شەتەلدە سۇرانىسقا يە وتاندىق باستامالار

قۇرىش قالانىڭ «اقىلدى» قوندىرعىلارى

قۇرىش قالا بۇگىندە ءوندىرىستىڭ جاڭا تىنىسىن اشتى. سونىڭ ايقىن مىسالى – زاماناۋي تەحنولوگيالىق تارتىپكە نەگىزدەلگەن «قازپروماليۋميني» جشس. ءداستۇرلى مەتاللۋرگيانىڭ قاعيدالا­رىن ساقتاي وتىرىپ, تسيفرلىق شەشىمدەردى وندىرىسىنە باتىل ەنگىزگەن كاسىپورىن ءوڭىردىڭ يندۋستريالىق كەلبەتىن قالىپتاستىرادى.

زاۋىتتاعى ءوندىرىس ديامەترى 127 ميلليمەترلىك اليۋميني بيلەتتەردەن باستالادى. تسيليندر ءپىشىندى مەتالل قۇيماسى الدىمەن رەۆولۆەرلىك پەشتە 460–480°C-قا دەيىن قىزدىرىلا­دى. بۇل – مەتالدى بالقىتۋ ەمەس, ونى قالىپ ارقىلى وتكىزۋگە يكەمدەۋ. باس ين­جەنەر يۆان پولوۆينكيننىڭ ايتۋىن­شا, ۇدەرىستى قاراپايىم ەت تارتقىش قاعيداسىمەن تۇسىندىرۋگە بولادى: جوعارى قىسىممەن قوزعالعان شتوك مەتالدى ارنايى ماتريتسا ارقىلى يتەرىپ شىعارادى. قانداي قالىپ ورناتىلسا, ءدال سونداي پروفيل الىنادى.

پرەستەن شىققان ساتتە تەمپەراتۋراسى 500 گرادۋستان اساتىن پروفيلدەر 24 مەترگە دەيىن سوزىلادى. كەيىن مەتالل ىشكى كەرنەۋدەن ارىلىپ, گەومەتريالىق دالدىگى قالپىنا كەلتىرىلەدى. ايىنا 350 تونناعا دەيىن دايىن ءونىم شىعارا­تىن زاۋىتتا 6060 جانە 6063 ماركالى قورىتپالار پايدالانىلادى. بۇل قوسپالار توتتانۋعا توزىمدىلىگىمەن ءارى بەرىكتىگىمەن ەرەكشەلەنەدى.

كاسىپورىن ونىمدەرى قۇرىلىس يندۋس­ترياسىندا كەڭ سۇرانىسقا يە. عيمارات قاسبەتتەرى, كوشە جارىقتاندىرۋ جۇيە­لەرى, ينتەرەرلىك ارلەۋ ەلەمەنتتەرى – ءبارى دە تەمىرتاۋدان جونەلتىلەدى. استا­ناداعى بىرقاتار نىساننىڭ كونس­ترۋك­تيۆتىك ەلەمەنتتەرى وسى زاۋىتتا دايىندالعان. قازىر جەرگىلىكتى قامتۋ ۇلەسى 61 پايىزدى قۇرايدى. زاۋىت ديرەك­تورى ولجاس جامبىل الداعى ۋا­قىت­تا ءوندىرىس كولەمىن ۇلعايتىپ, وڭىر­لىك ۇلەستى ارتتىرۋدى ماقسات ەتىپ وتىر.

تسيفرلاندىرۋ زاۋىتتا تەك تەح­نولوگيالىق ۇدەرىستەردى وڭتايلان­دىرۋمەن شەكتەلمەيدى. مۇندا جاساندى ينتەللەكت وندىرىستىك قاۋىپسىزدىكتىڭ نە­گىزگى قۇرالىنا اينالعان. ەكسترۋ­زيا ۇدە­رىسى جوعارى قىسىممەن جۇرەتىندىكتەن قاۋىپ­سىزدىك ماسەلەسى ءبىرىنشى كەزەكتە. وسى­عان بايلانىستى كاسىپورىندا Compu­ter Vision جۇيەسى ەنگىزىلىپ جاتىر. جۇيە جۇ­مىسشىنىڭ كاسكاسى, قورعانىس قولعابى مەن ارنايى كيىمىنىڭ بار-جوعىن اۆتوماتتى تۇردە انىقتايدى. قاۋىپتى ايماققا رۇقساتسىز جاقىنداۋ تىركەلسە, دىبىستىق بەلگى بەرىلىپ, ءوندىرىس جەلىسى توقتايدى.

