قاراعاندى وبلىسىنىڭ قۇقىق قورعاۋ ورگاندارى الەۋمەتتىك جەلىلەردە مەكتەپ وقۋشىلارىنا قاتىستى تاراعان سۋىت حاباردى رەسمي تۇردە تەرىسكە شىعاردى. پوليتسيا دەپارتامەنتى جۇرگىزگەن شۇعىل تەكسەرىس ناتيجەسىندە ءبىلىم وشاقتارىنا ءتونىپ تۇرعان ەشقانداي ناقتى قاۋىپ انىقتالعان جوق, دەپ حابارلايدى Egemen.kz.
سوڭعى تاۋلىكتە مەسسەندجەرلەر مەن جەلى قولدانۋشىلارى اراسىندا ۇرەي تۋعىزعان حابارلامالارعا بايلانىستى جەدەل ىزدەستىرۋ شارالارى ۇيىمداستىرىلدى. ءتارتىپ ساقشىلارىنىڭ مالىمەتىنشە, قازىرگى ۋاقىتتا قالانىڭ بارلىق مەكتەپتەرى كۇشەيتىلگەن باقىلاۋعا الىنعان. بالالاردىڭ قاۋىپسىزدىگى ءۇشىن ءبىلىم وردالارىندا پوليتسيا قىزمەتكەرلەرى كەزەكشىلىك اتقارىپ, بارلىق ساقتىق شارالارى بارىنشا قاتاڭداتىلدى.
قازىرگى ۋاقىتتا قۇزىرلى ورگاندار جالعان اقپاراتتى تاراتىپ, جۇرتشىلىقتى دۇرلىكتىرگەن تۇلعالاردى انىقتاۋ ماقساتىندا جەدەل-تەرگەۋ امالدارىن جۇرگىزىپ جاتىر. قوعامدىق تىنىشتىقتى بۇزىپ, نەگىزسىز ۇرەي تۋعىزعاندار زاڭ الدىندا قاتاڭ جاۋاپ بەرەدى.
پوليتسيا دەپارتامەنتى اتا-انالاردى بارىنشا سابىر ساقتاۋعا, ارانداتۋشىلىققا بوي الدىرماي, تەك رەسمي دەرەككوزدەرگە سەنۋگە شاقىرادى. ۆەدومستۆو وكىلدەرى جاعدايدىڭ تولىقتاي باقىلاۋدا ەكەنىن جانە بالالاردىڭ ومىرىنە ەشقانداي قاۋىپ جوق ەكەنىن قاداپ ايتتى.
ايتا كەتەيىك, وسىعان ۇقساس جالعان حابارلامالار بۇعان دەيىن اقتاۋ قالاسى مەن اقتوبە وبلىسىندا دا تاراپ, تۇرعىنداردى الاڭداتقان بولاتىن.