يتاليانىڭ ليۆينو تاۋ شاڭعى كۋرورتىندا XXV قىسقى وليمپيادا ويىندارىنىڭ فريستايل-اكروباتيكادان ايەلدەر اراسىنداعى ىرىكتەۋ كەزەڭى مارەسىنە جەتتى. وسى سىندا ەل اتىنان جارىس جولىنا شىققان ايانا جولداس ىرىكتەۋ كەزەڭىندە ءسۇرىندى, دەپ جازادى Egemen.kz.
قىسقى ازيا ويىندارىنىڭ بىرنەشە دۇركىن جۇلدەگەرى ايانا جولداس 2 ىرىكتەۋ كەزەڭىندەگى جوعارى ۇپايى – 61.11 بالل بولدى. بۇل ناتيجە فينالدا باق سىناۋعا مۇمكىندىك بەرەتىن ۇزدىك ون ەكىلىكتىڭ قاتارىنا ەنۋگە جەتكىلىكسىز بولدى.
وسىلايشا, 24 جاستاعى ۇلتتىق قۇراما سپورتشىسى ەكىنشى وليمپياداسىن 21-ورىنمەن اياقتادى. ول 2018 جىلى پحيونچحان ويىندارىندا 24-ساتىدان كورىنگەن بولاتىن.
قىسقى وليمپيادا: بۇگىن وتانداستارىمىز قاي سپورت تۇرلەرى بويىنشا باق سىنايدى؟
ايتا كەتەيىك, فينالعا العاشقى ىرىكتەۋدە ۇزدىك شىققان – 6 فريستايلشى, ەكىنشى كەزەڭدە كوپ ۇپاي جيناعان تاعى 6 فريستايل شەبەرى جولداما الدى. فينالدىق باسەكە بۇگىن استانا ۋاقىتىمەن ساعات 17:00-دە باستالادى. بۇل ىرىكتەۋدەن وتكەن 12 سپورتشىنىڭ التاۋى ۇلكەن فينالعا شىعادى. ەرلەر اراسىنداعى كۆاليفيكاتسيا ەرتەڭگە جوسپارلانعان.
بۇگىن شاڭعى جارىسىنىڭ سپرينت تۇرىندە باق سىناعان ايەلدەر قۇراماسى دا فينالدىق ويىنداردان تىس قالدى.
كەشەگى جارىس كۇنىندە سوفيا سامودەلكينا قىسقا باعدارلامادا ونەر كورسەتىپ, 68,47 ۇپايمەن جەكە رەكوردىن جاڭارتتى.
ال قىسقى وليمپيادادا قازاقستان قورجىنىندا 1 التىن مەدال بار. تاريحي جەڭىستى مانەرلەپ سىرعاناۋشى ميحايل شايدوروۆ سىيلادى.