قاراعاندى وبلىستىق №2 كوپسالالى اۋرۋحاناسىندا ءوڭىر مەديتسيناسى تاريحىنداعى ايتۋلى وقيعا بولدى. مۇندا العاش رەت ەلەكترودسىز كارديوستيمۋلياتوردى يمپلانتاتسيالاۋ وپەراتسياسى ءساتتى ءوتتى. بۇل – جۇرەك ىرعاعىنىڭ اۋىر بۇزىلىستارىن ەمدەۋدەگى جاڭا بۋىن تەحنولوگياسى, ناۋقاستاردىڭ ءومىر ساپاسىن جاقسارتۋعا باعىتتالعان زاماناۋي شەشىم.
ەلەكترودسىز كارديوستيمۋلياتوردىڭ باستى ەرەكشەلىگى – ونىڭ جۇرەك قۋىسىنداعى تىنگە تىكەلەي ەنگىزىلۋى. وپەراتسيا كەزىندە قۇرىلعى جامباس قانتامىرلارى ارقىلى جەتكىزىلەدى. ەندى ەرتەرەكتەگىدەي ەلەكترودتاردى تارتۋ نەمەسە تەرى استىنا ارنايى «قالتا» جاساۋدىڭ قاجەتى جوق. وزىق ءتاسىل اسقىنۋ قاۋپىن ازايتىپ, ناۋقاستىڭ تەز وڭالۋىنا مۇمكىندىك بەرەدى.
اۋرۋحانانىڭ اريتمولوگ-حيرۋرگى نۇرلان ەلەمەسوۆتىڭ ايتۋىنشا, جاڭا قۇرىلعىنىڭ كولەمى نەبارى ەكى سانتيمەتر عانا, ول جۇرەكتىڭ وڭ جاق قارىنشاسىنا ورناتىلادى.
– قۇرىلعى جۇرەك وتكىزگىشتىگىن قالپىنا كەلتىرىپ, قالىپتى ىرعاقتى ساقتاۋعا كومەكتەسەدى. وپەراتسيادان كەيىنگى كەلەسى كۇنى-اق ناۋقاس وزدىگىنەن ءجۇرىپ-تۇرا الادى. بۇل بۇرىنعى ادىستەرگە قاراعاندا الدەقايدا ءتيىمدى ءارى قاۋىپسىز ءتاسىل, – دەيدى دارىگەر.
وبلىستا جىل سايىن 200-دەن استام ناۋقاسقا كارديوستيمۋلياتور ورناتىلادى ەكەن. قاراعاندى دارىگەرلەرى العاش رەت ەلەكترودسىز قۇرىلعى ارقىلى جاساعان وپەراتسيا ءارى قاراي دا جالعاسىپ, ناۋقاستاردىڭ وڭالىپ كەتۋىنە سەپتىگىن تيگىزە بەرەدى. وپەراتسيا ەلىمىزدىڭ جەتەكشى اريتمولوگتەرىنىڭ قاتىسۋىمەن, سونداي-اق ءباا مەن اقش-تان شاقىرىلعان مامانداردىڭ, «Abbott» كومپانياسىنىڭ كلينيكالىق سەرىكتەستەرىمەن بىرلەسە اتقارىلدى.
– مۇنداي قۇرىلعى 20–25 جىلعا دەيىن قىزمەت ەتە الادى. ارينە, بۇل مەرزىم ونىڭ يەسىنىڭ ءومىر سالتىنا دا بايلانىستى. قاجەت بولعان جاعدايدا قۇرىلعىنى جاڭاسىنا اۋىستىرۋ مۇمكىندىگى بار. قاراعاندى دارىگەرلەرىنىڭ كاسىبيلىگى جوعارى دەڭگەيدە, بارلىق قاجەتتى قۇرال-جابدىق دەر كەزىندە دايىن بولدى, – دەيدى «Abbott» كومپانياسىنىڭ كلينيكالىق مامانى حادەر ابۋ حالاف.
