«Grammy» سىيلىعىنىڭ رەسمي سايتىندا جانە YouTube ارناسىندا الەمگە ايگىلى ءانشى ديماش قۇدايبەرگەننىڭ «Fire» اتتى اۆتورلىق كومپوزيتسياسىن ورىنداعان جاڭا بەينەجازباسىنىڭ پرەمەراسى ءوتتى, دەپ حابارلايدى Egemen.kz.
وسىعان دەيىن قازان ايىندا ديماش نيۋ-يوركتەگى ايگىلى Madison Square Garden الاڭىندا كونتسەرت بەرىپ, قازاق ونەرىن حالىقارالىق دەڭگەيدە تانىتىپ, ۇلكەن جەتىستىككە جەتكەن ەدى. سول تابىستى ونەر كورسەتۋدەن كەيىن ول Grammy پلاتفورماسىمەن جانە امەريكالىق ۇلتتىق دىبىس جازۋ ونەرى مەن عىلىمى اكادەمياسىمەن شىعارماشىلىق بايلانىس ورناتقان.
«Global Spin» جوباسى 2021 جىلدان بەرى الەم مۋزىكاسىن قولداپ, ءار ەلدىڭ مادەني بولمىسىن كورسەتۋدى ماقسات ەتەدى. جوباعا بۇعان دەيىن K-pop سۋپەر جۇلدىزدارى, افريكالىق حيپ-حوپ وكىلدەرى, ەۋروپالىق فولك ورىنداۋشىلارى سياقتى ءتۇرلى باعىتتاعى مۋزىكانتتار قاتىسقان. ءار شىعارىلىم تەك ءارتىستىڭ ونەرىن عانا ەمەس, ونىڭ ەلىن, مادەنيەتىن الەمگە تانىستىرۋعا باعىتتالعان ەكسكليۋزيۆتى تىكەلەي ورىنداۋدان تۇرادى.
دىبىس جازۋ اكادەمياسى اقش پەن الەمدەگى ەڭ بەدەلدى مۋزىكالىق ۇيىمداردىڭ ءبىرى. اكادەميا ورىنداۋشىلار مەن پروديۋسەرلەردىڭ شىعارماشىلىعىن قولداپ, جىل سايىن الەمگە تانىمال Grammy ماراپاتىن ۇيىمداستىرادى.
بۇعان دەيىن ديماش قۇدايبەرگەن مىسىرداعى گيزا قالاسىندا «The Pyramids Echo» فەستيۆالى اياسىندا العاشقى جەكە كونتسەرتىن وتكىزگەن ەدى.