قىزىلوردا وبلىستىق تاريحي-ولكەتانۋ مۋزەيىندە «تاريحتا تاڭبالانعان اۋليەاتا تۇلعالارى» اتتى كورمە اشىلدى. جامبىل وبلىستىق تاريحي-ولكەتانۋ مۋزەيىنىڭ 95 جىلدىعى كونە تارازدان تۇلەگەن تۇلعالار مەرەيتويىنا وراي ۇيىمداستىرىلعان كورمە «مۋزەي tour: ەكسپوناتتار ەكسپەديتسياسى» مۋزەيلىك جوباسى اياسىندا ۇيىمداستىرىلىپ وتىر.
ەكسپوزيتسيادا اۋليەاتا توپىراعىندا تۋىپ, مەملەكەت تاريحى مەن ۇلت رۋحانياتىندا وشپەس ءىز قالدىرعان قايراتكەرلەردىڭ جەكە زاتتارى, سيرەك فوتوسۋرەتتەرى, كىتاپتارى مەن قولجازبالارى بار. كەڭ زالعا كىرگەننەن ايگىلى باۋىرجان مومىش ۇلىنا, جەلتوقسان قاھارمانى قايرات رىسقۇلبەكوۆكە ارنالعان بۇرىشتار, سولار تۇتىنعان زاتتار كوزگە تۇسەدى. باۋىرجان باتىرعا ارنالعان مۇيىستە تەك جۋالى اۋدانىنىڭ وزىنەن اسكەر, اۆياتسيا, ىشكى ىستەر سالاسىندا قىزمەت ەتكەن 13 گەنەرال شىققانى تۋرالى دەرەك جاريالانىپتى.
قۇندى جادىگەرلەر قاتارىندا قازاق تەاترىنىڭ ساحناسى مەن كينوونەرىندە وشپەستەي ءىز قالدىرعان ءاسانالى ءاشىموۆتىڭ جەكە زاتتارى دا بار. ايگىلى اكتەردىڭ «قىز جىبەك» فيلمىندە كيگەن ساۋىتى مەن دۋلىعاسى, ۇستاعان قىلىشى كورمەگە كەلگەندەردىڭ قىزىعۋشىلىعىن تۋدىرىپ تۇر. تەاتردا قويىلعان سپەكتالدەگى ءار ءرول تۋرالى جازىلعان بىرنەشە قويىن داپتەر ونەر ساڭلاعىنىڭ كورەرمەن الدىنداعى جاۋاپكەرشىلىكتى تەرەڭ سەزىنگەندىگىن اڭعارتادى.
ىقىلاس دۇكەن ۇلىنىڭ قوبىزى مەن ايگىلى حالىق اقىنى كەنەننىڭ دومبىراسى مەن شاپانى, ەكى مارتە سوتسيايستىك ەڭبەك ەرى جازىلبەك قۋانىشباەۆتىڭ قامشىسى قويىلعان بۇرىشقا دا ايالداۋشىلار قاتارى از ەمەس. بۇل كورمە از كۇننەن كەيىن شيەلى, جاڭاقورعان اۋداندارىنداعى رۋحانيات ورتالىقتارىنا جول تارتادى.
«الدا تالدىقورعانداعى ءىلياس جانسۇگىروۆ, نۇرمولدا الدابەرگەنوۆ مۋزەيلەرىن كۇتىپ وتىرمىز. جالپى, «مۋزەي tour: ەكسپوناتتار ەكسپەديتسياسى» اياسىندا بيىل وبلىستا باتىس قازاقستان, ۇلىتاۋ, تۇركىستان وبلىستارى مەن شىمكەنت قالالىق مۋزەيلەر بىرلەستىگى, ورداباسىداعى «قاجىمۇقان اتىنداعى وبلىستىق سپورت مۋزەيى» كورمەلەرى ۇيىمداستىرىلادى», دەيدى وبلىستىق تاريحي-ولكەتانۋ مۋزەيىنىڭ ەكسكۋرسيالىق-كوپشىلىك ءبولىمى مەڭگەرۋشىسى ەلزيرا ساعيتجانوۆا.
قىزىلوردا