دەنساۋلىق ساقتاۋ مينيسترلىگىنىڭ شتاتتان تىس باس اريتمولوگى, قازاق اريتمولوگتەر قوعامىنىڭ پرەزيدەنتى ايان ابدراحمانوۆ جاڭا تەحنولوگيانىڭ ەلىمىزدىڭ بىرنەشە قالاسىندا ەنگىزىلىپ جاتقانىن اتاپ ءوتتى.
– ەلەكترودسىز كارديوستيمۋلياتور – الەمدىك مەديتسيناداعى ەڭ جاڭا جەتىستىكتەردىڭ ءبىرى. قازىردە مۇنداي وپەراتسيالار استانا, الماتى, اقتاۋ, سەمەي, شىمكەنت قالاسىندا جاسالىپ كەلەدى. ەندى وسى قاتارعا قاراعاندى دا قوسىلدى. بۇل ءادىس بۇرىنعى ۇلگىدەگى كارديوستيمۋلياتورلارمەن سالىستىرعاندا اناعۇرلىم ءتيىمدى. ول تەرىاستى قالتالارىنا, ەلەكترودتارعا بايلانىستى اسقىنۋلاردىڭ الدىن الىپ, ناۋقاستاردىڭ ءومىر ساپاسىن جاقسارتادى. ەڭ باستىسى – بۇل تەحنولوگيا ەلدەگى بارلىق تۇرعىنعا قولجەتىمدى بولۋعا ءتيىس, – دەدى ول.
جاڭا ادىسپەن وپەراتسيا جاسالعان العاشقى ناۋقاستاردىڭ ءبىرى – قاراعاندى قالاسىنىڭ تۇرعىنى ەۆگەنيا بوندارەنكو. ول وپەراتسيادان كەيىنگى جاعدايى تۋرالى ايتىپ, مەديتسينا قىزمەتكەرلەرىنە ريزاشىلىعىن ءبىلدىردى.
– باستاپقىدا ۋايىم بولعانى راس, بىراق دارىگەرلەردىڭ شەبەرلىگىنىڭ ارقاسىندا ءبارى جاقسى ءوتتى. قازىر ءوزىمدى جەڭىل ءارى جاقسى سەزىنەمىن. دارىگەرلەر مەن مەدبيكەلەرگە ۇلكەن العىس ايتامىن, – دەدى ەم الۋشى.
كەيىنگى جىلدارى قاراعاندى وڭىرىندە دەنساۋلىق ساقتاۋ سالاسى ينفراقۇرىلىمدارى جاڭارتىلىپ, مەديتسينا مەكەمەلەرى تسيفرلاندىرىلىپ, جوعارى تەحنولوگيالى قۇرال-جابدىقتار ورناتىلىپ, كادرلىق الەۋەت ارتىپ كەلەدى. مەديتسينانىڭ دامۋ قارقىنىنا بايلانىستى وبلىستا تەلەمەديتسينا, تسيفرلىق شەشىمدەر, اۆتوماتتاندىرىلعان تىركەۋ, ەلەكتروندى دەنساۋلىق پاسپورتى سياقتى جاڭاشىل جوبا جۇزەگە اسىرىلىپ جاتىر. مۇنىڭ بارلىعى ساپالى, قولجەتىمدى مەديتسينالىق قىزمەت كورسەتۋگە جول اشتى.
قاراعاندى دارىگەرلەرىنىڭ جەتىستىگى – ءوڭىر مەديتسيناسىنىڭ عانا ەمەس, جالپى ەلىمىزدەگى دەنساۋلىق ساقتاۋ جۇيەسىنىڭ قارىشتى قادامى. ەلەكترودسىز كارديوستيمۋلياتوردى ورناتۋ وپەراتسياسى ەلىمىزدە جوعارى تەحنولوگيالى مەديتسينالىق كومەكتىڭ جاڭا كەزەڭىن باستاپ بەردى. بۇل جاڭالىق – وتاندىق مەديتسينانىڭ مۇمكىندىگى ارتقانىن, بىلىكتى ماماندار مەن زاماناۋي تەحنولوگيالاردىڭ ادام ءومىرىن ساقتاۋدا شەشۋشى ءرول اتقاراتىنىن تاعى ءبىر مارتە دالەلدەدى.
قاراعاندى وبلىسى