«Digital Business» پەن «Astana Hub» بىرلەسكەن «ورتالىق ازيانىڭ 100 ستارتاپ تاريحى» جوباسى اياسىندا جاڭا بۋىن كومپانيالار تانىستىرىلىپ جاتىر. سونداعى ەرەكشە كوزگە تۇسكەن جوبانىڭ ءبىرى – «MacDent». بۇل – ستوماتولوگيالىق كلينيكالارعا ارنالعان اناليتيكا, پاتسيەنتتەرمەن جۇمىس جانە تولىققاندى باسقارۋ جۇيەسىن ۇسىناتىن پلاتفورما.
جوبانى وسكەمەن قالاسىنىڭ تۋماسى, IT-سالاسىندا تاجىريبەسى بار ماقپال وراققىزى دەكرەت دەمالىسى كەزىندە باستاعان.
ستوماتولوگياداعى كۇندەلىكتى جۇمىس كوبىنە قولمەن جۇرگىزىلەتىن كەستەلەرگە, ءارتۇرلى مەسسەندجەردەگى شاشىراڭقى وتىنىمدەرگە جانە تولىق جۇيەلەنبەگەن مەديتسينالىق كارتالارعا تاۋەلدى. مۇنداي شاشىراڭقىلىق كلينيكا تابىسىنا, پاتسيەنتتىڭ قايتا كەلۋىنە جانە ماركەتينگ تيىمدىلىگىنە تىكەلەي اسەر ەتەدى. «MacDent» وسى ولقىلىقتىڭ ورنىن ءبىر جۇيەدەن باسقارىلاتىن تسيفرلىق ەكوجۇيە ارقىلى تولتىرۋدى ماقسات ەتكەن.
پلاتفورما ارقىلى پاتسيەنت ونلاين جازىلا الادى, ۇسىنىلعان ەم-شارالار باقىلاۋدا بولادى, كەلەسى قابىلداۋدى ەسكە سالۋ فۋنكتسياسى ىسكە قوسىلعان. سونداي-اق كلينيكا يەسى الەۋمەتتىك جەلىدەگى جارنامانىڭ تيىمدىلىگىن, قارجىلىق كورسەتكىشتەردى جانە پاتسيەنتتەردىڭ پىكىرىن تالداي الادى.
«MacDent» «Astana Hub» اكسەلەراتسياسىنا يدەيا تۇرىندە كەلىپ, قىسقا ۋاقىت ىشىندە MVP جاسادى. تۇسىندىرە كەتەيىك, MVP (Minimum Viable Product) – جوبانىڭ نارىققا شىعۋعا دايىن ەڭ العاشقى, ەڭ ىقشام نۇسقاسى. ياعني ستارتاپ كومانداسى يدەيانىڭ ومىرشەڭدىگىن تەكسەرۋ ءۇشىن ەڭ قاجەتتى فۋنكتسيالاردى عانا جيناقتاپ, ونى ناقتى كليەنتتەرگە كورسەتەدى. وسى ارقىلى ستوماتولوگيالىق كلينيكالاردان العاشقى كەرى بايلانىس الىپ, ءونىمنىڭ قاي تۇسىن جەتىلدىرۋ كەرەگىن انىقتايدى.
اتالعان پلاتفورمانىڭ يگىلىگىن ەلىمىزدە 1 800-دەن استام ستوماتولوگيا كورىپ وتىر. ستارتاپ سونىمەن قاتار وزبەكستان, قىرعىزستان جانە رەسەي نارىعىندا دا بار. جوبا جەتەكشىسى «ىشكى نارىقتا 25% ۇلەسكە جەتەمىز» دەگەن ماقسات قويىپ وتىر. ماقپال وراققىزىنىڭ ايتۋىنشا, ستوماتولوگيادا ەڭ قيىن ماسەلە – دەرەكتىڭ ءار جەردە شاشىراپ ءجۇرۋى.
«پاتسيەنتتىڭ جازىلۋى ءبىر جەردە, ەم جوسپارى ەكىنشى جەردە, تولەم مەن جارناما ەسەبى ءۇشىنشى جەردە قالىپ قويادى. سونىڭ سالدارىنان كلينيكا ۋاقىت تا جوعالتادى, اقشا دا جوعالتادى, ەڭ باستىسى – پاتسيەنتپەن بايلانىس السىرەيدى. ال ءبىزدىڭ ستارتاپ ماقساتى – وسى ۇدەرىستى ءبىر جۇيەگە جيناپ, دارىگەر مەن اكىمشىگە كۇندەلىكتى جۇمىستى جەڭىلدەتۋ, ال كلينيكا يەسىنە ناقتى تسيفر ارقىلى باسقارۋعا مۇمكىندىك بەرۋ», دەيدى ول.
بۇگىندە «MacDent» ستوماتولوگيا سالاسىنداعى مىڭداعان كلينيكانىڭ جۇمىسىن ءبىر ارناعا توعىستىرىپ, اكىمشىلىك ۇدەرىستى جەڭىلدەتكەن بىردەن-ءبىر ستارتاپ. سوندىقتان «MacDent» سەكىلدى تسيفرلىق شەشىمدەر ستوماتولوگياداعى «قاعازباستىلىقتى» قىسقارتىپ قانا قويماي, كلينيكانى دەرەككە سۇيەنىپ باسقارۋ مادەنيەتىن قالىپتاستىرىپ, سالانىڭ جاڭا دامۋ دەڭگەيىنە جول اشپاق.