ونەر مەن مادەنيەتىمىزدىڭ جاۋھارى ساقتالعان ءابىلحان قاستەەۆ اتىنداعى ۇلتتىق ونەر مۋزەيى اۋقىمدى جاڭعىرتۋدان كەيىن ءوز جۇمىسىن قايتا باستادى. مەملەكەت باسشىسىنىڭ قولداۋىمەن قىسقا مەرزىمدە جۇرگىزىلگەن كەشەندى جاڭعىرتۋ ونەر تۋىندىلارىن ساقتاۋ مەن ەكسپوزيتسيالاۋعا زاماناۋي جاعداي جاساۋعا باعىتتالعان.
جوندەۋ جۇمىسىمەن قاتار تاعىلىم ورداسىنداعى بىرقاتار ەكسپوزيتسيا تولىعا تۇسكەن. كورەرمەنگە بۇرىننان تانىس وتاندىق جانە الەمدىك ونەر جاۋھارلارىمەن بىرگە جاڭا بولىمدەر ۇسىنىلدى. اتاپ ايتساق, گرافيك-سۋرەتشى ەۆگەني سيدوركيننىڭ شىعارمالار كورمەسى, «قازاق ونەرىندەگى ايەل بەينەسى» ەكسپوزيتسياسى, ەلىمىزدىڭ تاۋەلسىزدىك كەزەڭىندەگى ونەر ءبولىمى, سونداي-اق حح عاسىردىڭ سوڭى – ءححى عاسىردىڭ باسىنداعى شەتەلدىك ونەردىڭ جاڭا تۋىندىلارىنا ارنالعان ءبولىم بار. ناتيجەسىندە, ەلدەگى باستى كوركەم گالەرەيا زاماناۋي حالىقارالىق ستاندارتتارعا ساي, حالىقارالىق دەڭگەيدەگى كورمە جوبالارىن ىسكە اسىرۋعا تولىق دايىن ەكەنى ايتىلدى.
ونەر ورداسىنىڭ قايتا اشىلۋى مۋزەيدىڭ 90 جىلدىعى مەن 1976 جىلدان بەرى ورنالاسقان عيماراتتىڭ 50 جىلدىعىمەن تۇسپا-تۇس كەلىپ وتىر. جاڭعىرتۋ جوباسى مادەنيەت جانە اقپارات مينيسترلىگىنىڭ باستاماسىمەن جۇزەگە اسقان.
«مۋزەي كەلۋشىلەردى جاڭارتىلعان كەڭىستىكتە تىڭ ەكسپوزيتسيالارىمەن قارسى الادى. زالداردىڭ جاڭا تۇستىك شەشىمى بۇرىننان تانىس ەكسپوناتتاردى جاڭا قىرىنان قابىلداۋعا مۇمكىندىك بەرمەك. الداعى ۋاقىتتا دا ءتۇرلى جوبالار مەن كورمەلەردى, مادەني ءىس-شارالاردى ۇيىمداستىرىپ, شابىت سىيلاپ, ديالوگ پەن شىعارماشىلىققا ارنالعان ورتالىق رەتىندەگى قىزمەتىمىزدى جالعاستىراتىن بولامىز», دەيدى ءا.قاستەەۆ مۋزەيىنىڭ ءباسپاسوز قىزمەتى.
تاريحى تەرەڭدە جاتقان تاعىلىم ورداسى تاۋەلسىزدىك جىلدارىندا ساپالى دامۋ كەزەڭىنە اياق باستى. بەينەلەۋ ونەرى سالاسىنداعى جەتەكشى عىلىمي-زەرتتەۋ جانە مادەني-اعارتۋ ورتالىعى رەتىندە ەلدەگى ەڭ باعالى ۇزدىك كوركەمونەر توپتاماسىنا يە. ونىڭ بىرەگەي كوللەكتسياسىندا 26 مىڭنان استام ەكسپونات بار. مۋزەيدە بەينەلەۋ ونەرى شەبەرلەرىنىڭ شىعارماشىلىق مۇراسىمەن قاتار, ەل مادەنيەتى مەن تاريحىنداعى ەڭ ماڭىزدى كەزەڭدەر ايشىقتالعان.
مۇندا قازاق سۋرەت ونەرىنىڭ نەگىزىن قالاۋشى ءابىلحان قاستەەۆتىڭ قازىرگى زامانعى شىعارمالارى مەن وتاندىق ونەر كلاسسيكتەرى قانافيا تەلجانوۆ پەن ايشا عالىمباەۆانىڭ, گۇلفايرۋس يسمايلوۆا مەن ەۆگەني سيدوركيننىڭ, ساليحيتدين ايتباەۆ پەن سابىر مامبەەۆتىڭ, جاناتاي شاردەنوۆ پەن سەرگەي كالمىكوۆتىڭ بىرەگەي قولتاڭباسى ساقتالعان. وتاندىق كەسكىندەمەدەن وزگە ورىس جانە باتىس ەۋروپا كەسكىندەمەلەرىنىڭ بىرەگەي تۋىندىلارىن, شىعىس ەلدەرىنىڭ ونەرى مەن قولدانبالى ساندىك شەبەرلىكتىڭ ۇزدىك ۇلگىلەرىن مۋزەي تورىندە تۇر.
تۇراقتى ەكسپوزيتسيالار زاماناۋي تالاپتارعا ساي جابدىقتالىپ, ۋاقىت بەدەرىنە ساي تسيفرلىق شەشىمدەر دە كورىنىس تابا باستاعان. ەكسپوزيتسيالارعا تىكەلەي جارىق بەرۋ, مامانداندىرىلعان اسپالى جابدىقتاۋ, مۋلتي-ەكسپليكاتسيالاردى ورناتۋ جانە QR-اقپاراتتىق سۇيەمەلدەۋ سىندى زاماناۋي تەحنولوگيالار ءداستۇر مەن يننوۆاتسيالاردىڭ ۇيلەسىمىمەن قويىلدى.
الماتى