امەريكاداعى الپاۋىت «Bloomberg» كورپوراتسياسىندا جالعىز قازاق قىزى ەڭبەك ەتەدى. «بولاشاق» باعدارلاماسىنىڭ تۇلەگى دانا بوكەنوۆا قارجىلاي تالداۋ جاسايتىن كومپانيادا جاساندى ينتەللەكت باعىتىنداعى ءىرى جوبالاردى باسقارىپ وتىر. كاسىبيلىگىمەن كوپتىڭ كوزىنە تۇسكەن مامانمەن اڭگىمەلەسۋدىڭ ءساتى ءتۇستى. ءجۇرىپ وتكەن جولىن, شەتەلدە جيعان-تەرگەن تاجىريبەسىن سۇراپ بىلدىك.
– ءسىزدىڭ, اقش-قا قادام باسۋىڭىزعا نە تۇرتكى بولدى؟
– بالا كەزدەن شيراق بولدىم, جاڭانى كورمەككە, ۇيرەنۋگە اسىقپىن. اتا-انام جۇمىسباستى, كوبىنە اتا-اجەمنىڭ تاربيەسىن كوردىم. ولار ەرەكشە تەمىردەي ءتارتىپ پەن جاۋاپكەرشىلىككە بەرىك جاندار-ەتىن. بىلىمگە قۇشتارلىعىمدى اشقان دا – سول كىسىلەر. سودان بولار, كوپ دۇنيەگە قىزىعۋشىلىعىم باسىم. ويلاعان ءىستى اياعىنا دەيىن جەتكىزبەي قويمايتىن قايسارلىق, تاباندىلىق دەگەن قاسيەتتەر دە ەتەنە شاقتان بويىما ابدەن ءسىڭدى. قاراپ وتىرسام, ءار تاڭداۋىما نەگىز بولعان دا, ءومىردىڭ ءار كەزەڭىندە جاڭا ورتاعا تەز بەيىمدەلۋگە, بەلگىسىزدىكتەن قورىقپاۋعا, ءوز مۇمكىندىگىڭدى كەڭ اۋقىمدا سىناۋعا جەتەلەگەن وسى دۇنيەلەر ەكەن.
قازاقستاندا حالىقارالىق قاتىناستار جانە قارجى ماماندىعىن وقىدىم. ودان كەيىن «بولاشاق» باعدارلاماسىمەن مانچەستەر ۋنيۆەرسيتەتىنىڭ ماگيستراتۋراسىن دا ءساتتى اياقتادىم. ەلگە ورالعان سوڭ, الماتىداعى تانىستارىممەن بىرلەسە ۋنيۆەرسيتەتتەرگە Wi-Fi ينفراقۇرىلىمى مەن ينتەرنەت شەشىمدەرىن قۇراتىن ستارتاپ اشۋدى ءجون سانادىق. بۇل جوبانى بەس جىل بويى ۇزدىكسىز دامىتىپ, نارىققا بەيىمدەدىك. كومپانياعا ينۆەستور تارتىلىپ, جوبا تولىق ساتىلعان ساتتە مەن ءۇشىن بۇل جوبانىڭ اياقتالۋى عانا ەمەس, كاسىبي جانە جەكە ءوسۋىمنىڭ جاڭا كەزەڭى باستالاتىنىنىڭ بەلگىسى ەدى. الەمدىك دەڭگەيدەگى, اسىرەسە اناليتيكا مەن تەحنولوگياداعى ەڭ الدىڭعى قاتارلى ورتالاردا تاجىريبە جيناعىم كەلدى. ءسويتىپ, امەريكاعا 2016 جىلى كوشىپ كەلدىم. بىردەن ماماندىعىمدى تۇبەگەيلى وزگەرتكەن جوقپىن, بىراق كاسىبي باعىتىم ايتارلىقتاي ناقتىلاندى دەسەم, بولادى. نەگىزگى كاسىبي قالىپتاسۋىما INTO University Partnerships كومپانياسىنداعى ەڭبەك ەتكەن جىلدارىم سەبەپ بولدى. بۇل ۇيىم ۋنيۆەرسيتەتتەرمەن سەرىكتەستىك ورناتىپ, جاھاندىق دەڭگەيدە ۇلكەن جوبالاردى ىسكە اسىرىپ جاتتى, ءدال وسى كەزەڭدە تالداۋشى رەتىندە كومانداعا قوسىلدىم. مۇندا ستۋدەنتتىك قابىلداۋدى بولجاۋ, قارجىلىق مودەلدەر قۇرۋ جانە ءار سەرىكتەستىكتىڭ ۇزاقمەرزىمدى تابىسىنا اسەر ەتەتىن فاكتورلاردى باعالاۋ جۇمىستارىمەن اينالىستىم. وسىلايشا, شەتەلدىڭ مەن-مەن دەگەن ۋنيۆەرسيتەتتەرىنەن اياقتانعاندارمەن يىق تىرەسە ەڭبەك ەتىپ, سالادا العان ءبىلىمىمدى, ستاتيستيكالىق بىلىگىمدى جانە اناليتيكالىق قابىلەتىمدى جاڭا دەڭگەيگە كوتەردىم. بۇل قادام مەن ءۇشىن تەك گەوگرافيالىق تۇرعىدا ورىن اۋىستىرۋ ەمەس, ىشكى ەرىك-جىگەرىمدى شىڭداعان, كاسىبي دامۋ جولىمدا ماڭىزدى بەلەس بولدى دەپ ايتا الامىن.
