نيدەرلاند كورولدىگىنىڭ استاناسىندا الماتى قالاسى مۋزەيلەر بىرلەستىگىنىڭ ء«داستۇر ساباقتاستىعى: اتا-بابا مۇراسى» اتتى كورمەسى اشىلدى. ءىس-شاراعا ديپلوماتيالىق كورپۋس وكىلدەرى, حالىقارالىق جانە قوعامدىق ۇيىمداردىڭ باسشىلارى, مادەنيەت جانە ونەر قايراتكەرلەرى, سونداي-اق بۇقارالىق اقپارات قۇرالدارىنىڭ وكىلدەرى قاتىستى, دەپ جازادى Egemen.kz.
كورمە الماتى قالاسى اكىمدىگىنىڭ, قازاقستان رەسپۋبليكاسىنىڭ نيدەرلاند كورولدىگىندەگى ەلشىلىگىنىڭ, تۇركيا رەسپۋبليكاسىنىڭ نيدەرلاند كورولدىگىندەگى ەلشىلىگىنىڭ جانە يۋنۋس ەمرە ينستيتۋتىنىڭ قولداۋىمەن ۇيىمداستىرىلعان. بۇل قازاق حالقىنىڭ باي مادەني مۇراسىن پاش ەتەتىن ماڭىزدى مادەني وقيعا.
بەس تاقىرىپتىق بولىمنەن تۇراتىن ەكسپوزيتسيا الماتى قالاسى مۋزەيلەر بىرلەستىگىنىڭ قورىنان الىنعان 70-تەن استام بىرەگەي جادىگەردى ۇسىنادى. ولاردىڭ قاتارىندا قازاق حالقىنىڭ تۇرمىس-تىرشىلىگى مەن داستۇرلەرىنەن سىر شەرتەتىن ەتنوگرافيالىق ارتەفاكتىلەر, ساندىك-قولدانبالى ونەر تۋىندىلارى, سونداي-اق قازاق جانە تۇركى حالىقتارىنىڭ مۋزىكالىق اسپاپتارى بار.
«الماتى قالاسى مۋزەيلەر بىرلەستىگى سوڭعى 3 جىلدا, وڭتۇستىك كورەيا اۆستريا,فرانتسيا, يتاليا, چەحيا, سەربيا, ماجارستان , تۇركيا مەملەكەتتەرىندە 11 حالىقارالىق كورمە ۇيىمداستىرىپ, قازاق حالقىنىڭ تاريحى مەن مادەنيەتىن الەمدىك دەڭگەيدە تانىستىرىپ كەلەدى. بۇگىنگى امستەردامداعى كورمە دە – مۋزەيدىڭ حالىقارالىق باعىتتاعى جۇيەلى تۇردە جۇرگىزىلگەن جۇمىسىنىڭ جالعاسى, قازاق مادەنيەتىنىڭ ەۋروپا كەڭىستىگىندەگى جاڭا ءبىر كورىنىسى», – دەيدى الماتى قالاسى مۋزەيلەر بىرلەستىگىنىڭ ديرەكتورى ءلاززات قۇدايبەرگەنقىزى.
ايتا كەتەيىك, قازاقستان رەسپۋبليكاسى مەن نيدەرلاند كورولدىگى اراسىنداعى ديپلوماتيالىق قاتىناس 1992 جىلى 10 قىركۇيەكتە ورناعان.
يۋنۋس ەمرە ينستيتۋتىنداعى بۇل كورمە 2025 جىلى 14 قاراشاعا دەيىن جالعاسادى.