سەربيانىڭ استاناسى – بەلگرادتا كۇرەس تۇرلەرىنەن «Zagreb Open» ءتۋرنيرى اياقتالدى. دۋناي مەن ساۆا وزدەرىنىڭ ساعاسىندا ورنالاسقان شاھارداعى جارىستا قازاقستاننىڭ 30-دان اسا بالۋانى كۇش سىناستى, دەپ حابارلايدى Egemen.kz.
ەركىن كۇرەس شەبەرلەرىنىڭ سايىسىندا جالعىز كاميل كرۋگليەۆ (97 كگ) ونەر كورسەتتى. كىل مىقتىلار جينالعان جارىستا جاس دارىننىڭ جولى بولمادى. باستاپقى باسەكەدە كرۋگليەۆ ماجارستاندىق ريچارد ۆەحكە ەسە جىبەردى. ال ول ءوز كەزەگىندە وليمپيا ويىندارىنىڭ جەڭىمپازى, الەمنىڭ ءۇش دۇركىن چەمپيونى, يراندىق حاسان ءيازدانيدىڭ الدىندا دارمەنسىزدىك تانىتتى. ءسويتىپ, جەرلەسىمىز ءۇشىن جارىس اياقتالدى.
ايەلدەر كۇرەسىنەن وتكەن باسەكەدە قۇرلىقتىق دەڭگەيدەگى دودالاردا جۇلدە الىپ جۇرگەن زەينەپ بايانوۆا (50 كگ), يرينا كۋزنەتسوۆا (62 كگ), گۇلمارال ەركەباەۆا (76 كگ) جانە قىزدار اراسىنداعى الەم بىرىنشىلىگىنىڭ جەڭىمپازى نيلۋفار رايموۆا (57 كگ) بەلدەستى. العاشقى اينالىمدا زەينەپ رەسەيلىك ەليزاۆەتا سميرنوۆاعا ەش قايرات كورسەتە المادى. يرينا مەن گۇلمارال جاپونيالىق نونوكا وزاكي مەن ياسۋحا ماتسۋكيدەن ۇتىلدى. نيلفۋر ۇندىستاندىق مانيشا مانيشاعا ەسە جىبەردى.
گرەك-ريم كۇرەسىنەن 27 بالۋانىمىز بوزكىلەمگە شىقتى. سولاردىڭ اراسىنان بەسەۋى عانا جەڭىس تۇعىرىنا كوتەرىلدى. 50 كگ سالماقتاعى امانعالي بەكبولاتوۆ پەن ەربول قاماليەۆ ءۇشىنشى ورىن ءۇشىن سايىستا الەم چەمپيوناتىنىڭ قولا جۇلدەگەرى, ازيانىڭ ەكى دۇركىن چەمپيونى, جاپونيالىق يۋي شيوتاني مەن جاستار اراسىنداعى كادەتتەر مەن جاستەر اراسىنداعى الەم بىرىنشىلىگىنىڭ ءفيناليسى, يراندىق ساجاد جاۆيد ابباسپوۋرگانيدەن ايلاسىن اسىردى. 72 كگ سالماق دارەجەسىندە سىنعا تۇسكەن الماتبەك امانبەك شەشۋشى تۇستا قۇرلىق چەمپيونى, وزبەكستاندىق ابرور اتاباەۆتى جولىنىن ىعىستىردى. 82 كگ سالماقتاعى يبراگيم ماگومادوۆ امەريكالىق دجەسسي پورتەردى ۇتتى. اسا اۋىر سالماقتاعى ولجاس سىرلىباي گرۋزيالىق راتي تاليكيشۆيليدەن باسىم ءتۇستى.
جوعارىدا ەسىمدەرى اتالعان جەرلەستەرىمىزدىڭ بارلىعى دا قولا مەدالدى يەلەنسە, 97 كگ سالماقتاعى يسلام ەۆلوەۆقا كۇمىس جۇلدە بۇيىردى. جارتىلاي فينالدا الەم جانە ەۋروپا چەمپيوناتتارىندا ەكى رەت جۇلدە العان سەربيانىڭ اتاقتى بالۋانى ميحايل كادجايانى قاپى قالدىرعان وتانداسىمىز فينالدا الەم چەمپيوناتىنىڭ ءفيناليسى, 23 جاسقا دەيىنگىلەر اراسىنداعى الەم چەمپيونى, ماجارستاندىق الەكس شوكەدەن جەڭىلدى.
جەڭىل اتلەتتەر قىتايدا جەتى جۇلدە ولجالادى
ءبىر وكىنىشتىسى, وسى جارىسقا قاتىسقان پاريج وليمپياداسىنىڭ كۇمىس جۇلدەگەرى دەمەۋ جادىراەۆ (82 كگ), الەم چەمپيونى ايدوس سۇلتانعالي (63 كگ) جانە الەم چەمپيوناتىنىڭ جۇلدەگەرلەرى ەرجەت جارلىقاسىن (67 كگ) سىندى بەلدى بالۋاندارىمىز جۇلدەلى ورىنداردان تىس قالدى. ساڭلاقتارىمىزعا جاڭا سالماق جاقپادى. العاشقى اينىلىمدا ەرجەت تۇركيالىق مۇرات فيراتقا, شيرەك فينالدا ايدوس مولدوۆالىق ۆيتالي ەرەمەنكوعا جانە دەمەۋ يراندىق مۇحاممەد رەزا ءموحتاريدىڭ وسال تۇسىن تابا المادى.
دزيۋدوشىلار پاريجدە ءۇش قولاعا قول جەتكىزدى