جىر الىبى جامبىل جاباەۆتىڭ 180 جىلدىق مەرەيتويى اياسىندا الماتى قالاسىندا ونىڭ ءومىرى مەن شىعارماشىلىعىنا ارنالعان ارنايى كورمە ۇيىمداستىرىلدى.
كورمەدە كوپشىلىك نازارىنا «جامبىل جاباەۆ ادەبي-مەموريالدى مۋزەيىندە» ساقتالعان قۇندى جادىگەرلەر ۇسىنىلدى. ءۇش مىڭنان استام ەكسپوناتتىڭ ىشىنەن ەڭ تاڭداۋلىلارى ىرىكتەلىپ, جۇرتشىلىققا كورسەتىلدى. ولاردىڭ قاتارىندا جەتىسۋدىڭ ءدۇلد ۇلى كيگەن كيىمدەر, تۇتىنعان مۋزىكالىق اسپاپتار, سيرەك قولجازبالار مەن تۇرمىستىق بۇيىمدار بار.
كورمەدەگى ەرەكشە نازار اۋدارتقان جادىگەرلەردىڭ ءبىرى – اقىننىڭ دومبىرالارى. بۇل جونىندە جامبىل جاباەۆتىڭ نەمەرەسى, مۋزەي ديرەكتورى سالتانات جامبىلوۆا كەڭىنەن اڭگىمەلەدى. ونىڭ ايتۋىنشا, جامبىل اتا دومبىرانى وزىنە سەرىك ەتىپ, ونى قالام مەن قاعازدىڭ ورنىن باسقان رۋحاني قۇرال رەتىندە باعالاعان.
– اتامىزدى بايتاق ەلگە تانىتقان – ونىڭ ايتىستارى ەكەنى بەلگىلى. سارا قىزبەن, ايكۇمىسپەن, بولەكقىزى سايقالمەن, قادىرقىزى بۇرىممەن, شاشۋباي, قۇلمامبەت, دوسماعامبەتتەرمەن ايتىستارى ونىڭ اقىندىق شەبەرلىگىن شىڭداپ, سۋىرىپسالمالىق قابىلەتىن ارتتىرا تۇسكەن. سونىڭ بارىندە جىر الىبىنا سەرىك بولعان – قاسيەتتى دومبىرا. ءوزىنىڭ ومىرلىك سەرىگى – دومبىرا جايلى وتەگەن باتىر جىرىندا: «سيا ساۋىت, قالامسىز, وي قوزعاعان دومبىرا, داپتەر, كىتاپ, قاعازسىز ءسوز قوزعاعان دومبىرا», – دەپ جىرلاعان. سوندىقتان ءبىز كورمەگە اقىننىڭ ەكى دومبىراسىن قويدىق. جالپى, جامبىل اتامىزدان بىزگە ءۇش دومبىرا جەتكەن. ەكەۋى ءوز مۋزەيىندە ساقتاۋلى, ال ءۇشىنشىسى الماتىداعى ىقىلاس دۇكەن ۇلى اتىنداعى ۇلتتىق اسپاپتار مۋزەيىندە تۇر, – دەيدى ول.
مەرەكەلىك ءىس-شارا كورمەمەن عانا شەكتەلمەي, ادەبي-سازدى كەشكە ۇلاستى. رۋحاني باسقوسۋدا قۇرمانعازى اتىنداعى قازاق ۇلتتىق كونسەرۆاتورياسى مەن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى جامبىل جاباەۆتىڭ شىعارمالارىن ورىنداپ, كورەرمەنگە رۋحاني اسەر سىيلادى.
ءىس-شارا بارىسىندا ءداستۇرلى ءانشى تىلەۋلەس قۇرمانعاليەۆ تە وي ءبولىسىپ, جىر الىبىنىڭ قازاق رۋحانياتىنداعى ايرىقشا ورنىن اتاپ ءوتتى.
– جامبىل بۇكىل ءيسى قازاققا ءماشھۇر, ءبىر عاسىر جاساپ, ەكى عاسىردىڭ جىرىن جىرلاعان الىپ تۇلعا. قازىرگى زاماندا جامبىلداي كوكىرەگى داڭعىل, رۋحى بيىك ادامدار سيرەك. ونىڭ شاكىرتتەرى الىمقۇل, اسىمقان سىندى اتالارىمىزدان قالعان مول مۇرا بار. سول قازىنانى حالىققا كەڭىنەن دارىپتەۋ – 180 جىلدىق مەرەيتوي اياسىندا ءالى دە جالعاسىن تابا بەرەدى, – دەيدى ول.
وسىلايشا, جامبىل جاباەۆتىڭ 180 جىلدىعىنا ارنالعان تاعىلىمدى شارا ۇلتتىق ونەر مەن ءداستۇردىڭ ساباقتاستىعىن ايشىقتاپ, ۇلى اقىنعا دەگەن حالىق قۇرمەتىن تاعى ءبىر مارتە دالەلدەدى.
الماتى