الماتىدا «جاڭا جىل ەلىمىزدى ارالاپ كەلەدى» اتتى ءداستۇرلى جاڭا جىلدىق پرەزيدەنت شىرشاسى سالتاناتتى تۇردە ۇيىمداستىرىلدى. مەرەكەلىك ءىس-شاراعا الماتى اكىمى دارحان ساتىبالدى قاتىستى, دەپ جازادى Egemen.kz.
مەرەكەگە 300 بالا شاقىرىلدى. ولاردىڭ قاتارىندا بالالار ءۇيىنىڭ تاربيەلەنۋشىلەرى مەن اتا-اناسىنىڭ قامقورلىعىنسىز قالعان بالالار, از قامتىلعان جانە كوپبالالى وتباسىلاردان شىققان بۇلدىرشىندەر, ەرەكشە ءبىلىم بەرۋ قاجەتتىلىگى بار بالالار, سونداي-اق وقۋ, سپورت جانە شىعارماشىلىق سالاسىندا جەتىستىككە جەتكەن دارىندى وقۋشىلار بار.
پرەزيدەنت قاسىم-جومارت توقاەۆتىڭ اتىنان الماتى اكىمى دارحان ساتىبالدى جاس قوناقتاردى كەلە جاتقان جاڭا جىلمەن قۇتتىقتاپ, زور دەنساۋلىق, باق-بەرەكە, وقۋدا تابىس جانە ارماندارىنىڭ ورىندالۋىن تىلەدى.
بالالار ءۇشىن ارتيستەردىڭ, شىعارماشىلىق ۇجىمداردىڭ, ەرتەگى كەيىپكەرلەرى مەن انيماتورلاردىڭ قاتىسۋىمەن مازمۇندى مەرەكەلىك باعدارلاما ۇيىمداستىرىلدى. ءىس-شارا سوڭىندا بارلىق قاتىسۋشىلارعا جاڭا جىلدىق سىيلىق تابىستالدى.
جاڭا جىلدىق پرەزيدەنت شىرشاسى — جىلدان جىلعا جالعاسىپ كەلە جاتقان يگى ءداستۇر. بۇل مەرەكە بالالارعا قۋانىش سىيلاپ, ولاردىڭ جان-جاقتى قولداۋ كورىپ جاتقانىن سەزىندىرۋگە, سونداي-اق وسكەلەڭ ۇرپاققا دەگەن قامقورلىق پەن ايرىقشا نازاردىڭ ماڭىزىن ايقىنداي تۇسەدى.