ۇلتتىق ورتالىق مۋزەيدە «حالىق جۇرەگىندەگى قالامگەرلەر» اتتى ادەبي-تانىمدىق كورمە اشىلدى. قازاق ادەبيەتىنىڭ كورنەكتى وكىلدەرى ءسابيت مۇقانوۆتىڭ – 125, مۇحامەدجان قاراتاەۆتىڭ – 115, ءىلياس ەسەنبەرليننىڭ – 110, جۇبان مولداعاليەۆتىڭ – 105, ادام مەكەباەۆ پەن مۇحتار ماعاۋيننىڭ 85 جىلدىق مەرەيتويلارىنا ارنالعان جوبا سۋرەتكەرلەردىڭ ءومىر ورنەگى مەن شىعارماشىلىق مۇراسىنان سىر تارتادى.
ادەبيەتتىڭ ءتۇرلى جانرىندا قالام تارتقان سۋرەتكەرلەردىڭ جەكە زاتتارى, ءومىرى مەن شىعارماشىلىعىنا قاتىستى بىرەگەي مۇراعات ماتەريالدارى, فوتو-قۇجاتتارى, حاتتارى, ەڭبەكتەرى ەكسپوزيتسيا تورىنەن ورىن العان. سولاردىڭ قاتارىندا 1975 جىلى ج.مولداعاليەۆتىڭ مۋزەي قورىنا ءوزى تابىستاعان دومبىراسى, 1972 جىلى س.مۇقانوۆتىڭ جارى ءماريام مۇقانوۆا مۋزەيگە سىيعا تارتقان س.سەيفۋللين تۋرالى قولجازبالارىنىڭ العاشقى نۇسقاسى, م.قاراتاەۆتىڭ ەڭ قۇندى قۇجاتتارى مەن ماراپاتتارىن ەرەكشە اتاۋعا بولادى.
قامشى – قازاقتىڭ ءداستۇرلى مادەنيەتى مەن تۇرمىسىندا ماڭىزدى ورىن العان قۇرال دەسەك, وسى ءداستۇردى بەرىك ۇستانعان م.ماعاۋين تىرشىلىگىندە قامشى جيناۋدى ادەتكە اينالدىرعان. 2014 جىلى مۋزەيگە جازۋشى ءوز قولىمەن 13 قامشىسىن تابىستاعان.
«ۇلتتىق ورتالىق مۋزەيدىڭ باي قورىندا ۇلتىمىزدىڭ مادەنيەتى مەن ادەبيەتىن قالىپتاستىرۋدا وشپەس ءىز قالدىرعان كورنەكتى تۇلعالار مەن قالامگەرلەردىڭ جادىگەرلەرى ەرەكشە ورىن الادى. ادەبيەت مايتالماندارى قالدىرعان مول مۇرا, وي تەرەڭدىگى, ۇلت تاعدىرىن جۇرەگىمەن سەزىنگەن شىعارمالارى ءار بۋىنعا شامشىراق بولىپ قالا بەرەدى. بۇگىنگى مەرەيتويلىق كورمە – سول اسىل ەسىمدەردى ۇلىقتاۋ, ادەبي مۇرانى دارىپتەۋ, ۇرپاق ساناسىنا امانات ەتۋ جولىنداعى ماڭىزدى قادام», دەيدى ۇلتتىق ورتالىق مۋزەي ديرەكتورىنىڭ ورىنباسارى ارايلى باقىتقىزى.
كورمەنىڭ اشىلۋ سالتاناتىندا جازۋشىلار وداعى باسقارما توراعاسىنىڭ ورىنباسارى بەيبىت سارىباي, جازۋشى-دراماتۋرگ ءسۇلتانالى بالعاباەۆ كورمە قۇندىلىعى تۋراسىندا ءسوز سويلەپ, ءىس-شاراعا ارنايى شاقىرىلعان م.قاراتاەۆتىڭ تۋىسى شوقان ورازاەۆ پەن كەلىنى ءجاميلا قۇلانبايقىزى تاريحي تۇلعالاردىڭ ومىرىنە قاتىستى تىڭ ەستەلىكتەرمەن ءبولىستى.
كورمەنىڭ تاعى ءبىر ماڭىزدى تۇسى رەتىندە, تاعىلىمدى شاراعا س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنى دە ءۇن قوسقانىن اتاعان ءجون. ماسەلەن, ءسابيت مۇقانوۆتىڭ مۋزەي-ۇيىنەن كورمەگە جازۋشىنىڭ جەكە تۇتىنعان زاتتارى ارنايى اكەلىنىپتى. جازۋشىنىڭ «ادميرال» كينوكامەراسى, كۇمىستەن جاسالعان جازۋ قۇرالى جيىنتىعى, التىن قولساعاتى, ماگنيتوفون-ديكتوفونى, كوستيۋم-شالبارى, جازۋشىلار وداعىنا مۇشەلىك بيلەتى, اسكەري بيلەتى جانە دەپۋتاتتىق بيلەتتەرى, سونداي-اق جازۋشىنىڭ فوتوسۋرەتتەرى كورمەدەگى ماڭىزدى جادىگەرلەردىڭ قاتارىندا.
الماتى