امەريكالىق كاسىپكەر, Tesla مەن SpaceX كومپانيالارىنىڭ نەگىزىن قالاۋشى يلون ماسك الداعى بەس جىلدا سمارتفوندار قولدانىستان شىعىپ, ولاردىڭ ورنىن جاساندى ينتەللەكتكە نەگىزدەلگەن قۇرىلعىلار باسادى دەپ مالىمدەدى. بۇل تۋرالى ول تانىمال تەلەجۇرگىزۋشى دجو روگانمەن سۇحباتىندا ايتتى, دەپ جازادى Egemen.kz.
ميللياردەردىڭ ايتۋىنشا, 2030 جىلعا قاراي «بۇگىنگى تەلەفون» ۇعىمىنىڭ ءوزى جويىلادى. ونىڭ ورنىنا ەكرانمەن جانە دىبىستىق بايلانىس قۇرالدارىمەن جابدىقتالعان, تولىقتاي جاساندى ينتەللەكتكە سۇيەنەتىن قۇرىلعىلار پايدا بولماق.
«قازىرگى تەلەفون دەگەنىمىز – جاساندى ينتەللەكت بەينەاناليز جۇرگىزەتىن جانە بايلانىسقا ارنالعان راديومودۋلدەرى بار شەكارالىق ءتۇيىن عانا. بولاشاقتا ءسىزدىڭ قۇرىلعىڭىزداعى ءىى سەرۆەرمەن تىكەلەي بايلانىسىپ, ويىڭىزدى الدىن الا سەزەتىن دەڭگەيگە جەتەدى», دەدى ماسك.
ساراپشىلار مۇنداي تەحنولوگيالىق بەتبۇرىستىڭ شىندىققا اينالۋى ءۇشىن جاھاندىق ينفراقۇرىلىم مەن ەتيكالىق نورمالاردى جەتىلدىرۋ قاجەت ەكەنىن ايتادى. دەگەنمەن, ماسكتىڭ پىكىرىنشە, ادام مەن ماشينانىڭ اراسىنداعى شەكارا بارعان سايىن جويىلىپ, اقپارات الماسۋ تابيعي ۇردىسكە اينالادى.