«Silk way star»: جۇلدىزى جانعان ميشەل

ەسكە سالساق, «Silk Way Star» جوباسى بيىل قىتاي مەن قازاقستان اراسىنداعى كەلىسىم نەگىزىندە العاش رەت ۇيىمداستىرىلىپ وتىر. ونەر دوداسىن كەلەسى جىلى قىتاي تاراپى وتكىزەدى. بۇل تۋرالى وكق الاڭىندا «Jibek joly» تەلەارناسىنىڭ باسقارۋشى ديرەكتورى ەركەجان كۇنتۋعان مالىمدەدى. ول الداعى ۋاقىتتا جوبانى جەڭىمپاز ەلدە وتكىزۋ تۋرالى ۇسىنىستار تۇسسە, بۇل باستامانى ەكى تاراپ تا قولداۋعا دايىن ەكەنىن ايتتى.

«جوبا 12 ەلدىڭ اياسىندا شەكتەلمەيدى. ويتكەنى كوپتەگەن ازيا مەملەكەتى بار. ازيادا مادەني تۇرعىدا بىرىكتىرەتىن ورتاق الاڭ جوق. ماسەلەن, بيىل قاتىسپاعان جاپونيانىڭ ءوزى سونىڭ ءبىر مىسالى. ولاردى دا قوسا الساق, ەل سانى ايتارلىقتاي ارتادى. سونىمەن قاتار اراب ەلدەرى دە قىزىعۋشىلىق ءبىلدىرىپ وتىر. كۇنى كەشە فينالعا كۋۆەيتتىڭ ەلشىسى قاتىستى. بۇل باستاماسى عانا, جوبانىڭ دەڭگەيى الداعى جىلدارى وسەدى», دەدى ەركەجان كۇنتۋعان.

رەسمي ءبولىم مەملەكەت باسشىسى قاسىم-جومارت توقاەۆتىڭ قۇتتىقتاۋىمەن اشىلدى. ونى مەملەكەتتىك كەڭەسشى ەرلان قارين وقىدى.

مەملەكەت باسشىسى قۇتتىقتاۋ سوزىندە Silk Way Star – ازيا ەلدەرى اراسىنداعى رۋحاني ءوزارا ءىس-قيمىلدى دامىتۋعا جانە حالىقتار اراسىنداعى دوستىقتى نىعايتۋعا باعىتتالعان بىرەگەي باستاما ەكەنى باسا ايتىلدى.

ايتا كەتەيىك, فينالدا مالايزيا, گرۋزيا, قىتاي, ارمەنيا, موڭعوليا, وزبەكستان, قازاق­ستان وكىلدەرى ونەر كورسەتتى. ولاردىڭ ارقايسىسى شىعارمانى انا تىلىندە ورىنداپ, ءوز حالقىنىڭ سالت-ءداستۇرى, ءارتۇرلى ءستيلى, مادەني كودتارى ارقىلى ساحنانى ساياحات الاڭىنا اينالدىردى.

جوبا جەڭىمپازى ميشەل دجوزەف ءباسپاسوز جيىنىندا وزىنە قولداۋ بىلدىرگەن بارشا كورەرمەنگە العىس ايتىپ, تولقۋلى ساتىمەن ءبولىستى.

«ەڭ الدىمەن, ماعان داۋىس بەرىپ, مەنى قولداعان جاندارعا العىسىمدى بىلدىرەمىن. اسىرەسە قازاق ەلىنە كوپ راحمەت. نەگىزى قازاقستان مەن موڭعوليا ءبىر-بىرىنە جات ەمەس. ەكى ەلدىڭ تاريحى مەن مادەنيەتى ۇقساس باۋىرلاس ەل دەپ نىق ايتۋعا بولادى», دەدى ميشەل دجوزەف.

سونداي-اق ول قازاقستاندى جاتسىنبايتىنىن جانە قازاق تىلىندە ءان شىرقاۋعا ىقىلاستى ەكەنىن ايتتى. ءتىپتى بايقاۋدا وزىمەن قاتار ونەر كورسەتكەن قازاقستاندىق قاتىسۋشىمەن بىرىگىپ, جاڭا تۋىندىلاردى شىعارۋعا نيەتى بار ەكەن.

«ونەر دوداسى قازاقستاندا وتكەن سوڭ وسى ەلدە مەنىڭ قولداۋشىلارىم پايدا بولدى. قازاقتىڭ ءتىلى مەن مادەنيەتى وتە باي. بولاشاقتا وسى ءتىلدى تولىق مەڭگەرىپ, ءان شىرقاۋ ويىمدا بار», دەدى ول.

ەسكە سالساق, ميشەل دجوزەف ءداستۇرلى ۇرتىن دۋن ءان ماقامىن زاماناۋي جانرلارمەن, سونىڭ ىشىندە پوپ, R&B جانە فانكپەن ۇيلەستىرە ءبىلدى. ول موڭعول, اعىلشىن تىلدەرىندە ءان شىرقايدى.

ايتا كەتەيىك, «Silk Way Star» مەگاجوباسى ادىلدىگىمەن ەستە قالدى. وندا ونەرپازداردى باعالاۋ ءتاسىلى اشىق, ياعني داۋىستىڭ 50 پايىزى قازىلار القاسىندا, ال تەڭ جارتىسى كورەرمەنگە تيەسىلى بولدى. انشىلەردى الىس-جاقىن ەلدەردەن 508 مىڭ ادام باعالادى.

«Jibek joly/Silk Way» تەلەارناسىنىڭ باسقارۋشى ديرەكتورى ەركەجان كۇنتۋعاننىڭ ايتۋىنشا, اتالعان ونەر دوداسى بەس مەملەكەتتە تىكەلەي ەفيردە وتكەن. جوبا فينالىن 120 ملن كورەرمەن تاماشالاعان.

«سىزدەر «Jibek joly» تەلەارناسىنان قازاق تىلىندە كورسەڭىزدەر, ءبىزدىڭ «Silk Way» تەلەارناسىندا التى تىلدە تارادى. «ەۋروۆيدەنيە» سەكىلدى كونكۋرستىڭ بارلىعى ءاربىر ەلدە سول ەلدىڭ تىلىندە تاراتىلادى. كوممەنتاتورلار قويىلادى, سولار اۋدارىپ بەرىپ وتىرادى. ءدال وسى جۇمىستى بىزدەر جاسادىق. «Silk Way Star» ارناسىندا تىكەلەي ەفيرىمىزدىڭ سيگنالىن قابىلداپ الىپ جاتقان سىرت ەلدەردىڭ بارلىعى سينحروندى اۋدارما ارقىلى قىرعىز, وزبەك, اعىلشىن, تۇرىك تىلدەرىندە وسى جوبانى كورسەتتى», دەدى تەلەارنا باسشىسى.

الەمنىڭ ەڭ ۇلكەن ساحنالارىن باعىندىرعان ديماش قۇدايبەرگەن شوۋدىڭ دايىندىق دەڭگەيىن جوعارى باعالاپ, «Silk Way Star» جوعارى دەڭگەيدە ۇيىمداستىرىلعانىن, جوبانىڭ اۋقىمى مەن كاسىبيلىگى ەرەكشە ەكەنىن اتاپ ءوتتى.