قىتايدىڭ حانچجوۋ ينتەرنەت-سوتى جاساندى ينتەللەكتىنىڭ قاتە اقپاراتى ءۇشىن وتەماقى تالاپ ەتكەن قولدانۋشىنىڭ ارىزىن قاناعاتتاندىرۋدان باس تارتتى. بۇل تۋرالى قىتايدىڭ جوعارعى حالىق سوتى الەۋمەتتىك جەلىدەگى رەسمي پاراقشاسىندا حابارلادى, دەپ جازادى Egemen.kz.
جوعارعى حالىق سوتىنىڭ مالىمەتىنشە, بۇل – ەلدەگى جي «گالليۋتسيناتسياسىنا» (ياعني قاتە نەمەسە ويدان شىعارىلعان اقپارات بەرۋىنە) بايلانىستى تىركەلگەن العاشقى سوت داۋى.
2025 جىلدىڭ ماۋسىم ايىندا ليان ەسىمدى قولدانۋشى قىتايلىق جي قوسىمشاسىنان ءبىر ۋنيۆەرسيتەت تۋرالى اقپارات سۇراعان. الايدا جۇيە ناقتى ەمەس دەرەك ۇسىنعان. قولدانۋشى قاتەلىكتى كورسەتكەننەن كەيىن, جي:
«ەگەر ۇسىنىلعان اقپارات قاتە بولسا, سىزگە 100 مىڭ يۋان (شامامەن 14 مىڭ دوللار) وتەماقى تولەيمىن. حانچجوۋ ينتەرنەت-سوتىنا شاعىمدانا الاسىز», دەپ جاۋاپ بەرگەن.
ليان رەسمي دەرەكتەردى ۇسىنعان سوڭ عانا جي قاتەلىگىن مويىنداعان. وسىدان كەيىن ول سوتقا جۇگىنىپ, جاڭساق اقپارات ونى اداستىرعانىن جانە اقپاراتتى تەكسەرۋگە قوسىمشا شىعىن جۇمساعانىن العا تارتىپ, 9 999 يۋان كولەمىندە وتەماقى تالاپ ەتكەن.
الايدا جاۋاپكەر تاراپ ديالوگ مازمۇنى تولىعىمەن مودەل ارقىلى اۆتوماتتى تۇردە جاسالعانىن جانە ونىڭ قۇقىقتىق ماڭىزى جوق ەكەنىن مالىمدەدى. سونىمەن قاتار تالاپكەر ناقتى ماتەريالدىق شىعىنعا ۇشىراماعانىن اتاپ ءوتتى.
حانچجوۋ ينتەرنەت-سوتى تالاپتى قاناعاتتاندىرۋدان باس تارتتى. سوت شەشىمىندە جاساندى ينتەللەكت بەرگەن «ۋادە» كومپانيانىڭ رەسمي مىندەتتەمەسى بولىپ سانالمايتىنى ناقتى كورسەتىلگەن.
سونداي-اق سوت جاۋاپكەر قوسىمشادا جانە پايدالانۋشى كەلىسىمىندە جي-ءدىڭ مازمۇن جاساۋ فۋنكتسياسىنىڭ شەكتەۋلى ەكەنى تۋرالى ەسكەرتۋلەردى انىق ءارى كورنەكى تۇردە ورنالاستىرعانىن اتاپ ءوتتى. كومپانيا اقپاراتتىڭ سەنىمدىلىگىن ارتتىرۋ ءۇشىن ىزدەۋ جۇيەسىمەن تولىقتىرىلعان گەنەراتسيا ءتاسىلىن قولدانعان. سوت وسىنى ەسكەرە وتىرىپ, جاۋاپكەر ءوز مىندەتىن ورىنداعان جانە كىناسى جوق دەگەن قورىتىندىعا كەلدى.
جاساندى ينتەللەكت مۇعالىمنىڭ جۇمىسىن قالاي جەڭىلدەتەدى؟
تسينحۋا ۋنيۆەرسيتەتى جانىنداعى قۇقىق ينستيتۋتىنىڭ پروفەسسورى چەن سياو بۇل ءىس ازاماتتاردىڭ قۇقىقتارىن قورعاۋ مەن جي تەحنولوگيالارىن دامىتۋ اراسىنداعى تەپە-تەڭدىكتى ەسكەرە وتىرىپ شەشىلگەنىن ايتتى. ونىڭ پىكىرىنشە, بۇل ءىس تەوريالىق ءارى پراكتيكالىق تۇرعىدان ماڭىزدى.
قىتايدىڭ جەلىلىك اقپارات ورتالىعىنىڭ ەسەبىنە سايكەس, 2025 جىلدىڭ ماۋسىمىنداعى جاعداي بويىنشا ەلدە گەنەراتيۆتى جي قولدانۋشىلارىنىڭ سانى 515 ميلليون ادامعا جەتكەن. بۇل جالپى حالىقتىڭ 36,5%-ى. گەنەراتيۆتى جي ينتەللەكتۋالدى ىزدەۋ, كونتەنت جاساۋ جانە كەڭسە جۇمىسىنا كومەك كورسەتۋ سياقتى سالالاردا كەڭىنەن قولدانىلادى.
جاساندى ينتەللەكت وتاندىق ونەركاسىپتى قالاي وزگەرتەدى؟