الماتىداعى ۇلتتىق كىتاپحانادا كورنەكتى جازۋشى جۇماباي شاشتاي ۇلىنىڭ تۋعانىنا 75 جىل تولۋىنا ارنالعان ادەبي جيىن ءوتتى. قالام ۇستاعان قاۋىم ۇلت ادەبيەتىنە ايشىقتى قولتاڭباسىن قالدىرعان جازۋشىنى قۇرمەتپەن ەسكە الىپ, ادىلەت پەن ادامگەرشىلىكتى تۇتاس عۇمىرىنىڭ وزەگىنە اينالدىرعان قالامگەر تۋرالى ەستەلىكتەر توپتاستىرىلعان «وزگەرمەگەن ادام» كىتابىنىڭ تۇساۋى كەسىلدى.
تاعىلىمدى كەشتىڭ وتۋىنە جۇماعاڭنىڭ ءوزى ادەبيەت پەن جۋرناليستيكاعا باۋلىعان شاكىرتتەرى ۇيىتقى بولعان. جازۋشىنىڭ تۋعان كۇنىندە كوپشىلىككە تانىستىرىلعان ەستەلىك جيناقتا جۇماباي شاشتاي ۇلىنىڭ كىسىلىك كەلبەتى, ادامي اجارىنا داق تۇسىرمەگەن پاراساتى مەن قارپايىمدىلىعى قالامداستارى مەن شاكىرتتەرى تاراپىنان جىلى كورىنىس تاپقان. سونداي-اق جاڭا تۋىندىدا قالامگەردىڭ ءومىر جولى, شىعارماشىلىق ۇستانىمى, زامانداستارىنىڭ ەستەلىكتەرى مەن سيرەك ارحيۆتىك ماتەريالدار دا قامتىلعان.
اقىن ۇلىقبەك ەسداۋلەت تىزگىندەگەن رۋحاني كەشتە ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي مادەنيەت جانە اقپارات ءمينيسترى ايدا بالاەۆانىڭ جازۋشى شىعارماشىلىعى حاقىنداعى جىلى لەپەسىن جەتكىزدى.
«جۇماباي شاشتاي ۇلى – قوعام جۇگىن, ەل مۇڭىن كوتەرگەن مازمۇنى تەرەڭ ماقالالار, شوقتىعى بيىك شىعارمالار جازىپ, ۇلت رۋحانياتىنا سۇبەلى ۇلەس قوستى. سوڭىنان ەرىپ, قولىنا قالام ۇستاعان جاستارعا رۋحاني اكە بولىپ, شاكىرتتەرىنىڭ شىراعىن جاقتى, تالانتىن ۇشتادى. ۇلت مادەنيەتىنە زور ەڭبەك سىڭىرگەن وسىنداي تۇلعالاردىڭ ەسىمىن ۇلىقتاۋ رۋحاني ساباقتاستىقتىڭ, ەلدىكتىڭ بەلگىسى» دەلىنگەن قۇتتىقتاۋ حاتتا.
باسقوسۋدا جازۋشىلار وداعى توراعاسىنىڭ ورىنباسارى عالىم قاليبەك ۇلى, ۇلت پروزاسىنا «اسپانقورا», «قۇرالايدىڭ سالقىنى», «قىزىل قار», «اياز بي» سەكىلدى سۇبەلى شىعارمالار سىيلاعان قالامگەردىڭ جازۋ ونەرىندەگى جارقىن جولى تۋرالى ايتا كەلىپ, «قازاق ادەبيەتى» گازەتى جۇماعاڭ باسقارعان جىلدارى ەرەكشە مازمۇنمەن جارىق كورگەنىن اتاپ ءوتتى.
ال ادەبيەت سىنشىسى بەكەن ىبىرايىم: «پروزا تاريحىندا بىردەن ءوز بەتىن ايقىنداپ, ءونىمدى جولعا تۇسكەندەر دە, بەرتىنگە دەيىن ارقيلى ىزدەنىستەر ءورىسىن شارقۇرىپ شارلاپ, ءوزىن-ءوزى سىناپ بارىپ, تابىستارعا جەتكەندەر دە از ەمەس. جۇماباي شاشتاي ۇلىن بىردەن-اق ءوز جولىن تاپقان باقىتتى قالامگەرلەردىڭ قاتارىنا قوسار ەدىك. شىعارماشىلىق نىساناسىن بىردەن ايقىنداپ, ءتۇرلى يزمدەرگە ەلىكتەپ-سولىقتاماي, شىندىقتى التىن ارقاۋ ەتىپ تاڭدادى دا, سول باعىتتا ءوزىنىڭ كوركەمدىك الەمىن جاسادى. ول قاي شىعارماسىندا بولسىن, ەڭ الدىمەن ەل ومىرىندەگى ايتۋلى وزگەرىستەردى, ادامداردىڭ تاعدىرىن, تابيعاتىن, قاراپايىم تىرشىلىگىن قالامىنا وزەك ەتتى», دەپ ەسكە الدى.
جازۋشى تۋعان توپىراق جامبىل اۋدانى جۇرتشىلىعىنىڭ ىقىلاسىن الا كەلگەن اۋدان اكىمى نۇرلان ەرتاس ۇلى, جەرلەستەرى جۇماعاڭنىڭ ادەبيەت پەن جۋرناليستيكاداعى ونەگەسىن ماقتان تۇتاتىنىن, ونىڭ شىعارماشىلىق ەڭبەكتەرى ۇرپاققا مۇرا ەكەنىن اتاپ ءوتتى.
الماتى