ستۋدەنتتىك سوت پروتسەسى بايقاۋىنىڭ جەڭىمپازى انىقتالدى

«AIFC Court Moot» – اعىلشىننىڭ جالپى قۇقىق داستۇرىنە نەگىزدەلگەن, ستۋدەنتتەر اراسىندا وتەتىن سوت پروتسەسى ۇلگىسىندەگى بايقاۋ. ءىس-شارا ۇيىمداستىرۋشىلارى جىل سايىن قازاقستان مەن ەۋرازيا ءوڭىرىنىڭ دارىندى ستۋدەنتتەرىن جيناپ, بولاشاق زاڭگەرلەردىڭ احقو سوتى سۋديالارىنىڭ الدىندا ءوز بىلىمدەرى مەن داعدىلارىن كورسەتۋىنە مۇمكىندىك تۋعىزادى. ياعني, بايقاۋ اياسىندا ستۋدەنتتەردەن قۇرالعان توپتار ويدان شىعارىلعان ءىس بويىنشا ءوز دالەلدەرىن (جازباشا جانە اۋىزشا) دايىنداپ, بولاشاق زاڭگەرلەر زاڭدى تالداۋ, قۇقىقتىق ۇستانىمداردى قالىپتاستىرۋ جانە كوپشىلىك الدىندا سويلەۋ داعدىلارىن جەتىلدىرىپ, احقو سوتىنىڭ اعا سۋديالارىنىڭ الدىندا جۇمىستارىن قورعايدى.

بيىلعى بايقاۋدىڭ فينالىنا الدىڭعى كەزەڭدەردە كورسەتكەن جاقسى ناتيجەلەرى بويىنشا ىرىكتەلگەن ماقسۇت نارىكباەۆ ۋنيۆەرسيتەتى (استانا, قازاقستان) مەن شىعىس قىتاي ساياسي عىلىمدار جانە قۇقىق ۋنيۆەرسيتەتىنىڭ (شانحاي, قىتاي)  ستۋدەنتتەرى ءوتتى. فينالدى احقو سوتىنىڭ توراعاسى مەلدون لوردى بەرنەتت جانە احقو سوتىنىڭ باسقا دا  اعا سۋديالارى باعالادى.

احقو جانە حتو سوتىنىڭ تىركەۋشىسى جانە اپپارات باسشىسى كريستوفەر كەمپبەلل-حولت: ء«بىز احقو سوتى ستۋدەنتتىك سوت پروتسەسى بايقاۋى سەگىز جىل قاتارىنان وتكىزىلىپ, قاتىسۋشى ۋنيۆەرسيتەتتەردىڭ وقۋ باعدارلاماسىنىڭ اجىراماس بولىگىنە اينالعانىن ماقتان تۇتامىز. وسىنداي بايقاۋلاردى وتكىزۋ ارقىلى ءبىز زاڭگەر ستۋدەنتتەرگە ناقتى سوت ىستەرىندە كليەنتتەردىڭ مۇددەلەرىن قورعاۋ ءۇشىن ادۆوكاتتاردان تالاپ ەتىلەتىن جالپى سوت جاعدايىندا اۋىزشا ادۆوكاتۋرا ماشىقتارىن ۇيرەنۋگە جانە قولدانۋعا بىرەگەي مۇمكىندىك بەرەمىز. ستۋدەنتتەردىڭ دەڭگەيى جىل سايىن جوعارىلاپ كەلەدى. ءبىز ەۋرازياداعى تاڭداۋلى حالىقارالىق كوممەرتسيالىق سوت رەتىندە نەگىزگى سەرىكتەستەرىمىزبەن جانە زاڭ قاۋىمداستىعىمەن تىعىز قارىم-قاتىناس قالىپتاستىرۋدى جالعاستىرىپ كەلە جاتقاندىقتان, بۇل ستۋدەنتتەر ءۇشىن دە, ءبىزدىڭ سوت ءۇشىن دە ماڭىزدى جارىس», دەيدى.

جەڭىمپازدار كۋبوگى  شىعىس قىتاي ساياسي عىلىمدار جانە قۇقىق ۋنيۆەرسيتەتىنىڭ (شانحاي, قىتاي) ستۋدەنتتەرىنە بەرىلدى, ال سوڭعى تۋرعا وتكەن بارلىق ستۋدەنتتەر احقو جانە حتو سوتىندا تاعىلىمدامادان ءوتۋ مۇمكىندىگىنە يە بولدى.

2018 جىلدان بەرى احقو سوتىنىڭ ستۋدەنتتىك سوت پروتسەسى بايقاۋى قازاقستان مەن ەۋرازيا وڭىرىندەگى قۇقىق سالاسىنداعى دارىندى جاستاردى قولدايتىن ماڭىزدى الاڭعا اينالدى. احقو سوتى مەن حالىقارالىق تورەلىك ورتالىعىنىڭ (حتو) ترەنينگ ورتالىعىنىڭ ءبىلىم بەرۋ باعدارلامالارى ارقىلى 4500-دەن استام ادام قۇقىق ۇستەمدىگى مەن حالىقارالىق كوممەرتسيالىق داۋلاردى شەشۋ قاعيدالارى بويىنشا تەگىن ءبىلىم الدى. سونداي-اق, 220-دان استام ستۋدەنت احقو سوتى مەن حتو-دا تاعىلىمدامادان ءوتتى.

جىل سايىن قازاقستان مەن ەۋرازيا وڭىرىنەن جۇزدەگەن ستۋدەنت احقو سوتى مەن حتو ۇيىمداستىراتىن سوت, اربيتراج جانە مەدياتسيا پروتسەستەرىنىڭ بايقاۋلارىنا قاتىسادى. بۇل بايقاۋلار وڭىردەگى ىسكەرلىك جانە زاڭ قاۋىمداستىعىن دامۋىنا ۇلەس قوسىپ, احقو سوتى مەن حتو-نى حالىقارالىق كوممەرتسيالىق داۋلاردى شەشۋدەگى جەتەكشى ينستيتۋتتار رەتىندە بەدەلىن ارتتىرادى. سونىمەن قاتار بۇل بايقاۋلار جاس جانە تاجىريبەلى زاڭگەرلەرگە ينۆەستورلاردىڭ قۇقىقتارىن ءتيىمدى قورعاۋ ءۇشىن ماڭىزدى داعدىلاردى دامىتۋعا كومەكتەسەدى. ماماندار اتالعان ءىس-شارا  قازاقستانعا شەتەلدىك ينۆەستيتسيالاردى تارتۋعا جانە ەلدىڭ سوت جۇيەسىندە قۇقىقتىق قاۋىپسىزدىك پەن ينۆەستورلاردىڭ سەنىمىن قامتاماسىز ەتۋگە ىقپال ەتەتىنىن دە ايتادى.