كەنشىلەر اۋلەتى

شاحتينسك قالاسىنىڭ ىر­گەسىندەگى «Qarmet» كومپانيا­سىنا قاراستى «قازاقستان» شاحتاسى بۇل وتباسىنىڭ ەكىنشى شاڭىراعى ىسپەتتى. اۋلەتتىڭ شاحتاداعى ءداۋىرى داڭقتى كەنشى سەمبى ابساتوۆتىڭ «دولينسكايا» شاحتاسىنا جۇمىسقا ورنالاسۋىمەن باس­تالادى. سەمبى كەيىن ءوزىنىڭ باۋىرلارىن دا قاسىنا جۇمىسقا تارتادى. بۇگىندە كەنشىلەر اۋلەتىنىڭ ءۇشىنشى بۋىنى دا ابىرويلى ماماندىقتى ميراس ەتىپ, اتالارىنىڭ ءداستۇرلى جولىن جاراستىقتى جالعاپ كەلەدى.

«وتباسىمىزدا سەگىز اعايىن­دىمىز. اكەمىز ابسات ومىردەن ەرتە ءوتتى. انامىز ءبىزدى جالعىز ءوزى ءوسىرىپ-تار­بيەلەدى. شاحتاعا ەڭ ءبىرىنشى بولىپ اعالارىمىز سەمبى, ودان كەيىن سەمبەك پەن كەڭەس جۇمىسقا ورنالاسادى. كەڭەس اعا «قازاقستان» كەنىشىندە رەلستى تاسىمالداۋ ءبولىمىنىڭ ەلەكتروۆوز ءماشينيسى بولىپ 53 جىلدان استام ەڭبەك ەتتى. سەمبى شاحتانىڭ رەلستى تاسىمالداۋ ءبولىمىنىڭ جەراستى وقپانشىسى بولىپ 48 جىلدان استام ۋاقىت شاحتادا جۇمىس ىستەدى. مەنىڭ دە ەڭبەك ءوتىلىم 40 جىلعا جۋىقتادى. بۇل ءبىزدىڭ وتباسىلىق ماماندىق دەسە دە بولادى. ايەلىم ساۋلە دە, باۋىرلارىم مەن كەلىندەرىم دە وسى كەنىشتە ەڭبەك ەتەدى»,  دەي­دى مايتالمان كەنشى مارال جامپەيىسوۆ.

بۇگىندە م.جامپەيىسوۆ «قازاقستان» كەنىشى كا­سىپوداق كوميتەتىنىڭ تور­اعاسى. جارى ساۋلە جام­پەيىسوۆا كەنىشتىڭ اۆتوماتيكا جانە بايلانىس بولىمىندە تەلەفونيست بولىپ جۇمىس ىستەيدى. ابساتوۆتار اۋلەتىنىڭ ءۇشىنشى بۋىنى تالعات, جانات, مۇرات, ءتورتىنشى بۋىن جانات ابساتوۆتىڭ ۇلى الىبەك اباەۆ پەن كەلىندەرى عايني, رىمبالا, گۇلنازيا دا وسى كەنىشتە ەڭبەك ەتىپ, كومىر ءوندىرىسىنىڭ وركەندەۋىنە ۇلەس قوسىپ ءجۇر.

م.جامپەيىسوۆ – I, II, III دارەجەلى «كەنشى داڭقى» وردە­نىنىڭ, «ەڭبەك ارداگەرى» مەدالىنىڭ يەگەرى. كومىر ونەر­كاسىبىنىڭ قۇرمەتتى قىزمەت­كەرى.

كەڭەس پەن جارى رىمبالا دا «قازاقستان» شاحتاسىنا ەڭبەگى سىڭگەن جاندار. ەكەۋى تابان اۋدارماي, وتىز جىلدان اسا ءبىر كەنىشتە جۇمىس ىستەدى.

– اكەم 1976 جىلدىڭ اقپا­نىندا شاحتاعا قاتارداعى جۇ­مىسشى بولىپ كىردى. كەيىن ەلەكتروۆوز ءماشينيسىن وقىپ, 2007 جىلعا دەيىن وسى قىزمەتىن ابىرويمەن اتقاردى. II, III دارەجەلى «ەڭبەك داڭقى» وردەنىنىڭ يەگەرى. قازىردە قۇرمەتتى زەينەت دەمالىسىندا. انامىز رىمبالا 1979 جىلى شاحتاعا زاڭگەر بولىپ ورنالاسىپ, 2008 جىلعا دەيىن ەڭبەك ەتتى, – دەيدى تالعات كەڭەس ۇلى.

تالعاتتىڭ ءوزى دە اكە جولىن جالعاپ, 1998 جىلعى تامىزدا شاحتاعا تاۋ-كەن شەبەرى بولىپ جۇمىسقا ورنالاسقان. سودان بەرى شاحتينسك قالاسى ىرگەسىندەگى شاحتانىڭ بەلدى كەنشىسى. قالعان ءۇش باۋىرى قاراعاندى مەملەكەتتىك تەح­ني­كالىق ۋنيۆەرسيتەتىن ءتامامداپ, ءوندىرىس سالاسىندا ەڭبەك ەتىپ ءجۇر.

سەمبەك «قازاقستان» كەنى­شىندە بۇرعىلاۋشى, جارى عايني لامپاشى بولىپ ەڭبەك ەتتى. اعالارى سەمبىنىڭ دە بالالارى تاۋ-كەن سالاسىندا. اباي ابساتوۆتىڭ ۇلدارى دا اتالارىنىڭ ءىزىن لايىقتى جالعاپ ءجۇر.

– جانات شاحتادا 2003 جىلدان بەرى بۇرعىلاۋشى بولىپ جۇمىس ىستەيدى. مۇرات 2000 جىلدان باستاپ تاۋ-كەن قازۋ ءماشي­نيسى. جاناتتىڭ ۇلى الىشەر دە وسىدان ەكى جىل بۇرىن شاحتاعا جۇمىسقا ورنالاستى. ول كەنشى عانا ەمەس, دجيۋ-دجيتسۋدان ەلىمىزدىڭ چەمپيونى, قول كۇرەستەن سپورت شەبەرى, – دەيدى اۋلەتتىڭ ۇلكەنى م.جامپەيىسوۆ.

وسىلايشا, ءبۇتىن ءبىر اۋلەت­تىڭ «قازاقستان» شاحتاسىنا دا, قازاق ەلىنە دە ەڭ­بەكپەن سىڭىرگەن ۇلەسى زور. ەسەلى ەڭبەكتەن ابىروي تاپقان اعايىندىلاردىڭ اتا داستۇرگە, ماماندىققا ادالدىعى, بەرەكە-بىرلىگى كوپشىلىككە ۇلگى-ونەگە.

قاراعاندى وبلىسى