ەلىمىزدە كونستيتۋتسيالىق رەفورمالاردى كوپشىلىككە ءتۇسىندىرۋ جۇمىستارى قارقىن الدى. سونىڭ ءبىرى «قازاتومونەركاسىپ» ۇاك» اق باس كەڭسەسىندە ءوتتى. جاڭا اتا زاڭ جوباسى تالقىلانعان كەزدەسۋدە ۇسىنىلىپ وتىرعان وزگەرىستەردىڭ ءمان-ماڭىزى مەن مەملەكەت دامۋىنا ىقپالى ايتىلدى.
كومپانيا قىزمەتكەرلەرى, ەنشىلەس جانە تاۋەلدى كومپانيا باسشىلارى قاتىسقان ءىس-شارادا سەنات دەپۋتاتى بيبىگۇل جەكسەنباي, ءماجىلىس دەپۋتاتى, كونستيتۋتسيالىق كوميسسيا مۇشەسى مۇرات ابەنوۆ, «قازاق گازەتتەرى» سەرىكتەستىگىنىڭ باس ديرەكتورى, كونستيتۋتسيالىق رەفورما جونىندەگى كوميسسيا مۇشەسى ديحان قامزابەك ۇلى كونستيتۋتسيالىق وزگەرىستەردىڭ نەگىزگى باعىتتارىن ءتۇسىندىردى. ولار ۇسىنىلىپ وتىرعان وزگەرىستەردىڭ مەملەكەت باسقارۋ جۇيەسىن جەتىلدىرۋگە, دەموكراتيالىق ينستيتۋتتاردى نىعايتۋ مەن ازاماتتاردىڭ قۇقىقتارى مەن بوستاندىقتارىن قورعاۋ تەتىكتەرىن كۇشەيتۋگە باعىتتالعانىن ايتتى. جاڭا كونستيتۋتسيا جوباسى ەلدىڭ ساياسي جۇيەسىن جاڭعىرتىپ, قوعامدىق قاتىناستاردى ودان ءارى دامىتۋعا جول اشادى. قۇجات قابىلدانعان جاعدايدا ەلىمىزدىڭ قۇقىقتىق مەملەكەت رەتىندە دامۋىنا جاڭا سەرپىن بەرىپ, قوعامداعى تۇراقتىلىق پەن بىرلىكتى نىعايتۋعا ىقپال ەتەدى.
كومپانيا باسشىسى دا كونستيتۋتسيا جوباسىن ازىرلەۋ بارىسىندا قوعام پىكىرى ەسكەرىلگەنىن, كەڭ اۋقىمدى ساراپتامالىق تالقىلاۋلار جۇرگىزىلگەنىن اتاپ ءوتتى. ءتۇرلى سالا ماماندارى, زاڭگەرلەر مەن قوعام بەلسەندىلەرى اتسالىسىپ, ازاماتتاردان تۇسكەن ۇسىنىستار دا نازارعا الىنعان.
«بۇگىندە ەلىمىز ماڭىزدى تاريحي كەزەڭنىڭ الدىندا تۇر. كونستيتۋتسيالىق رەفورما زاڭ ۇستەمدىگىن نىعايتىپ, بيلىك تارماقتارىنىڭ تەڭگەرىمىن قامتاماسىز ەتۋگە جانە ازاماتتاردىڭ قۇقىقتارى مەن بوستاندىقتارىن قورعاۋ كەپىلدىكتەرىن كۇشەيتۋگە باعىتتالعان», دەدى «قازاتومونەركاسىپ» ۇاك» اق باسقارما توراعاسى مەيىرجان يۋسۋپوۆ.
كەزدەسۋ سوڭىندا كونستيتۋتسيالىق كوميسسيا مۇشەلەرى قاتىسۋشىلاردى 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسۋعا شاقىرىپ, بۇل ساياسي وقيعا ەلدىڭ بولاشاعىن ايقىندايتىن تاريحي قادامداردىڭ ءبىرى ەكەنىن ايتتى.