الماتىدا «ۋاقىت جاڭعىرىعى» اتتى كورمە اشىلدى

ۇزدىك قىلقالام شەبەرلەرىن ءبىر الاڭدا توعىستىرعان كورمە قازاق بەينەلەۋ ونەرىنىڭ كورنەكتى تۇلعالارى – حاكىمجان ناۋرىزباەۆ پەن مولداحمەت كەنباەۆتىڭ 100 جىلدىعىنا, نيكولاي حلۋدوۆتىڭ 175 جىلدىعىنا, ەۆگەني سيدوركيننىڭ 95 جىلدىعىنا, ەركىن مەرگەنوۆ پەن تولەگەن دوسماعامبەتوۆتىڭ 85 جىلدىق مەرەيتويلارىنا ارنالىپ وتىر.

ۇلتتىق كوركەمونەر مەكتەبىنىڭ قالىپتاسۋى مەن دامۋىنا زور ۇلەس قوسقان حاكىمجان ناۋرىزباەۆ, مولداحمەت كەنباەۆ, نيكولاي حلۋدوۆ, ەۆگەني سيدوركين, ەركىن مەرگەنوۆ جانە تولەگەن دوسماعامبەتوۆ تۆورچەستۆولارى قازاق بەينەلەۋ ونەرىنىڭ تاريحىندا وشپەس ءىز قالدىردى. ولاردىڭ قولتاڭبالارى كاسىبي قازاق بەينەلەۋ ونەرىنىڭ العاشقى بۋىنى قالىپتاستىرعان ءمۇسىن جانە گرافيكا داستۇرلەرىن جالعاستىرا وتىرىپ, زاماناۋي كوركەمدىك-ەستەتيكالىق كوزقاراسپەن جانە جاڭا تاقىرىپتىق مازمۇنمەن بايىتا تۇسەدى.

ەكسپوزيتسياعا 140-تان استام كەسكىندەمە, گرافيكا, ءمۇسىن, قولونەر سالاسى بويىنشا قازاقستاندىق سۋرەتشىلەردىڭ شىعارماشىلىق تۋىندىلارى ۇسىنىلدى. كورەرمەن 40-تان استام تۋىندىنى ونلاين فورماتتا تاماشالادى. رەسپۋبليكالىق كورمەگە ەلىمىزدىڭ بارلىق وڭىرلەرىنەن 135 سۋرەتشى قاتىستى.

«ۇسىنىلعان تۋىندىلار سۋرەتشىلەردىڭ پلاستيكالىق-بەينەلىك مانەرىندەگى تىڭ جاڭاشىل ادىستەردى, تاڭدالعان تاقىرىپتاردىڭ ماعىنالىق مازمۇنىن, ۇلتتىق رۋحتىڭ لەبىن قازىرگى زامانعى كوركەم بەينەلەر ارقىلى اشا تۇسەدى. كورەرمەن ءتۇرلى جانردا ءار قىرىنان كورىنىس تاپقان, كومپوزيتسيالىق جانە كوللوريتتىك شەشىمدە ورىن العان, تەرەڭ ويمەن ايقىندالعان ديناميكالىق ۇندەستىك پەن ءوزارا تۇتاستىقتى بىرىكتىرەتىن ۇيلەسىمدى تۋىندىلاردىڭ كۋاسى بولدى. «ۋاقىت جاڭعىرىعى» اتتى كورمە ۇلتتىق بەينەلەۋ ونەرىنىڭ ساباقتاستىعىن, شىعارماشىلىق ءداستۇردىڭ دامۋىن جانە قازىرگى زامانعى كوركەمدىك ءۇردىستىڭ جاڭا قىرلارىن تانىتاتىن ماڭىزدى مادەني وقيعا», دەيدى ونەرتانۋشى گۇلنار جۇبانيازوۆا.

الماتى