– «Bloomberg» كورپوراتسياسىنا قالاي كەلدىڭىز؟
– «Bloomberg» كومپانياسىنا شاقىرىلۋىما INTO-داعى ءىرى جوبالارمەن اينالىسۋىم, ۇلتتىق دەڭگەيدەگى كونفەرەنتسيالاردا جاساعان باياندامالارىم, جاريالانعان زەرتتەۋلەرىم مەن ارىپتەستەرىمنىڭ كاسىبي ۇسىنىستارى اسەر ەتتى. بۇل كومپانياعا مەن بار-جوعى ءبىر-اق رەت ءوتىنىش بەردىم. ىرىكتەۋ ۇدەرىسى وڭاي بولعان جوق: سۇحبات شامامەن بەس ايعا سوزىلدى. ءاربىر كەزەڭدە ۇمىتكەردىڭ اناليتيكالىق ويلاۋ قابىلەتى, ءونىمدى تەرەڭ ءتۇسىنۋى, ماسەلەنى شەشۋ لوگيكاسى, كوممۋنيكاتسيالىق داعدىلارى مەن ستراتەگيالىق كوزقاراسى جان-جاقتى باعالاندى. بۇل تەك تەحنيكالىق ءبىلىمدى ەمەس, كەڭ اۋقىمدى ويلاي الۋدى تالاپ ەتەتىن ۇدەرىس بولدى. مەنىڭشە, وسى كەزەڭدەردە مەنىڭ اناليتيكالىق يكەمدىلىگىم مەن كۇردەلى ماسەلەلەردى جۇيەلى تۇردە تالداي الۋ قابىلەتىم «Bloomberg» كومانداسىنىڭ نازارىن اۋداردى. بۇگىندە «Bloomberg»-تە ەڭبەك ەتىپ جۇرگەن قازاق قىزدارىنىڭ ءبىرى بولۋ – مەن ءۇشىن تەك كاسىبي جەتىستىك ەمەس, سونىمەن قاتار ەل نامىسىن حالىقارالىق دەڭگەيدە تانىتۋدىڭ ءبىر جولى. ارينە, جاۋاپكەرشىلىك بار, سونىڭ وزىندە ەرەكشە ماقتانىش سەزىمى باسىم.
– قازىرگى اتقارىپ جۇرگەن قىزمەتىڭىز تۋرالى تولىعىراق ايتىپ بەرسەڭىز.
– قازىرگى تاڭدا «Bloomberg Law» بولىمىندە Senior Data Analytics Manager قىزمەتىن اتقارامىن. نەگىزگى مىندەتىم – زاڭ سالاسىنداعى تۇتىنۋشىلاردىڭ مىنەز-قۇلقىن تەرەڭ تالداۋ. اتاپ ايتقاندا, پايدالانۋشىلاردىڭ پلاتفورمانى قالاي قولداناتىنىن, ءونىم ىشىندە قانداي كەدەرگىلەرگە تاپ بولاتىنىن, قاي تۇستا توقتايتىنىن, نەنى ىزدەپ, قانداي فۋنكتسيالارمەن جۇمىس ىستەگىسى كەلەتىنىن زەرتتەيمىن. بۇل زەرتتەۋلەر ءونىمدى جەتىلدىرۋگە جانە كليەنت تاجىريبەسىن جاقسارتۋعا تىكەلەي اسەر ەتەدى.
