«زاڭ مەن ءتارتىپ» قاعيداتىن ىسكە اسىرۋ جانە تسيفرلاندىرۋ قۇرالدارىن بەلسەندى ەنگىزۋ اياسىندا ەلوردادا جىلى ايالدامالاردى ءبۇلدىرۋ فاكتىلەرىنىڭ الدىن الۋ شارالارى كۇشەيتىلدى, دەپ حابارلايدى Egemen.kz.
سوڭعى ۋاقىتتا استانادا جىلى ايالدامالاردى قاساقانا ءبۇلدىرۋ دەرەكتەرى جيىلەگەن. بەلگىسىز تۇلعالار اينەكتەردى سىندىرىپ, ەسىكتەردى جانە وزگە دە م ۇلىكتى زاقىمداپ جۇر. وسىعان بايلانىستى قالا اكىمدىگى مەن پوليتسيا بەينەباقىلاۋ جۇيەسىنىڭ مۇمكىندىكتەرىن كەڭەيتۋ جانە ناقتى ۋاقىت رەجيمىندە باقىلاۋدى كۇشەيتۋ بويىنشا شارالار قابىلدادى.
جىلى ايالدامالارعا ورناتىلعان كامەرالار كەزەڭ-كەزەڭىمەن پوليتسيا دەپارتامەنتىنىڭ جەدەل باسقارۋ ورتالىعىنا قوسىلىپ جاتىر. بۇل جاڭاشىلدىقتىڭ ارقاسىندا پوليتسيا قىزمەتكەرلەرى ونلاين-مونيتورينگ جۇرگىزىپ, قۇقىق بۇزۋشىلىقتارعا جەدەل ارەكەت ەتە الادى.
قازىرگى تاڭدا جۇيەگە نەگىزىنەن سارايشىق جانە الماتى اۋداندارىندا ورنالاسقان 20 ايالداما قوسىلعان. بارلىق جىلى ايالدامالاردىڭ بەينەاعىندارىن بىرىكتىرۋ جۇمىستارىن اقپان ايىنىڭ سوڭىنا دەيىن اياقتاۋ جوسپارلانىپ وتىر.
جوبانى ىسكە اسىرۋ قوعامدىق قاۋىپسىزدىك دەڭگەيىن ارتتىرۋعا, قالالىق م ۇلىكتىڭ ساقتالۋىن قامتاماسىز ەتۋگە جانە ۆانداليزم ءۇشىن جاۋاپكەرشىلىكتىڭ بۇلتارتپاستىعى قاعيداتىن قالىپتاستىرۋعا مۇمكىندىك بەرەدى.
پوليتسيا قىزمەتكەرلەرى قالالىق ينفراقۇرىلىم – بۇل جاي عانا شىنى مەن مەتالدان جاسالعان قۇرىلىمدار ەمەس, تۇرعىنداردىڭ قولايلىلىعى, قاۋىپسىزدىگى مەن جايلىلىعى ءۇشىن جاسالعان ورتاق كەڭىستىكتىڭ ءبىر بولىگى ەكەنىن ەسكە سالدى.
«مۇنداي ارەكەتتەر قالا كەلبەتىنە عانا ەمەس, بارلىق تۇرعىندارعا زيان كەلتىرەدى. ءوز قالاڭا ۇقىپتى قاراۋ – وزگەلەرگە جانە وزىڭە دەگەن قۇرمەتتىڭ بەلگىسى», دەدى پوليتسيا.