ۇلتتىق بانك ەل ازاماتتارىنىڭ شەتەلدە ساۋدا مەن قىزمەت اقىسىن وزدەرىنىڭ بانك قوسىمشاسىنداعى بىرىڭعاي QR-كود ارقىلى تولەۋ مۇمكىندىگىن ەنگىزۋگە كىرىستى. العاشقى حالىقارالىق پيلوتتىق جوبالار كەلەسى جىلدىڭ ەكىنشى جارتىسىندا ىسكە قوسىلۋى مۇمكىن, دەپ حابارلايدى Egemen.kz.
قارجىگەرلەر كونگرەسىنىڭ كۋلۋارىندا ۇلتتىق بانكتىڭ تسيفرلىق ترانسفورماتسيا جونىندەگى باسشىسى بينۋر جالەنوۆ الەمدە كەڭ تاراعان QR جۇيەسىنە قازاقستاندىق بانكتەر دە بىرتىندەپ قوسىلىپ جاتقاندىعىن اتاپ ءوتتى.
«كەلەسى جىلى بارلىق بانكتەر جۇيەگە تولىق قوسىلىپ, سەرۆيس تۇراقتى جۇمىس ىستەگەن كەزدە, حالىقارالىق تولەم مەحانيزمدەرىن رەتتەۋگە كىرىسەمىز. ءبىزدىڭ QR باسقا ەلدەردىڭ قوسىمشالارىندا دا وقىلۋى نەمەسە ولاردىڭ QR-لارى بىزدە تانىلۋى ءۇشىن ورتالىق ازيا ەلدەرىمەن, تۇركيامەن جانە ءباا-مەن كەلىسسوزدەر جۇرگىزىپ جاتىرمىز. العاشقى پيلوتتىق جوبالار كەلەسى جىلدىڭ ەكىنشى جارتىسىندا باستالادى», دەدى ول.
ونىڭ سوزىنشە, مۇنداي ينتەگراتسيا QR-كودتاردى ءوزارا تانۋ مۇمكىندىگىن قاراستىرادى.
ماسەلەن, قىتايدا ولاردىڭ تەرمينالدارىن ءوزىڭنىڭ قوسىمشاڭمەن وقي الاسىڭ جانە كەرىسىنشە. سول تاجىريبەنى قىرعىزستان, تۇركيا, ءباا باعىتىندا دا قولدانۋ جوسپارلانىپ وتىر. ناقتى ەلدەر مەن جۇمىس ىستەۋ مەحانيزمدەرى كەيىنىرەك جاريالانادى, دەپ ءتۇسىندىردى ب. جالەنوۆ.
سونىمەن قاتار كوميسسيا مولشەرىنە مەملەكەت تاراپىنان رەتتەلمەيتىنىن اتاپ ءوتتى. سونداي-اق, سوڭعى جىلدارى كوميسسيا كولەمى تومەندەپ كەلە جاتقانىن جەتكىزدى.
ۇلتتىق بانك وكىلىنىڭ سوزىنشە, بىرىڭعاي QR-دىڭ نەگىزگى ماقساتى – ازاماتتارعا قولايلىلىق جاساۋ. بۇگىندە ءار ادامدا كەم دەگەندە 3-4 بانك قوسىمشاسى بار, ال ساۋدا نۇكتەلەرىندە ءتۇرلى بانكتەردىڭ تەرمينالدارى ورناتىلعان.
ء«بىز بارلىق بانكتەردى ءبىر جۇيەگە بىرىكتىردىك. ەندى كەز كەلگەن تەرمينالدى كەز كەلگەن بانك قوسىمشاسى ارقىلى تولەۋگە بولادى. بۇل ازاماتتارعا دا ىڭعايلى, قارجى نارىعىندا باسەكەنى دە كۇشەيتەدى. قازىر Halyk, BCC, Home Credit, Freedom, RBK جانە Altyn Bank تولىق رەجيمدە جۇمىس ىستەپ تۇر. باسقا بانكتەر قوسىلۋ پروتسەسىندە. Kaspi دە جۇيەگە كىرۋگە نيەت ءبىلدىردى, تەحنيكالىق ينتەگراتسياعا بىرنەشە اي قاجەت», دەدى ول.
سونىمەن قاتار تەلەفون ءنومىرى ارقىلى بانكارالىق اۋدارىم جاساۋ سەرۆيسى دە كەڭەيىپ كەلەدى. قازىر توعىز بانك قوسىلعان, جاقىن ارادا بارلىق بانكتەر قوسىلادى دەپ جوسپارلانعان.
ايتا كەتەيىك, 13 قاراشادا قازاقستاندا بىرىڭعاي بانكارالىق QR-تولەمدەر جۇيەسى رەسمي تۇردە ىسكە قوسىلعان بولاتىن.