قارجى مينيسترلىگى ىشكى مەملەكەتتىك اۋديت كوميتەتى پروفيلاكتيكالىق باقىلاۋ بارىسىندا الماتى حالىقارالىق اۋەجايىنىڭ قارجىلىق قىزمەتىندە كەمشىلىكتەردى انىقتادى, دەپ حابارلايدى Egemen.kz.
جۇرگىزىلگەن تەكسەرۋدىڭ بارىسىندا اكتسيونەر بولىپ سانالمايتىن زاڭدى تۇلعاعا 6,8 ملرد تەڭگە سوماسىنا ديۆيدەندتەردىڭ زاڭسىز تولەنگەنى اشكەرەلەندى.
بۇل ستراتەگيالىق نىساننىڭ اكتيۆتەرى مەن دامۋ مۇمكىندىكتەرىن تومەندەتىپ, ونىڭ قارجىلىق تۇراقتىلىعىنا اسەر ەتتى.
تەكسەرۋ ناتيجەلەرى بويىنشا ءتيىستى قاراجات اۋەجايدىڭ شوتىنا تولىعىمەن قايتارىلدى. اتالعان اقشا الماتى حالىقارالىق اۋەجايدى دامىتىپ, جولاۋشىلارعا قىزمەت كورسەتۋ ساپاسى مەن باسقا دا سەرۆيستەردى جاقسارتۋعا باعىتتالادى.
ۇكىمەت جەكە مەديتسينالىق ۇيىمداردى قارجىلاندىرۋدا كوپتەگەن زاڭبۇزۋشىلىقتاردى انىقتادى
قارجى مينيسترلىگى ىشكى مەملەكەتتىك اۋديت كوميتەتىنىڭ توراعاسى ەرجان مىڭجاساروۆ ايتقانداي, 2025 جىلى ەنگىزىلگەن تىڭ تاسىلدەردىڭ ارقاسىندا باقىلاۋ ورگانى جاپپاي تەكسەرۋدىڭ ورنىنا اتاۋلى(ناقتى) تۇردەگى جۇمىسقا باسىمدىق بەرگەن. كوميتەت سىن-قاتەرى جوعارى ايماقتارعا باسا ءمان بەرىپ, وسى ءتاسىل تيىمدىلىكتىڭ ارتۋىنا اسەر ەتكەن. تۇتاستاي العاندا, تەكسەرۋلەر 22% قىسقارىپ, انىقتالعان بۇزۋشىلىقتار سوماسى 36% ۇلعايعان. جۇرگىزىلەتىن ءار تەكسەرۋدىڭ ۇشتەن ءبىرىنىڭ تيىمدىلىگى ارتىپ كەلەدى. 2025 جىلدىڭ قورىتىندىسى بويىنشا بيۋدجەتكە 400,0 ملرد تەڭگە قايتارىلىپ, سونداي-اق 1,2 ملرد تەڭگە كولەمىندە ايىپپۇل ءوندىرىلدى.