كەشە وسكەمەندە ء«بىز جاڭا حالىقتىق كونستيتۋتسيا ءۇشىن» رەسپۋبليكالىق جاستار فورۋمى ءوتتى. 17 وبلىستىڭ جاستارى وسكەمەندە تىزە قوسىپ, جاڭا باستامالار مەن ەرتەڭگى كۇننىڭ جوسپارىن تالقىلادى, پىكىر الماستى.
جاستار جينالعان الاڭدا جاڭاشا وي قوزعالىپ, سالماقتى ۇسىنىستار ايتىلدى. جيىندا ءسوز العان وبلىس اكىمى نۇرىمبەت ساقتاعانوۆ ەل ەرتەڭى جاستاردىڭ قولىندا ەكەنىن اتاپ ءوتتى.
«بۇگىنگى كەزدەسۋ تاريحي كەزەڭدە ءوتىپ وتىر. مەملەكەت باسشىسى 2026 جىلى 15 ناۋرىزدا رەسپۋبليكالىق رەفەرەندۋم وتكىزۋ تۋرالى جارلىققا قول قويدى. وسى باعىتتا 130 ادامنان تۇراتىن كاسىبي كونستيتۋتسيالىق كوميسسيا اشىق ءارى جاريا فورماتتا جۇمىس ىستەدى. بىرلىك پەن ىنتىماق – مەملەكەتتىك ساياساتتىڭ باستى باعىتى. قازىرگى تاڭدا ونىڭ وزەكتىلىگى ودان ءارى ارتا تۇسەدى. پرەزيدەنت اتاپ وتكەن «بىرلىگىمىز – ارالۋاندىقتا» قاعيداسى – وزگەرمەيتىن قۇندىلىق», دەدى ءوڭىر باسشىسى ن.ساقتاعانوۆ.
«اسسامبلەيا جاستارى» رەسپۋبليكالىق قوعامدىق بىرلەستىگىنىڭ توراعاسى تيمۋر جۇمىرباەۆ رەسپۋبليكالىق يگى باستامالاردىڭ باسىم بولىگى شىعىستان باستاۋ الاتىنىن اتاپ ءوتتى.
«ەلىمىز قازىرگى ۋاقىتتا ۇلكەن قوعامدىق-ساياسي ماڭىزدى وقيعانىڭ الدىندا تۇر. بۇل رەتتە رەسپۋبليكا جاستارىنا دا ماڭىزدى جاۋاپكەرشىلىك جۇكتەلىپ جاتىر. جاڭا كونستيتۋتسيا ەلىمىزدىڭ جاستارى ءۇشىن جاڭا جانە تۇراقتى بولاشاقتى قالىپتاستىرادى دەپ سەنەمىز», دەدى تيمۋر عابدۋل ۇلى.
رەسپۋبليكالىق فورۋمدا ەلىمىزدىڭ ءار وڭىرىنەن كەلگەن جاستار ۇسىنىسىن ورتاعا سالىپ, وي-پىكىرىن ايتتى.
«بۇگىنگى ۇيىمداستىرىلعان شارانىڭ ماڭىزى زور. ءۇش كۇن بويى ۇيرەنىپ, بىلگەنىمىزدى, تۇيگەنىمىزدى وڭىرلەرىمىزدە پايدالانامىز. شىعىس جاستارىنىڭ بەلسەندىلىكتەرى مەن يدەيا تۋعىزاتىن باستامالارى ۇنادى. فورۋم جۇمىسىنا ساتتىلىك تىلەيمىن», دەدى تالدىقورعان قالاسىنان كەلگەن جەتىسۋ وبلىستىق «اسسامبلەيا جاستارى» رقب توراعاسى ەكاتەرينا پودگورنوۆا.
ايتا كەتەيىك, فورۋمدا ەل جاستارى ءبىراۋىزدان جاڭا اتا زاڭ جوباسىن تولىق قولدايتىندىقتارىن ءبىلدىردى. ەرتەڭگى كۇنى ەنگىزىلەتىن وزگەرىستەردىڭ ەل بولاشاعى ءۇشىن ماڭىزدى ەكەنىنە باسا نازار اۋدارىلدى.
شىعىس قازاقستان وبلىسى