الداعى كەزەڭدە پرەديكتيۆتى تالداۋ جۇيەسىن ىسكە قوسۋ جوسپارلانىپ وتىر. بۇل جابدىقتىڭ توزۋىن بولجاپ, اقاۋدىڭ الدىن الۋعا مۇمكىندىك بەرەدى. سونىڭ ناتيجەسىندە ءوندىرىستىڭ توقتاپ قالۋ تاۋەكەلى ازايىپ, تيىمدىلىك ارتادى.

وسىلايشا, تەمىرتاۋداعى بۇل زاۋىت ءداستۇرلى مەتاللۋرگيا مەن وزىق تەحنولوگيانىڭ ۇيلەسىمىن كورسەتەدى. قۇرىش قالانىڭ جاڭا يندۋستريا­لىق بەت-بەينەسى – ءدال وسىنداي جاڭاشىل وندىرىستەر ارقىلى قالىپتاسىپ كەلەدى. 

ونەركاسىپتىڭ «جەدەل جاردەمى»

وڭىردەگى «ترانزيت» كومپانيا­سىنىڭ نەگىزىندە قۇرىلعان «Teleport 3D» بۇگىندە وتاندىق ءوندىرىس ورىندارى ءۇشىن شىن مانىندەگى ونەركاسىپتىڭ «جەدەل جاردەمىنە» اينالدى. سەبەبى ءىرى زاۋىتتاردا قىمبات قوندىرعىنىڭ ءبىر عانا بولشەگى ىستەن شىقسا, تۇتاس جەلى توقتاپ, كاسىپورىن وراسان شىعىنعا ۇشىرايدى. بۇرىن مۇنداي جاعدايدا شەتەلدەن قوسالقى بولشەكتى ايلاپ كۇتەتىن. ال قازىر دانيل روششۋپكين جەتەكشىلىك ەتەتىن ينجەنەرلەر توبى جاساندى ينتەللەكت پەن ءادديتيۆتى تەحنولوگيالاردى ۇشتاستىرىپ, ماسەلەنى ساناۋلى كۇننىڭ ىشىندە شەشىپ بەرەدى.

كومپانيانىڭ باستى ارتىقشىلىعى – جەكە ءبىر بولشەكتى باسىپ شىعارۋ ەمەس, تولىق ينجەنەرلىك تسيكلدى يگەرۋىندە. تاپسىرىستى قابىلداۋدان باستاپ, ەسەپتەۋ, تسيفرلىق مودەلدەۋ جانە وندىرىسكە ەنگىزۋگە دەيىنگى ۇدەرىس ءبىر ورتالىقتا جۇزەگە اسادى. بۇل رەتتە جاساندى ينتەللەكت ينجەنەردىڭ سەنىمدى سەرىگىنە اينالعان.

كاسىپورىن ازىرلەگەن ارنايى جي-اگەنت دەتالعا تۇسەتىن جۇكتەمەنى, تەم­پەرا­تۋ­رالىق رەجىمدى جانە جۇمىس ورتاسىن بىرنەشە سەكۋندتا ساراپتايدى. ەڭ ماڭىزدىسى – جۇيە ينتەرنەتتەگى جالپىلاما دەرەكتەرگە ەمەس, كومپانيانىڭ ىشكى بازاسىنداعى قاتاڭ مەملەكەتتىك ستاندارتتارعا سۇيەنەدى. سونىڭ ناتيجە­سىندە ەسەپتەۋ دالدىگى 99 پايىزعا دەيىن جەتىپ, تاپسىرىستى وڭدەۋ مەرزىمى ءۇش ەسە قىسقارعان.

