ەڭبەكشىقازاق اۋدانى تولە بي اۋىلىنداعى «قىران» ءداستۇرلى سايات ورتالىعىنىڭ اشىق الاڭىندا اتاقتى بۇركىتشى ءبايجۇنىس كودەكوۆتىڭ 105 جىلدىعىنا ارنالعان «سونار-2025» حالىقارالىق ءتۋرنيرى ءوتتى. تۋرنيرگە ەلىمىزدىڭ ءار تۇكپىرىنەن كەلگەن 14 كوماندا بويىنشا 88 قۇسبەگى قاتىستى.
قۇسبەگىلەر قاتارىندا جاسوسپىرىمدەردەن باستاپ تاجىريبەلى اۋلەتتىك ساياتشىلارعا دەيىن بار. سونىمەن قاتار موڭعوليا, قىتاي, قىرعىزستان جانە وزبەكستاننان كەلگەن ساياتشىلار دا ءجۇر.
«قىران قۇستارمەن اڭ اۋلاۋ – قازاق حالقىنىڭ تاريحىندا ەرەكشە ورىن الاتىن ونەر. ءبايجۇنىس كودەكوۆتىڭ رۋحى ۇرپاقتاردى بىرىكتىرىپ, جاستاردى بابالار مۇراسىن ۇيرەنۋگە ىنتالاندىرادى. ول – الماتى وبلىسىنداعى جالايىر شورا اتىنداعى بۇركىتشىلەر مەكتەبىنىڭ نەگىزىن قالاۋشىلاردىڭ ءبىرى. ونىڭ ەسىمى ۇلتتىق سپورتتى ساقتاۋ جانە ناسيحاتتاۋمەن تىكەلەي بايلانىستى», دەدى.
ەڭبەكشىقازاق اۋدانى اكىمىنىڭ ورىنباسارى ەربولات سارابەكوۆ.
يۋنەسكو-نىڭ ماتەريالدىق ەمەس مادەني مۇرا تىزىمىنە ەنگەن بۇل ونەر بۇگىندە زاماناۋي سپورت تۇرىنە اينالىپ, دالا مادەنيەتىنىڭ سۇلۋلىعىن جانە بۇركىتشىلەردىڭ شەبەرلىگىن ورتاعا سالىپ وتىر. بۇركىتشى ءبايجۇنىس كودەكوۆتىڭ نەمەرەسى باۋىرجان ء«بىزدىڭ وتباسىمىز ءۇشىن اتامىزدىڭ مۇراسىن قۇرمەتتەپ, ونى ۇلىقتاۋ – ۇلكەن مارتەبە. ونىڭ ەسىمى ءتۇرلى ەلدەن كەلگەن شەبەرلەردى بىرىكتىرىپ, ساياتشىلىق ونەردىڭ جاس بۋىنعا جالعاسۋىنا سەبەپ بولىپ وتىر», دەي كەلىپ, ۇيىمداستىرۋشىلارعا ريزاشىلىعىن ءبىلدىردى.
ال ءتۋرنيردى ۇيىمداستىرۋشى, «قۇسبەگىلىك» فەدەراتسياسىنىڭ ۆيتسە-پرەزيدەنتى باعدات مۇپتەكەقىزى «قىران» ەتنوورتالىعىنىڭ ۇلتتىق ونەر دامۋىنا قوسىپ جاتقان ۇلەسىن ايرىقشا اتادى. بۇگىندە ورتالىقتا وقۋ باعدارلامالارى ىسكە اسىپ, ءداستۇردى ساقتاۋعا باعىتتالعان كوپتەگەن جوبالار جۇرگىزىلىپ كەلەدى. سونداي-اق وسكەلەڭ ۇرپاقتى بۇركىت پەن تازىنى باپتاۋمەن قاتار, حالىقارالىق چەمپيوناتتار ۇيىمداستىرۋعا مۇرىندىق بولىپ وتىرعان ورتالىقتىڭ باستى ماقساتى – بابادان جالعاسقان باي مۇرانى كەلەر ۇرپاققا امان جەتكىزۋ.
الاتاۋدىڭ بوكتەرىندە وتكەن بۇل تۋرنير 27-رەت ۇيىمداستىرىلدى. باعدارلاما ۇلتتىق كيىم مەن جابدىقتى باعالاۋ, «قولعا قوندىرۋ», «قوڭىراۋعا شاقىرۋ», «دالبايمەن جۇمىس ىستەۋ» سىندى بىرنەشە باعىتتان تۇرادى. تۋرنير ناتيجەلەرى بويىنشا قولىنا قىران قۇس قوندىرعان ساياتشىلار ناعىز شەبەر ەكەندەرىن اڭعارتتى.
اتاپ ايتساق, «بۇركىت» اتالىمى بويىنشا چەمپيون اتاعىن استانا قالاسىنان كەلگەن ەراسىل سەرىكبەك ۇلى جەڭىپ الدى. ول بۇل جارىسقا 15 جىلدان بەرى قاتىسىپ كەلەدى.
«قارشىعا» اتالىمىندا – جامبىل وبلىسىنان كەلگەن باباجان بەرىكبولسىن جەڭىمپاز اتانسا, «يتەلگى» اتالىمىندا – قاراعاندىلىق تانات وسپانقۇلوۆ ۇزدىك شىقتى.
الماتى وبلىسى