سالا وكىلدەرىنىڭ ەسەبىنشە, جالپى شىعىن كولەمى ميللياردتاعان گونكونگ دوللارىن قۇراۋى مۇمكىن. تەك قانا ورتەنگەن پاتەرلەردىڭ نارىقتىق قۇنىنىڭ ءوزى شامامەن 5 ملرد گونكونگ دوللارىنا باعالانىپ وتىر, بۇل – 642,3 ملن اقش دوللارىنا تەڭ.
الايدا, بۇل سوماعا ءالى دە جاناما ەكونوميكالىق شىعىندار ەنگىزىلمەگەن. ياعني قايعىلى وقيعادان كەيىن قالادا جىل سايىنعى «Hong Kong Cyclothon» ۆەلومارافونى جانە 50 مىڭ كورەرمەنگە ارنالعان جاڭا Kai Tak ستاديونىنداعى ءانشى كارەن موكتىڭ العاشقى كونتسەرتى كەيىنگە قالدىرىلعان.
«Natixis Corporate and Investment Bank» ەكونوميسى گەري نگ چحەك ياننىڭ پىكىرىنشە, ءىس-شارالار يندۋسترياسىنداعى ءۇش اپتالىق ءۇزىلىس شامامەن 265 ملن گونكونگ دوللارى (34 ملن اقش دوللارى) كولەمىندە قوسىمشا شىعىنعا اكەلۋى مۇمكىن.
گونكونگ ۇكىمەتى زارداپ شەككەن تۇرعىندارعا قارجىلاي كومەك پەن وتەماقى تولەۋ تەتىكتەرىن ازىرلەپ جاتىر. قازىرگى ۋاقىتتا تۇرعىندارعا كومەك رەتىندە 3,7 ملرد گونكونگ دوللارى (474 ملن اقش دوللارى) كولەمىندە قايىرىمدىلىق قاراجاتى جينالدى.
ەسكە سالساق, 26 جەلتوقسان كۇنى ءورت تاي پو اۋدانىنداعى سەگىز عيماراتتان تۇراتىن «Wang Fuk Court» تۇرعىن ءۇي كەشەنىنەن شىقتى. تۇرعىن ءۇي كەشەنىندە 2 مىڭ پاتەر بولعان, وندا 4600 ادام تۇرىپ جاتقان. جەرگىلىكتى بيلىك جالپى ءورت قۇرباندارىنىڭ سانى 159-عا جەتكەنىن مالىمدەدى.