مەملەكەت باسشىسى جامبىل وبلىسىنىڭ جۇرتشىلىعىمەن كەزدەستى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«جامبىل وبلىسىنىڭ احۋالى اكىم ەربول قاراشوكەەۆتىڭ بايانداماسىنا قاراعاندا جامان ەمەس. بىراق وبلىستىڭ الدىندا ماڭىزدى, وزەكتى ماقساتتار تۇر. بۇل ماقساتتاردى تولىعىمەن ورىنداۋ – اكىمنىڭ جانە بۇكىل قىزمەتشىلەردىڭ ەڭ نەگىزگى مىندەتى. وبلىستىڭ ەكونوميكاسىن كۇشەيتۋ كەرەك. وعان قاجەتتى جاعداي دا, مۇمكىندىك تە بار. بەلسەندى جۇمىس باستالدى», دەدى پرەزيدەنت.
مەملەكەت باسشىسى جۇمىستىڭ قارقىنىن باسەڭدەتۋگە بولمايتىنىن تىلگە تيەك ەتتى.
«تاراز – ۇلتىمىزدىڭ اسقاق رۋحى, باي مادەنيەتى, ەلدىك مۇراتى جانە ەرلىك ءداستۇرى توعىسقان قالا. بۇل – ەجەلگى وركەنيەتتىڭ ءىزى قالعان جەر. شەجىرەلى شاھاردىڭ جۇرتىمىز ءۇشىن ورنى ەرەكشە. ءبىز تارازدىڭ ەكى مىڭ جىلدىق تاريحىن ماقتان ەتەمىز. اۋليەاتا جەرىندە مەملەكەتتىگىمىزدىڭ تۇعىرىن نىعايتقان تالاي تاريحي وقيعالار بولدى. قازاق حاندىعى وسى ايماقتا قۇرىلعان. كونە قالا توعىز جولدىڭ تورابىندا تۇر. ەجەلگى ۇلى جىبەك جولى قارت قاراتاۋدىڭ ەتەگىن باسىپ وتكەن. ايگىلى كەرۋەن جولى جاڭا زاماندا جاڭا قارقىنمەن دامىپ كەلەدى. «باتىس ەۋروپا – باتىس قىتاي» كولىك ءدالىزى جامبىل جەرى ارقىلى ءوتىپ جاتىر. سونىڭ ارقاسىندا ايماقتىڭ ستراتەگيالىق ماڭىزى ارتۋدا. جامبىل وبلىسى كۇن وتكەن سايىن وركەندەپ كەلەدى», دەدى قاسىم-جومارت توقاەۆ.
بۇعان دەيىن پرەزيدەنتكە جامبىل وبلىسىنا ينۆەستيتسيا تارتۋ جانە اگروونەركاسىپ كەشەنىن دامىتۋ جوبالارى تانىستىرىلعانىن جازعان ەدىك. بيىل جامبىل وبلىسىنا 599,2 ميلليارد تەڭگە ينۆەستيتسيا تارتىلعان.