ءماجىلىس دەپۋتاتى ەرلان سايروۆ ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولداپ, ەلدەگى «رۋشىلدىق» پسيحولوگياسىنىڭ ورشۋىنە بايلانىستى دابىل قاقتى. دەپۋتات ۇلتتىق بىرلىككە قاۋىپ توندىرەتىن كونتەنتتەرگە تىيىم سالۋدى تالاپ ەتتى, دەپ حابارلايدى Egemen.kz.
ەرلان سايروۆتىڭ ايتۋىنشا, قازاقستان 30 جىل ىشىندە ءوزىن «مەملەكەت قۇرۋعا قابىلەتتى ۇلت» رەتىندە دالەلدەگەنىمەن, مەملەكەتتىلىكتى ساقتاپ تۇرۋ ءار ازاماتتىڭ ساناسىنداعى كۇرەستەن باستالادى. سوڭعى كەزدەرى الەۋمەتتىك جەلىلەردە, ونەردە جانە كاسىپكەرلىكتە رۋلىق ءبولىنۋدى ناسيحاتتايتىن تەندەنتسيالار بەلەڭ العان.
«مەملەكەتتى قۇرۋدان گورى, مەملەكەتتىلىكتى ۇستاپ تۇرۋ قيىن. مەملەكەتتىلىكتى ۇستاپ تۇرۋ ءۇشىن كۇرەس ءاربىر ازاماتتىڭ ساناسىنان باستالادى. ءبىزدىڭ ارقايسىمىز جالپى مەملەكەتتىك «تاۋەلسىز قازاقستان» جانە جالپىۇلتتىق «مەن قازاقپىن» پسيحولوگياسىن بويىمىزعا سىڭىرسەك قانا تاۋەلسىز قازاقستاندى ساقتاپ قالامىز. رۋلىق سانا حالقىمىزدىڭ بىرلىگىنە سىنا سالىپ, ۇلتتىق بىرلىكتى شاشىراتىپ جىبەرۋگە قابىلەتتى قۇبىلىس. سوڭعى كەزدەرى الەۋمەتتىك جەلىدە, ونەردە رۋشىلدىق تەندەنتسيا مۇلدەمگە ءورشىپ كەتتى. بۇل مەملەكەتىمىز ءۇشىن تەكەلەي قاۋىپ! اتالارىمىز ء«ۇي ارتىندا كىسى بار» دەپ ءجيى قايتالايتىن. بۇل ءسوزدىڭ ءمانىسى قازاقتىڭ ءجۇرىس-تۇرىسىن, ءوزارا قارىم-قاتىناسىن سىرتتان باقىلاپ, بارلاپ وتىراتىن كۇشتەر كوپ. ولار ءبىزدىڭ ىشىمىزدەگى وسال جەرلەردى ىزدەپ, سونى قوزدىرۋعا تىرىسىپ وتىرادى. سوندىقتان رۋشىلدىق تەندەنتسيا قوعام ىشىندە مەملەكەتتىك ويلاۋ قابىلەتىن كورروزياعا ۇشىراتىپ, مەملەكەتتىلىكتى شاشىراتۋعا اكەلەتىن قاۋىپتى قۇبىلىس», دەدى دەپۋتات.
دەپۋتاتتىق ساۋالدا جەكەلەگەن كونتەنت وندىرۋشىلەر مەن كاسىپكەرلەردىڭ رۋ اتاۋلارىن برەند رەتىندە پايدالانىپ, كيىم-كەشەككە جازىپ ساتۋى, سونداي-اق كينو يندۋسترياسىنداعى كەلەڭسىزدىكتەر قاتاڭ سىنعا الىندى. اسىرەسە رۋلاردى سالىستىراتىن, كەمسىتەتىن جانە قازاقستان كارتاسىن ءۇش جۇزگە ءبولىپ كورسەتكەن جاڭا ءفيلمنىڭ پروكاتقا شىعۋى «باسسىزدىق» دەپ باعالاندى.
بۇل رەتتە ە. سايروۆ ۇكىمەتكە كەلەسى ناقتى شارالاردى قابىلداۋدى ۇسىندى:
ارنايى كوميسسيا قۇرۋ: اقپارات جانە مادەنيەت مينيسترلىگى جانىنان كينوپروكاتقا شىعاتىن وتاندىق فيلمدەردىڭ مازمۇنىن الدىن الا كوركەمدىك-ەستەتيكالىق, يدەولوگيالىق جانە ۇلتتىق بىرلىك تۇرعىسىنان ساراپتايتىن تۇراقتى كوميسسيا جۇمىسىن ىسكە اسىرۋ. ناقتى توسقاۋىل قويۋ: «ۇلتتىق كود» پەن «مادەني ەرەكشەلىك» ۇعىمىن جەلەۋ ەتىپ, قوعامدى بولشەكتەۋگە, رۋشىلدىق پەن جىكشىلدىكتى ناسيحاتتايتىن ارەكەتتەرگە زاڭ جۇزىندە توسقاۋىل قويۋ. يدەولوگيالىق كونتەنتتى ارتتىرۋ: مادەني سالادا جانە الەۋمەتتىك جەلىدە قازاقستان حالقىنىڭ تۇتاستىعىن دارىپتەيتىن, جالپىۇلتتىق ء«بىز قازاقپىز» دەگەن ماعىناداعى مازمۇندى كوبەيتۋگە كىرىسۋ.سىنعا قالعان «رۋىڭ كىم» ءفيلمى پروكاتتان الىندى
ەرلان سايروۆ ۇلت مۇددەسى مەن مەملەكەت تۇتاستىعى جولىندا كەز كەلگەن سىنعا دايىن ەكەنىن جەتكىزدى. ول ترايباليزم ماسەلەسىندە ەشقانداي كومپروميسس بولماۋى ءتيىس ەكەنىن جانە ارانداتۋشىلىق ماتەريالدارعا تولىقتاي تىيىم سالىنۋى كەرەكتىگىن قاداپ ايتتى.
ەسكە سالايىق,ء ماجىلىستىڭ جالپى وتىرىسىندا دەپۋتات ەرلان سايروۆ ۇلكەن ەكرانعا شىققان «رۋىڭ كىم» فيلمىنىڭ قاجەتسىز تاقىرىپتى ارقاۋ ەتكەنىنە نازار اۋدارعان ەدى.