ۇكىمەت وتىرىسىندا پرەمەر-ءمينيسترى ولجاس بەكتەنوۆ تۇركىستان وبلىسى جەتىساي اۋدانىنىڭ العاباس اۋىلىندا ەكى قاباتتى جەكە تۇرعىن ۇيدە بولعان ورتتەن قازا تاپقانداردىڭ تۋىستارى مەن جاقىندارىنا كوڭىل ايتتى, دەپ حابارلايدى Egemen.kz.
پرەمەر-مينيستر زارداپ شەككەندەر مەن قازا تاپقانداردىڭ وتباسىلارىنا بارلىق قاجەتتى كومەك, ونىڭ ىشىندە ماتەريالدىق جانە مەديتسينالىق كومەك كورسەتىلەتىنىن اتاپ ءوتتى.
«جالپى, جىلۋ بەرۋ ماۋسىمىنىڭ باستالۋىمەن تۇرعىن ءۇي سەكتورىندا ءورت وقيعالارىنىڭ سانى ءوسىپ بارادى. ءبىز بۇل ماسەلەنى قازان ايىندا ۇكىمەت وتىرىسىندا قارادىق. الايدا, جاعدايدىڭ جاقسارعانىن ازىرگە كورىپ وتىرعان جوقپىز», دەدى ولجاس بەكتەنوۆ.
ەستەرىڭىزگە سالا كەتەيىك, كەشە تۇركىستان وبلىسى جەتىساي اۋدانىنىڭ العاباس اۋىلىندا ەكى قاباتتى جەكە تۇرعىن ءۇي ورتەنىپ, 12 ادام مەرت بولدى. ونىڭ 9-ى بالا. قىزىل جالىن 360 شارشى مەتردى شارپىعان.
مەملەكەت باسشىسى جەكە ۇيدە بولعان ءورتتىڭ سالدارىنان قازا تاپقانداردىڭ تۋىستارىنا كوڭىل ايتتى. سونىمەن قاتار پرەزيدەنتتىڭ تاپسىرماسى بويىنشا تۇركىستان وبلىسى جەتىساي اۋدانى العاباس اۋىلىنداعى جەكە ۇيدە بولعان ءورتتىڭ سەبەپتەرىن تەرگەۋ جونىندەگى ۇكىمەتتىك كوميسسيا قۇرىلدى.
جەكە تۇرعىن ۇيدەگى ءورتتىڭ سالدارىنان ەكى ەرەسەك جانە ءبىر بالا اۋرۋحاناعا جەتكىزىلگەن. قازىرگى تاڭدا بارلىعى جانساقتاۋ بولىمىندە جاتىر.
قازا بولعان بالالاردىڭ ەڭ كىشىسى – 2024 جىلى تۋعان, قالعاندارى – 2009, 2010, 2012, 2015, 2017, 2019 جانە 2021 جىلدارى دۇنيەگە كەلگەن. بالالاردىڭ بەسەۋى ءبىر وتباسىنان شىققان – ءۇش قىز جانە ەكى ۇل. باسقا وتباسىنان 2018 جىلى تۋعان قىز بالا امان قالدى. وقيعا ورنىنان سۋرەتتەر جاريالاندى.
ۆيتسە-پرەمەر قانات بوزىمباەۆ ءورتتىڭ سەبەپتەرىن تەرگەپ-تەكسەرۋ بويىنشا قۇرىلعان ۇكىمەتتىك كوميسسيا مۇشەلەرىنە بىرقاتار تاپسىرما بەردى.