تۇركىستان وبلىسىندا ينۆەستورلاردىڭ قۇقىعىن قورعاۋ ماقساتىندا «پروكۋرورلىق سۇزگى» جۇيەسى ارقىلى بىلتىر 41 زاڭسىز اكىمشىلىك ءىستى كەلىسۋدەن باس تارتىلىپ, 12 ينۆەستورعا قاتىستى نەگىزسىز تەكسەرۋلەر توقتاتىلدى. سوڭعى ەكى جىلدا مەملەكەتتىك ورگانداردىڭ 300-گە جۋىق شەشىمى زەردەلەنىپ, ناتيجەسىندە 62 اكىمشىلىك ءىستى قوزعاۋدان جانە 21 تەكسەرۋدى تاعايىنداۋدان باس تارتىلعان, دەپ جازادى Egemen.kz.
بۇل دەرەكتەر وبلىس پروكۋراتۋراسىنىڭ باستاماسىمەن ينۆەستورلاردىڭ قۇقىقتارىن قورعاۋ جانە ينۆەستيتسيالىق جوبالاردى سۇيەمەلدەۋ ماسەلەلەرىنە ارنالعان «ينۆەستيتسيالىق كليمات-دامۋدىڭ باستى قۇرالى» تاقىرىبىندا وتكەن دوڭگەلەك ۇستەلدە كەلتىرىلدى.
«بۇگىندە تۇركىستان وبلىسى ينۆەستيتسيا تارتۋ بويىنشا ەلىمىزدىڭ جەتەكشى وڭىرلەرىنىڭ ءبىرى سانالادى. ءاربىر ينۆەستيتسيالىق جوبا اكىمدىك تاراپىنان سۇيەمەلدەنىپ, ينۆەستورلارعا ء«بىر تەرەزە» قاعيداتى نەگىزىندە جەدەل قىزمەت كورسەتىلىپ وتىر. ناتيجەسىندە 2025 جىلى ءوڭىر ەكونوميكاسىنا 1,7 ترلن تەڭگە ينۆەستيتسيا تارتىلىپ, ءوسىم 121,6%-دى قۇرادى. ونىڭ ىشىندە 1,4 ترلن تەڭگە – جەكە ينۆەستيتسيالار ۇلەسىندە. 2026 جىلى 444 ملرد تەڭگەگە 66 جوبانى ىسكە اسىرۋ ارقىلى 7 مىڭعا جۋىق جاڭا جۇمىس ورنىن اشۋ جوسپارلانعان. ءبىزدىڭ مىندەتىمىز – قاۋىپسىز ءارى اشىق ينۆەستيتسيالىق ورتانى قالىپتاستىرۋ», دەدى وبلىس اكىمى نۇرالحان كوشەروۆ.
سونداي-اق 2026 جىلعا تىكەلەي شەتەلدىك ينۆەستيتسيالار تارتۋ جوسپارى 499 ملن دوللار كولەمىندە بەكىتىلگەن. وبلىس اكىمدىگى مەن قۇقىق قورعاۋ ورگاندارى ينۆەستورلاردىڭ وزەكتى ماسەلەلەرىن جەدەل شەشۋ ماقساتىندا تۇراقتى ينۆەستيتسيالىق شتاب وتىرىستارىن وتكىزىپ, جەكە كەزدەسۋلەر ۇيىمداستىرىپ كەلەدى.
ەسكە سالا كەتەيىك, ۇكىمەتتىڭ كەڭەيتىلگەن وتىرىسىندا مەملەكەت باسشىسى بىزگە جاڭا ءارى ساپالى ينۆەستيتسيا تارتۋعا ارنالعان ءبىرتۇتاس ستراتەگيا قاجەت ەكەنىن ايتتى.