تسەح جۇمىسى كەرى جوبالاۋ تەحنولوگياسىنا نەگىزدەلگەن. ياعني بۇزىلعان بولشەك جوعارى دالدىكتەگى سكانەر ارقىلى زەرتتەلىپ, ونىڭ تسيفرلىق نۇسقاسى جاسالادى. ينجەنەرلەر ءالسىز تۇستارىن جەتىلدىرىپ, جاڭارتىلعان ۇلگىنى وندىرىسكە ەنگىزەدى. مۇندا ستاندارتتى پوليمەرلەرمەن قاتار, اۆياتسيا مەن عارىش سالاسىندا قولدانىلاتىن كاربون جانە شىنى تالشىقتى كومپو­زيتسيالىق ماتەريالدار پايدالانىلادى. گەومەتريالىق دالدىگى جوعارى مۇنداي بولشەكتەر كۇردەلى كونۆەيەرلەر مەن سورعى ستانسالارىنداعى مەتالل تەتىكتەردى الماستىرا الادى.

كومپانيانىڭ قىزمەت اۋقىمى دا كەڭ. مۇناي-گاز جانە تاۋ-كەن سالاسىنا ارنالعان ءىرى مەحانيزمدەردەن باس­تاپ, تۇرمىستىق ەتتارتقىشتىڭ ءتىستى بۇرانداسىنا دەيىن ازىرلەيدى. BMW اۆتوكولىكتەرىنىڭ شام كورپۋستارى مەن Halyk Bank بانكوماتتارىنا قاجەتتى ارنايى قوندىرمالار دا وسىندا جاسالادى. بۇگىندە كاسىپورىن ەلىمىز بويىنشا 5 مىڭنان استام سەرىكتەسپەن جۇمىس ىستەيدى, ال تسيفرلىق پلاتفورمانى الەمدەگى 96 ەلدىڭ پايدالانۋشىلارى قولدانادى. اسىرەسە امەريكالىق پايدالانۋشىلار كوپ. ولار قولدانۋشىلار سانى جاعىنان ءتورتىنشى ورىنعا شىعۋى – وتاندىق ءونىمنىڭ جاھاندىق باسەكەگە قابىلەتتىلىگىن ايعاقتايدى.

ءادديتيۆتى تەحنولوگيالاردىڭ الەۋ­مەتتىك ماڭىزى دا ايقىن. كومپا­نيا وتكەن جىلى جاق سۇيەگىنە جاسال­عان كۇردەلى وپەراتسياعا قولداۋ كورسە­­تىپ, كومپيۋتەرلىك توموگرافيا دەرەك­­تەرى نە­گىزىندە جوعارى دالدىكتەگى حيرۋر­­­گيا­لىق شابلون دايىنداعان. بۇل دارى­گەرلەرگە وپەراتسيا بارىسىن ناق­تى جوس­پار­لاۋعا مۇمكىندىك بەردى. سون­داي-اق مە­دي­تسينا ستۋدەنتتەرىنە ارنالعان ادام ميى­نىڭ بولشەكتەلگەن ماكەتتەرى ازىرلەنگەن.

پروتەز پايدالاناتىن جاندار ءۇشىن 3D-سكانەرلەۋ ارقىلى ساۋ اياقتىڭ ءپىشىنىن قايتالايتىن ەستەتيكالىق قاپتامالار دايىندالادى. بۇل تەمىر وزەك­تى جاسىرىپ قانا قويماي, تابيعي كورىنىس بەرەدى. تاپسىرىس بەرۋشىنىڭ قالاۋىنا قاراي ءتۇرلى ءتۇستى ورنەكتى نۇسقالار ۇسىنىلادى.

بار-جوعى 11 ينجەنەردەن قۇرالعان ۇجىم قاراعاندىدان باستاپ, الەمدىك نارىققا جول تارتتى. حالىقارالىق ISO 9001 سەرتيفيكاتىن يەلەنىپ, گەر­ما­نيانىڭ DDT كومپانياسىنىڭ رەسمي ديلەرى اتانعان كاسىپورىن ونىمدەرىنىڭ ەل ىشىندەگى قامتۋ ۇلەسى 80 پايىزعا جەتىپ وتىر.

قىسقاسى, ەكى باعىت, ءبىر مۇددە: ءبىرى – تسيفرلىق ينجەنەريا ارقىلى ءوندىرىستىڭ ۇزدىكسىزدىگىن قامتاماسىز ەتسە, ەكىنشىسى – ءداستۇرلى مەتاللۋرگيانى ينتەللەك­تۋالدى باسقارۋ جۇيەسىمەن تولىقتىرىپ وتىر. وسىنداي جوبالار وتاندىق يندۋستريانى جاڭا ساپالىق دەڭگەيگە كوتەرەدى.

قاراعاندى وبلىسى