2025 جىل قورىتىندىسى بويىنشا قازاقستان تاريحىندا العاش رەت بالمۇزداق ەكسپورتى يمپورتتان استى. ناقتى ايتقاندا, يمپورت كولەمى – 12 194 توننا بولسا, ەكسپورت كولەمى 14 167 تونناعا جەتكەن, دەپ جازادى Egemen.kz.
اۋىل شارۋاشىلىعى مينيسترلىگىنىڭ مالىمەتىنشە, مۇنداي تابىستىڭ كىلتى زاماناۋي وندىرىستىك قۋاتتى قۇرۋعا جاسالعان ءىرى ينۆەستيتسيالار, وزىق تەحنولوگيالار, سونداي-اق وتاندىق وندىرۋشىلەرگە جۇيەلى مەملەكەتتىك قولداۋدىڭ ناتيجەسى.
ەكسپورتتىق ءتۇسىمنىڭ ءوسۋى جانە ورتاشا ەكسپورتتىق باعانىڭ كوتەرىلۋى باعا باسەكەلەستىگىنەن ساپا مەن برەند دەڭگەيىنە ءوتىپ جاتقانىن كورسەتەدى.
تۇيە سۇتىنەن – بالمۇزداق پەن يوگۋرت
«شين-لاين» كومپانياسىنىڭ ۆيتسە-پرەزيدەنتى وماربەك جۇلدىزدىڭ ايتۋىنشا, بۇل ناتيجە ۇزاق مەرزىمدى جاڭعىرتۋ جانە ەكسپورتتى ۇلعايتۋ ستراتەگياسىنىڭ جەمىسى.
«2005 جىلى قازاقستان تەك 12 توننا بالمۇزداق ەكسپورتتاپ, يمپورت كولەمى 12 مىڭ توننانى قۇراعان ەدى. بۇگىندە جاعداي تۇبەگەيلى وزگەردى. جەتكىزىلىمدەر گەوگرافياسى 10 ەلگە دەيىن كەڭەيىپ, ەكسپورت العاش رەت يمپورتتان استى. بۇل قازاقستان ونىمدەرىنىڭ باسەكەگە قابىلەتتىلىگىن جانە سالانىڭ جەتىلگەنىن كورسەتەدى», دەدى ول.
شۇباتتان جاسالعان بالمۇزداق نارىققا شىقتى