قازاقستاندا العاش رەت ىسكە قوسىلعان Alem.Cloud ۇلتتىق سۋپەركومپيۋتەرى حالىقارالىق TOP500 رەيتينگىندە 86-ورىنعا كوتەرىلىپ, الەمدەگى ەڭ قۋاتتى ەسەپتەۋ جۇيەلەرىنىڭ قاتارىنا كىردى, دەپ حابارلايدى Egemen.kz.
مەملەكەت باسشىسىنىڭ تاپسىرماسى بويىنشا Alem.Cloud سۋپەركومپيۋتەرلىك كلاستەرى جاساندى ينتەللەكت جانە تسيفرلىق دامۋ مينيسترلىگىنە قاراستى «ۇلتتىق اقپاراتتىق تەحنولوگيالار» اق ينفراقۇرىلىمى نەگىزىندە قۇرىلعان. بۇل ينفراقۇرىلىم جاساندى ينتەللەكت, ۇلكەن دەرەكتەردى تالداۋ باعىتتارىنداعى جوبالاردى ىسكە اسىرۋعا ارنالعان.
كلاستەردىڭ ارحيتەكتۋراسى جوعارى تىعىزدىقتاعى بىرىڭعاي GPU-كەشەنىنە بىرىكتىرىلگەن 64 HPE Cray سەرۆەرىنىڭ بازاسىندا ىسكە قوسىلعان. ءاربىر ەسەپتەۋ تورابى جوعارى جىلدامدىقتى قامتاماسىز ەتەتىن NVIDIA H200-بەن جابدىقتالعان.
جوبانى جۇزەگە اسىرۋدا بىرىككەن اراب امىرلىكتەرىنىڭ G42 توبىنا كىرەتىن Presight كومپانياسى ماڭىزدى ءرول اتقاردى. حالىقارالىق سەرىكتەستەر قازاقستانداعى AI ەكوجۇيەسىن دامىتۋعا ارنالعان وزىق تاجىريبەلەردى ەنگىزىپ, جوعارى ءونىمدى ەسەپتەۋ كلاستەرىن جوبالاۋ بارىسىندا كەشەندى تەحنيكالىق قولداۋ كورسەتتى.
«جۇيە جوعارى پەتافلوپس دياپازونىندا ونىمدىلىكتى قامتاماسىز ەتەدى جانە قازاقستان مەن ورتالىق ازيا ايماعىنداعى ەڭ قۋاتتى ەسەپتەۋ پلاتفورماسى بولىپ سانالادى. سۋپەركومپيۋتەر باعدارلامالىق جاساقتاماسى SUSE Harvester (ۆيرتۋاليزاتسيا جانە تاراتىلعان ەسەپتەۋلەرگە ارنالعان جاڭا بۋىن گيپەرۆيزورى), SUSE Rancher (Kubernetes پەن AI-جۇكتەمەلەرىن ورتالىقتان باسقارۋ پلاتفورماسى) تەحنولوگيالارىن قامتيدى. كلاستەردىڭ قاۋىپسىزدىگىن قامتاماسىز ەتۋ ءۇشىن SUSE NeuVector (كونتەينەرلىك قاۋىپسىزدىك, جەلىلىك باقىلاۋ جانە رانتايم-قورعاۋ جۇيەسى), Palo Alto Networks جەلىلىك سەگمەنتاتسيا جانە كيبەرقاۋىپسىزدىك شەشىمدەرى, سونداي-اق Thales كريپتوگرافيالىق جانە اپپاراتتىق شيفرلاۋ قۇرالدارى قولدانىلادى», دەلىنگەن حابارلامادا.
«ۇات» اق ماماندارى حالىقارالىق سەرىكتەستەرمەن بىرلەسىپ, HPL (Linpack) ادىستەمەسى بويىنشا كەشەندى تەستىلەۋ جۇرگىزدى. سىناقتار جۇيەنىڭ ناقتى ەسەپتەۋ مۇمكىندىكتەرىن دالەلدەپ, TOP500 رەيتينگىنە تىركەۋگە دايىن ەكەنىن كورسەتتى.