەلگەن ەلەكتورالدى ناۋقاندا داۋىس بەرۋدىڭ ءادىل, تازا وتۋىنە بىردەن-ءبىر مۇددەلى توپ. سوڭعى جىلدارى ەلىمىزدە ونداعان تاۋەلسىز باقىلاۋشى ۇيىمدارى قۇرىلىپ جاتىر. بۇل قۋاندادى. تاۋەلسىز باقىلاۋشى توپتاردىڭ قاراسى كوبەيگەن سايىن, قوعامدا سەنىم دە پايدا بولادى. داۋىس بەرۋ پروتسەسستەرى دە جۇيەلەنە تۇسەدى. اشىقتىق پەن تازالىققا ءبىرتابان جاقىنداي تۇسەمىز. بۇگىندە ءبىزدىڭ قاتارىمىزدا جاستار كوپ. جاستاردىڭ ەل ىشىندەگى بولىپ جاتقان ساياسي ناۋقانعا بەي-جاي قاراماۋى – ەكى ەسە جاقسى تەندەنتسيا. ويتكەنى, وزگەرىستى قالايتىن دا, جاسايتىن دا جاستار», دەيدى.
رەفەرەندۋم-2026: سايلاۋ ۋچاسكەسىن eGov Mobile ارقىلى تەكسەرۋگە بولادى