بۇل كومپانيادا ءبىر كوماندانىڭ ىشىندە زاڭگەرلەر, ينجەنەرلەر, داتا-عالىمدار مەن UX زەرتتەۋشىلەر سياقتى ءتۇرلى سالانىڭ ماماندارىمەن بىرگە جۇمىس ىستەيمىن. ارقايسىنىڭ ويلاۋ جۇيەسى مەن ماسەلەگە كوزقاراسى بولەك. وسىنداي ورتادا ءوز ورنىڭدى تابۋ مەن ءۇشىن ۇلكەن مەكتەپ بولدى. بۇل تاجىريبە كاسىبي كوكجيەگىمدى كەڭەيتىپ قانا قويماي, ادامدارمەن قارىم-قاتىناس قۇرۋ قانشالىقتى تەرەڭ ءارى ماڭىزدى قابىلەت ەكەنىن تۇسىنۋگە جول اشتى.
نەگىزىنەن, داتا اناليتيكا سالاسىنا بەت بۇرعان ۋاقىتتا شامامەن 3–5 ايدى ونلاين پلاتفورمالار ارقىلى SQL, Python, Power BI, لوگتاۋ جۇيەلەرى, A/B testing سياقتى نەگىزگى قۇرالداردى مەڭگەردىم. بىراق «Bloomberg»-تە جۇمىس ىستەگەن جىلدارى دەرەكتەرمەن جۇمىس ىستەۋدىڭ ەڭ كۇردەلى دەڭگەيلەرىن تاجىريبە جۇزىندە تەرەڭىرەك يگەردىم.
– الداعى 5–10 جىلدا جاس ماماندار ءۇشىن ەڭ ماڭىزدى داعدى قانداي بولادى؟ قاي ماماندىقتارعا قازىردەن باستاپ ەرەكشە ءمان بەرگەن ءجون؟
– ەڭ ماڭىزدى داعدى – ۇيرەنە ءبىلۋ مەن تەز بەيىمدەلۋ قابىلەتى. تەحنولوگيالار وتە جىلدام وزگەرىپ جاتىر: بۇگىن وزەكتى قۇرالدار بىرنەشە جىلدان كەيىن ەسكىرىپ قالۋى مۇمكىن. سوندىقتان ناقتى ءبىر باعدارلامالاۋ ءتىلىن عانا مەڭگەرۋ جەتكىلىكسىز, ەڭ باستىسى – دەرەكتەردىڭ قالاي جۇمىس ىستەيتىنىن, مودەلدەردىڭ قالاي قۇرىلاتىنىن, تالداۋدىڭ ساپاسىن قالاي باعالاۋ كەرەكتىگىن ءتۇسىنۋ.
ەكىنشى ماڭىزدى قابىلەت – ناقتى باعىت بويىنشا ماماندىق تاڭداۋ. تەحنولوگيا مەن بيزنەستى, دەرەكتەر مەن ديزايندى, جاساندى ينتەللەكت پەن ەتيكانى بايلانىستىرا الاتىن ماماندار ەڭ جوعارى سۇرانىسقا يە بولادى.
ءۇشىنشى داعدى – كوممۋنيكاتسيا. قانشالىقتى مىقتى تەحنيكالىق مامان بولساڭ دا, ءوز ويىڭدى تۇسىندىرە, قورعاي, ناتيجەنى ۇسىنا الماساڭ, ىقپالىڭ شەكتەۋلى بولادى. ءدال قازىرگى ترەندپەن كەڭەس بەرەتىن ماماندىقتار قاتارىندا – Data Science پەن AI/ML, Product Management, UX Research, Cybersecurity, AI Ethics پەن Governance. ەڭ باستىسى – ترەندتىڭ سوڭىنان سوقىر ەرۋ ەمەس, شىن مانىندە قىزىقتىراتىن باعىتتى تاڭداۋ. سەبەبى قىزىعۋشىلىق بولماسا, وزگەرىس قارقىنىنا توتەپ بەرۋ قيىن.
– اڭگىمەڭىزگە راحمەت.
اڭگىمەلەسكەن –
زەيىن ەرعالي,
«Egemen Qazaqstan»