استاناداعى ءنازىر تورەقۇلوۆ اتىنداعى №35 مەكتەپ-ليتسەيدە «ن.تورەقۇلوۆ – كورنەكتى مەملەكەت جانە قوعام قايراتكەرى, عالىم, قازاقتان شىققان تۇڭعىش كاسىبي ەلشى» اتتى عىلىمي كونفەرەنتسيا ءوتىپ, ءبىلىم وشاعىندا تۇلعانىڭ مۋزەيى اشىلىپ, كەۋدەمۇسىنى قويىلدى.
سالتاناتتى باسقوسۋعا مەملەكەت جانە قوعام قايراتكەرى قۋانىش ايتاحانوۆ, ءماجىلىس دەپۋتاتى قازىبەك يسا, ماڭعىستاۋ وبلىستىق ءماسليحاتىنىڭ توراعاسى جاڭبىرباي ماتاەۆ, سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى ەرلان جەتىباەۆ, ساۋد ارابياسىنىڭ قازاقستانداعى ەلشىلىگىنىڭ حاتشىسى عاسسان ءال-ءاحمادي, ارداگەر ديپلومات, پروفەسسور, ءنازىرتانۋشى سايلاۋ باتىرشا ۇلى, باسقا دا ازاماتتار قاتىستى.
مەملەكەت باسشىسى قاسىم-جومارت توقاەۆ ونىڭ كۇرەسكەرلىك جولىن ۇلگى ەتە وتىرىپ: «ۇلت نامىسىن بيىك ۇستانعان الاش الىپتارىنىڭ ەسىمدەرىن حالقىمىز قاشاندا قۇرمەتپەن ەسكە الادى. ءنازىر تورەقۇلوۆ – ەل جادىندا ساقتالعان تۇلعالاردىڭ ءبىرى, بەلگىلى مەملەكەت قايراتكەرى, قازاقتان شىققان تۇڭعىش كاسىبي ديپلومات», دەپ وڭ باعا بەرگەن ەدى. ءوز كەزەگىندە بۇل جيىن دا وسى پىكىردى ايقىنداي تۇسۋىمەن ەرەكشەلەندى.
مەكتەپتەگى مۇراجايعا 40-قا جۋىق قۇندى جادىگەر قويىلعان. وندا تاريحي قۇجاتتار, سيرەك كىتاپتار, كونە بۇيىمدار, ءنازىر تورەقۇل ۇلى تۋرالى ەڭبەكتەر توپتاستىرىلعان. تۇركىستان وبلىستىق تاريحي-مادەني-ەتنوگرافيالىق ورتالىققا قاراستى ءنازىر تورەقۇلوۆ مۋزەيىنىڭ «ۇلت رۋحىن كوتەرگەن تۇلعا: ءنازىر تورەقۇلوۆ» اتتى كوشپەلى كورمەسى, تەاترلاندىرىلعان ادەبي كومپوزيتسيا ۇسىنىلدى. بۇدان كەيىن ء«نازىر تورەقۇل ۇلى جولى» دەرەكتى ءفيلمى كورسەتىلدى. ونىڭ ستسەناريىن جازۋشى, جۋرناليست جارىلقاپ بەيسەنباي ۇلى مەن مادەنيەتتانۋشى ابىلايحان قالنازاروۆ جازعان. ءتۇسىرىلىم تۇلعا بيوگرافياسىنىڭ بۇرىن-سوڭدى قوزعالماعان قاباتى – تۇركىلىك ماسشتابتاعى قايراتكەرلىگى مەن الاشوردا وكىلدەرىمەن مۇراتتاستىعىن كورسەتۋىمەن قۇندى.
قۋانىش ايتاحان ۇلى ايتۋلى تۇلعانىڭ قايراتكەرلىك جولى, وسكەن ورتاسى, ازاماتتىق بولمىسىنا كەڭىنەن توقتالدى. بۇدان كەيىن سىرتقى ىستەر ءمينيسترى ەرمەك كوشەرباەۆتىڭ, «اmanat» پارتياسىنىڭ اتقارۋشى حاتشىسى داۋلەت كارىبەكتىڭ قۇتتىقتاۋ حاتتارى وقىلدى.
