جەتىسۋدا زاماناۋي زاۋىت سالىنادى

جىل باسىنان بەرى اۋدان ەكونوميكاسىنا 21,8 ملرد تەڭگە ينۆەس­تيتسيا تارتىلعان (وتكەن جىلمەن سالىستىرعاندا 1,5 ەسە ارتىق). تارتىلعان ينۆەستيتسيانىڭ 74%-ى – جەكە ينۆەس­تيتسيا ۇلەسىندە. 2025–2028 جىلدارى جالپى قۇنى 1,4 ترلن تەڭگە بولاتىن 8 ين­ۆەس­تيتسيالىق جوبانى جۇزەگە اسىرۋ جوسپارلانعان. ناتيجەسىندە, ەكى مىڭنان استام جۇمىس ورنى قۇرىلادى دەپ مەجەلەنگەن. ىشىندەگى ىرىلەرى – كوكساي مىس قورىتۋ كومبيناتى, كۇن ەلەكتر ستانساسى جانە سۋ ەلەكتر ستانساسى.

«جوبا ەكولوگيالىق جاعىنان تولىق­تاي تازا. ءبىز دەرەكتەردى وڭدەۋ ورتا­لىعى­نىڭ جۇمىسىن جۇرگىزۋگە قاجەتتى ەلەكتر ەنەرگياسىن تەك كۇن ساۋلەسىنەن الامىز. ەلەكتر ستانساسىنىڭ قۋاتى – 110 مۆت/ساع, ال ەنەرگيانى ساقتاۋ جۇيەسىنىڭ تۇراق­تى قۋاتى – 20 مۆت/ساع بولادى», دەپ مالىم­دەدى «جي جانە جەك ورتالىعى» جشس جوباسىنىڭ جەتەكشىسى ايدىن جانۇزاقوۆ.

ايتۋىنشا, سارىبۇلاق اۋىلىندا 200 مىڭ قوس اينالمالى پانەل ورناتىلادى. بۇل پانەلدەر ەنەرگيانى جيناقتاپ, ونى اككۋمۋلياتورعا, كەيىن سەرۆەرگە جىبەرىپ, دەرەكتەردى وڭدەۋ ورتالىعىنىڭ جۇمىسىن قامتاماسىز ەتەدى. بۇل ورتالىق ۇيالى بايلانىس وپەراتورلارىمەن, بانكتەرمەن تىعىز بايلانىستا جۇمىس ىستەيدى. جوبانىڭ جالپى قۇنى – 15 ملرد تەڭگە. جاڭا كۇن ەلەكتر ستانساسى 2027 جىلدىڭ شىلدە ايىندا ىسكە قوسىلماق. ەكولوگيا سالاسىنىڭ ساراپشىسى ايگۇل تولەۋقىزى مۇنداي باستامانىڭ ايماق ءۇشىن ەرەكشە ماڭىزى بار ەكەنىن ايتادى.

«كۇن ستانساسى تەك ەكونوميكالىق تابىس اكەلمەيدى, سونىمەن قاتار كومىرتەك ءىزى تومەن ءوندىرىستى دامىتۋعا جول اشادى. بۇل جەتىسۋدىڭ «جاسىل ءوڭىر» رەتىندەگى برەندىنە وڭ اسەر ەتەدى. ونىڭ ۇستىنە, حالىقتى جۇمىسپەن قامتۋدا ۇلكەن ءرول اتقارادى. اۋداننىڭ دا الەۋمەتتىك جاعدايى كوتەرىلەدى», دەيدى ا.تولەۋقىزى.

تاعى ءبىر ماڭىزدى ينۆەستيتسيالىق جوبا – جىلىنا 98 مىڭ توننا سۇيىتىلعان تابيعي گاز وندىرەتىن زاۋىت تا كەربۇلاق اۋدانىنا قاراستى سارىبۇلاق اۋىلىندا ورنالاسادى. ونى ىسكە اسىرۋ سارىوزەك اۋىلىنا دەيىن ماگيسترالدى گاز قۇبى­رىنىڭ ەكىنشى جەلىسىن تارتۋ ىسىمەن تىعىز بايلانىستى. جوباعا قاراجاتتى كانادالىق ءىرى ينۆەستور قۇيادى. قۇرىلىس كەزىندە 350-گە جۋىق جۇمىس ورنى اشىلسا, ىسكە قوسىلعان سوڭ 70 تۇراقتى جۇمىس ورنى قۇرىلادى. زاۋىتتا وندىرىلەتىن سۇيىتىلعان گاز ىشكى نارىقتا ساتىلادى. كاسىپورىن قۇرىلىسىن جىل سوڭىنا دەيىن باستاپ, 2026 جىلدىڭ ەكىنشى جارتىسىندا اياقتاۋ جوسپارلانىپ وتىر.

«بىرىنشىدەن, جاڭا جۇمىس ورىندارى قۇرىلسا, ەكىنشىدەن, سالىق ءتۇسىمى كوبەيەدى. قوسالقى قىزمەت كورسەتەتىن سالالار – تاسىمال, تەحنيكا جوندەۋ, لوگيستيكا دا داميدى. ياعني ءبىر زاۋىتتىڭ پايداسى بىرنەشە سالاعا سەرپىن بەرەدى», دەيدى ەكونوميست تالعات قاسىموۆ.

وبلىس اكىمىنىڭ ورىنباسارى الىبەك جاقانباەۆتىڭ ايتۋىنشا, بيىلعى جەتى ايدا ءوندىرىس كولەمى 4,5%-عا وسكەن. اۋداندا 3,6 مىڭنان استام جۇمىس ىستەپ تۇرعان بيزنەس سۋبەكتىسى بار, وندا 5 مىڭ ادام جۇمىس ىستەيدى.

«گاز زاۋىتى, كۇن ەلەكتر ستانساسى جانە كوكساي مىس قورىتۋ كومبيناتى جوبالارى ىسكە اسقاندا, كەربۇلاق وندىرىستىك حابقا اينالادى. بۇل اۋىل حالقىنىڭ تۇرمىس ساپاسىن ارتتىرۋعا دا تىكەلەي اسەر ەتەدى», دەيدى وبلىس اكىمىنىڭ ورىنباسارى.

جەتىسۋ وبلىسى