دروندار الماتى پوليتسياسىنا قالاي كومەكتەسەدى؟

الماتى قالاسى پوليتسيا دەپارتامەنتى قۇقىق بۇزۋشىلىقتاردىڭ الدىن الۋ جۇيەسىنە تسيفرلىق تەحنولوگيالاردى كەزەڭ-كەزەڭىمەن ەنگىزىپ كەلەدى. سونىڭ ءبىرى – ۇشقىشسىز ۇشۋ اپپاراتتارىن كەڭىنەن پايدالانۋ.

الماتى كوللەدجىندە دروندار ورتالىعى اشىلدى

تسيفرلىق باقىلاۋ – جەدەل ەسكەرتۋ

ارنايى جارىق دابىل ەلەمەنتتەرىمەن جانە داۋىس زورايتقىش قۇرىلعىلارمەن جابدىقتالعان دروندار قوعامدىق كەڭىستىكتەردى, جاياۋ جۇرگىنشىلەر ايماقتارىن, اۋلالاردى جانە ادام كوپ شوعىرلاناتىن ورىنداردى پاترۋلدەيدى. قوقىس تاستاۋ, قوعامدىق ورىندا تۇكىرۋ, ۇساق بۇزاقىلىق جاساۋ, جولدى بەلگىلەنبەگەن جەردەن كەسىپ ءوتۋ سەكىلدى اكىمشىلىك قۇقىق بۇزۋشىلىقتار انىقتالعان ساتتە ازاماتتارعا بىردەن داۋىستىق ەسكەرتۋ جاسالادى.

دروندار پوليتسەيلەرگە كومەككە كەلدى

باستى مىندەت – الدىن الۋ

پوليتسيا مالىمەتىنشە, جاڭا ءتاسىلدىڭ تۇپكى ماقساتى – جازالاۋ ەمەس, ءتارتىپ بۇزۋدىڭ الدىن الۋ.

اكىمشىلىك پوليتسيا باسقارماسىنىڭ باستىعى سەرىك شۋماەۆتىڭ ايتۋىنشا, دروندار قۇقىق بۇزۋشىلىقتارعا جەدەل ارەكەت ەتۋگە جانە ازاماتتارعا ءتارتىپ ەرەجەلەرىن سول مەزەتتە ەسكە سالۋعا مۇمكىندىك بەرەدى.

ء«بىزدىڭ مىندەتىمىز – قۇقىق بۇزۋشىلىقتاردى تىركەۋ عانا ەمەس, ەڭ الدىمەن ولاردىڭ الدىن الۋ. داۋىس زورايتقىشپەن جابدىقتالعان دروندار قوعامدىق ءتارتىپ مادەنيەتىن قالىپتاستىرۋعا ىقپال ەتەتىن زاماناۋي پروفيلاكتيكالىق قۇرال», دەدى ول.

ۇشقىشسىز اپپاراتتاردى پايدالانۋ قولجەتىمدىلىگى شەكتەۋلى اۋماقتاردى دا باقىلاۋعا مۇمكىندىك بەرەدى. قوسىمشا ناريادتار سانىن ارتتىرماي-اق, قوعامدىق ورىندارداعى باقىلاۋ كۇشەيتىلەدى. بۇل – رەسۋرستى ءتيىمدى پايدالانىپ, قاۋىپسىزدىكتى ارتتىرۋدىڭ ءبىر جولى.

پوليتسيا وكىلدەرى جوبانىڭ باستى ماقساتى – قوعامدىق ورىنداردا اكىمشىلىك قۇقىق بۇزۋشىلىقتار سانىن ازايتۋ, قورشاعان ورتاعا جانە وزگەگە قۇرمەتپەن قاراۋ مادەنيەتىن ورنىقتىرۋ ەكەنىن اتاپ ءوتتى.

قالا اسپانىندا قالىقتاعان دروندار ەندى تەك باقىلاۋشى ەمەس, تارتىپكە شاقىراتىن ۇنگە اينالدى.

كولىك اپاتىن ازايتاتىن دروندار