ءار اۋلەتتىڭ باعالى مۇراسى بولادى. اسىرەسە ونداي قاستەرلى دە قۇندى دۇنيە قارا شاڭىراقتىڭ تورىندە تۇرادى. قارا شاڭىراق قازىكەن ءالى اعامىزدىڭ ۇيىندەگى بەرەكەلى تاباقتىڭ تاريحى تىم ارىدە.
ارقاداعى تامالاردىڭ سوڭعى بولىسى, ءبيى بولعان سۇيىندىك ۇلى ءالىنىڭ جۇبايى اعىمجاننان قالعان اعاش تاباق كونەنىڭ كوزىندەي. يەسى قازىكەن اعامىز ونى جادىگەر ەتىپ ساقتاپ قانا قويماي, سىيلى كىسى كەلسە, سول اعاش تاباقتان ءدام تاتىرادى.
«قانشا دەگەنمەن عاسىردان استام ساقتالعان اعاش تاباقتىڭ ءوز كۇيىن جوعالتپاۋى, باعا جەتپەس قۇندىلىعى, قاسيەتى, تاڭداپ جاسالعان اعاشىنىڭ مىقتىلىعىنان شىعار. نەگىزى, ءپىشىنى اباي ءدام ىشكەن تاباققا كەلىڭكىرەيدى. ءبىزدىڭ تاباقتىڭ ەرەكشەلىگى – ءوڭىن بەرمەيدى. جانە بەزى وتە كوپ. سوعان قاراعاندا ەڭ قاتتى اعاشتان ويىلعان.
اكەم كوپبوسىن – الىدەن قالعان جالعىز تۇياق. بۇل جادىگەردى انام نۇرزيپا كوزىنىڭ قاراشىعىنداي ساقتاپ, بىزگە اماناتتادى», دەيدى قازىكەن كوپبوسىن ۇلى.
اعىمجان اجەيدى توڭىرەك «شەشە» دەپ اتاپ كەتكەن. داستارقانى كول-كوسىر, ۇيىنەن كىسى ارىلمايتىن كەڭ كوڭىلدىڭ يەسى بولىپتى دەيدى كوزكورگەندەر. ءازيز انادان قالعان سول تاباقتان مىنەكەي, اۋلەتتىڭ شوپشەكتەرى, نەمەنەلەرى ءدام تاتىپ ءجۇر. عاسىرلىق مۇرا دەگەن وسى بولسا كەرەك-ءتى.
قازىر اۋىلداعى ۇلكەن ءۇي استاناعا كوشكەن. استاناداعى ۇلكەن ءۇيدىڭ يەسى قازىكەن اعامىزدىڭ دا شاڭىراعىنا اعىمجان انامىزدىڭ اعىل-تەگىل داستارقانى جۇعىستى بولعان. قازىكەن اكەمىز اۋلەتتەگى ءسابيدىڭ وزىنە اعاش تاباقتىڭ مايىن جاعىپ, اۋىز تيگىزەدى. ونىڭ سىرى دا بار.
ارعى اتامىز الەكەڭ كەزىندە الاشوردالىقتارمەن تىعىز بايلانىستا بولىپتى. ولار تالاي رەت سول وڭىردەگى سىيلى ادام بولعان سوڭ اتامىزدىڭ ۇيىنە كەپ تۇسەدى. بۇل تاباقتان قالىڭ قازاقتى وياتقان مىرجاقىپ دۋلات ۇلى باستاعان ۇلىلار, دالا دانىشپانى اتانعان الكەي مارعۇلان سەكىلدى عالىمدار اس ءىشىپتى. ۇلىلار ءدام تاتقان تاباق – بۇل. يەسى سول سەبەپتى, ۇلىلار قولىنىڭ تابى قالعاندىقتان, جاقسىلىعى جۇعىستى بولسىن دەپ ىرىمدايتىن كورىنەدى.
ۇلكەن ۇيدەگى اعامىز اي سايىن اعاش تاباقتى تۇتاسىمەن جىلقىنىڭ مايىمەن مايلاپ وتىرادى. وسىدان-اق, جىلقى مايىنىڭ قاسيەتىن باعامداي بەرىڭىز...
ءبىز وسى تاباقتان ەت اساۋدى اڭسايمىز: ەڭ كەرەمەتى – ەتتىڭ نانى بىرازعا دەيىن ىستىعىن جوعالتپايدى. بۇدان ىشكەن استىڭ دا ءدامى ۇزاق ۋاقىتقا دەيىن تاڭدايدان كەتپەيدى.
ۇلكەن ۇيگە سالەم بەرىپ قايتپاعالى دا ءبىراز بولدى...
قاراعاندى وبلىسى