ء«نازىر تورەقۇلوۆ – مەملەكەتتىلىكتىڭ بيىك دەڭگەيىن كورسەتىپ, حالىقارالىق ارەنادا قازاق ديپلوماتياسىنىڭ ىرگەتاسىن قالاعان ايتۋلى قايراتكەر. ونىڭ پاراساتى مەن ءبىلىمى, ەل الدىنداعى جاۋاپكەرشىلىگى مەن ادامدىق ارىنا ادالدىعى – بۇگىنگى جاس ۇرپاق ءۇشىن ناعىز وتانسۇيگىشتىكتىڭ جارقىن ۇلگىسى. ديپلوماتيالىق مۇرا رەتىندە سىرتقى ىستەر مينيسترلىگىندە 2003 جىلدان بەرى ءنازىر تورەقۇلوۆ اتىنداعى ارنايى مەدالمەن ەڭ ۇزدىك ديپلوماتتاردىڭ ماراپاتتالۋى – قايراتكەر ەسىمىنىڭ مەملەكەتتىك دەڭگەيدە قاستەرلەنۋىنىڭ دالەلى», دەلىنگەن سىرتقى ىستەر ءمينيسترىنىڭ قۇتتىقتاۋ حاتىندا.
سونداي-اق ء«نازىر تورەقۇلوۆ» حالىقارالىق قورىنىڭ پرەزيدەنتى, ەكونوميكا عىلىمدارىنىڭ دوكتورى, پروفەسسور جاپپار جۇماننىڭ ء«نازىر تورەقۇلوۆ – رەفورماتور, اعارتۋشى, عالىم», بەلگىلى جازۋشى, قوعام قايراتكەرى, ءنازىرتانۋشى جولتاي ءالماش ۇلىنىڭ ء«نازىر تورەقۇل ۇلىنىڭ رۋحاني مۇراسى», ۇلتتىق مۋزەي ديرەكتورىنىڭ قور قىزمەتى جونىندەگى ورىنباسارى الىبەك كۇزەرباەۆتىڭ «ت.رىسقۇلوۆ, س.قوجانوۆ, ن.تورەقۇلوۆتار جەرلەنگەن ورىن – «كوممۋناركا» جونىندە» اتتى باياندامالارى تىڭدالدى.
جاپپار جۇمان: ء«وزىنىڭ قىسقا ءومىرىن ءنازىر تورەقۇلوۆ تولىعىمەن ۇلتىنا, ونىڭ بولاشاعىنا ارنادى. تۇركىستان ورتالىق اتقارۋ كوميتەتىنىڭ توراعاسى رەتىندە حالقىمىزدىڭ جاعدايىن, ءال-اۋقاتىن جاقسارتۋ, ولاردىڭ رۋحاني مادەنيەتىن ارتتىرۋ, مادەنيەت, ءبىلىم وشاقتارىن كوبەيتۋ, جاستاردى تاربيەلەۋدەگى ەڭبەگى ۇشان تەڭىز. ول تەك قانا قازاق حالقى ەمەس, بۇكىل تۇركى تىلدەس حالىقتاردىڭ ماقتانىشىنا اينالدى. ءومىر جولىنىڭ بارلىق كەزەڭىندە حالىقتارمەن ەتەنە ارالاسىپ, ولاردى مادەنيەتكە, ادەبيەتكە ۇندەدى», دەدى.
ء«نازىر تورەقۇلوۆ» حالىقارالىق قورى اتالعان مەكتەپتىڭ ۇزدىك ءۇش وقۋشىسى – ايسانا تۇكپيەۆا, ايساۋلە سۇندەتوۆا, بەيبارىس ايتقازينوۆقا تۇلعا اتىنان شاكىرتاقى تاعايىنداپ, ونى ارنايى تاپسىردى, بۇل ءۇردىس ودان ءارى جالعاسىن تاباتىنى اتاپ ءوتىلدى. كونفەرەنتسيا سوڭىندا ارنايى قارار قابىلدانىپ, وندا تۇلعانىڭ ەسىمىن جاڭعىرتۋ, ەلىنە سىڭىرگەن ەڭبەگىن ناسيحاتتاۋ ماقساتىندا الداعى ۋاقىتتا قولعا الىنۋعا ءتيىس اۋقىمدى ءىس-شارالار توپتاماسى قامتىلدى.