الماتى وبلىسىندا سينتەتيكالىق ەسىرتكى وندىرۋمەن اينالىسقان جاسىرىن زەرتحانا اشكەرەلەندى, دەپ حابارلايدى Egemen.kz.
الماتى وبلىسى پوليتسيا دەپارتامەنتىنىڭ قىزمەتكەرلەرى ءىىم-ءنىڭ ەسىرتكى قىلمىسىنا قارسى ءىس-قيمىل كوميتەتىنىڭ ۇيلەستىرۋىمەن, قاراساي اۋداندىق پوليتسيا باسقارماسى جانە پروكۋراتۋرا ورگاندارىنىڭ قولداۋىمەن جەدەل-ىزدەستىرۋ ءىس-شارالارىن جۇرگىزدى. ناتيجەسىندە كوزگە تۇسە بەرمەيتىن ساياجاي ۇيىندە زاڭسىز جۇمىس ىستەگەن سينتەتيكالىق ەسىرتكى وندىرەتىن زەرتحانا انىقتالىپ, تولىقتاي جويىلدى.
«تەكسەرۋ بارىسىندا ەكى كۇدىكتى ۇستالىپ, ولاردىڭ ءبىرى قاماۋعا الىندى. ءتىنتۋ كەزىندە مەفەدرون سينتەتيكالىق ەسىرتكىسى, ونى دايىنداۋعا ارنالعان ارنايى جابدىقتار, شىنى ىدىستار, پرەكۋرسورلار مەن ءارتۇرلى حيميالىق زاتتار تابىلىپ, تاركىلەندى. زاڭسىز ءوندىرىس تۇرعىن ءۇيدىڭ ءبىر بولمەسىندە جاسىرىن تۇردە ۇيىمداستىرىلعانى بەلگىلى بولدى», دەلىنگەن الماتى پد حابارلاماسىندا.
قۇقىق قورعاۋ ورگاندارىنىڭ ۋاقتىلى ارەكەتىنىڭ ارقاسىندا قىلمىستىق قىزمەت باستاپقى كەزەڭىندە توقتاتىلىپ, ءىرى كولەمدەگى ەسىرتكى پارتياسىنىڭ زاڭسىز اينالىمعا تۇسۋىنە جول بەرىلمەدى. مامانداردىڭ ايتۋىنشا, سينتەتيكالىق ەسىرتكى دايىنداۋ كەزىندە قولدانىلاتىن حيميالىق كومپونەنتتەر ادام ءومىرى مەن دەنساۋلىعىنا اسا قاۋىپتى.
اتالعان دەرەك بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. وزگە مالىمەتتەر قر قپك-ءنىڭ 201-بابىنا سايكەس جاريا ەتىلمەيدى.