11-سىنىپ وقۋشىلارى دىنمۇحامەد ماتاي مەن ءامىر جانىبەك تەمىرجول ينفراقۇرىلىمىنىڭ قاۋىپسىزدىگى مەن تيىمدىلىگىن ارتتىرۋعا باعىتتالعان «تەمىرجول رەلستەرىن قوسۋدىڭ يننوۆاتسيالىق تەحنولوگيالارى» اتتى جوبالارىن تانىستىردى. «قتج» كومپانياسىنىڭ حابارلاۋىنشا, جاس ونەرتاپقىشتار رەلستەردى بىرىكتىرۋدىڭ ءتورت بىردەي جاڭا ءادىسىن ۇسىنىپ, ولاردىڭ بارلىعى قازاقستان رەسپۋبليكاسىندا پاتەنتتەلىپ, جەنەۆاداعى حالىقارالىق تىركەۋگە جولدانعان, دەپ جازادى Egemen.kz.
جوبا نيۋ-يوركتەگى حالىقارالىق وليمپيادادا دا ۇسىنىلىپ, ساراپشىلار تاراپىنان جوعارى باعاعا يە بولدى. يننوۆاتسيالىق شەشىمدەر رەلستەردىڭ توزۋىن ازايتىپ, شۋ دەڭگەيىن تومەندەتۋگە جانە اپاتتىڭ الدىن الۋعا مۇمكىندىك بەرەدى. سونىمەن قاتار, بۇل ادىستەر تەمىرجول سالاسىنداعى پايدالانۋ شىعىندارىن ەداۋىر ۇنەمدەۋگە جول اشادى.
كومپانيا باسشىلىعى جاس ينجەنەرلەردىڭ جوباسىن جوعارى باعالاپ, ونى جەتىلدىرۋگە قولداۋ كورسەتۋگە دايىن ەكەندىگىن جەتكىزدى. قول جەتكىزىلگەن ۋاعدالاستىقتار اياسىندا قتج تاراپىنان قاجەتتى ماتەريالدار ۇسىنىلىپ, وقۋشىلاردىڭ بۋراباي كۋرورتىنداعى رەلس دانەكەرلەۋ كاسىپورنىنا ساپارى ۇيىمداستىرىلماق.
كەزدەسۋ بارىسىندا جاستار قتج ورتالىق مۇراجايىنا بارىپ, ەلىمىزدىڭ تەمىرجول سالاسىنىڭ دامۋ تاريحىمەن تانىستى.