الماتىدا قالا كۇنىن مەرەكەلەۋ اياسىندا ءداستۇرلى «KitapFest» فەستيۆالى ءوتتى. وقىرمان ولجاسىنا اينالعان جوبادا بيىل 60 باسپادان شىققان 10 مىڭنان استام كىتاپ ۇسىنىلعان بولسا, ونىڭ 2 مىڭعا جۋىعى – تۇڭعىش رەت جارىق كورگەن تىڭ تۋىندىلار.
ەكى كۇن قاتارىنان اربات الاڭىندا وتكەن ايشىقتى جارمەڭكەگە باس-اياعى قىرىق مىڭنان استام ادام جينالدى. بۇل ءوز كەزەگىندە كىتاپتىڭ – تەك ءبىلىم قۇرالى عانا ەمەس, ادامداردى جاقىنداستىراتىن, ويدى تەرەڭدەتەتىن, مادەنيەتتى وركەندەتەتىن كۇش ەكەنىن تاعى ءبىر مارتە كورسەتتى. شابىت پەن شىعارماشىلىق سالتانات قۇرعان مەرەكەدە قالامگەرلەر مەن وقىرماندار اراسىندا جاندى ديالوگ ورنادى. بيگەلدى عابدۋللين, ساۋلە دوسجان, اقبەرەن ەلگەزەك, باقىت بەدەلحان, سانجار كەرىمباي, ماقسات مالىك, ەرلان ءجۇنىس, ناتاليا گورياچەۆا, ليۋدميلا لازارەۆا, ۆاسيلي شۋپەيكين سىندى تانىمال اۆتورلار وقىرمانمەن كەزدەسۋ وتكىزىپ, شىعارماشىلىق تاجىريبەسىمەن ءبولىستى.
بيىلعى فەستيۆالدىڭ اۋقىمى كەڭ. «جاندى كىتاپحانا» جوباسىندا ابايدان باستاپ شەكسپيرگە دەيىنگى كلاسسيكتەر ء«تىرىلىپ», اكتەرلەر بەينەسىندە كورەرمەنمەن سۇحبات قۇردى. كىشكەنتاي وقىرماندار ءۇشىن قيال-عاجايىپ دەكوراتسيالار مەن ادەبي كۆەستتەر ۇيىمداستىرىلعان «Estelik zone» ايماعى كىتاپ مەرەكەسىنىڭ ماڭىزىن ارتتىردى.
ءىس-شارادا «كىتاپاشار» دەپ اتالعان ەرەكشە ايدار كوپشىلىك كوڭىلىنەن شىقتى. مۇندا بۋكينيستىك دۇكەن وقىرماندارعا كىتاپتى مۇقاباسى نەمەسە اننوتاتسياسىنا قاراپ ەمەس, وزگە وقىرمانداردىڭ اسەرلەرى ارقىلى تاڭداۋعا مۇمكىندىك بەردى.
«تسيفرلى عاسىردا الەم اقپارات اعىنىنا باتىپ بارادى. الەۋمەتتىك جەلى, قىسقا بەينەروليكتەر مەن ءۇستىرت كونتەنتتەر ادامنىڭ نازارى مەن ۋاقىتىن يەمدەنىپ الدى. زەرتتەۋلەرگە سۇيەنسەك, كەيىنگى ون جىلدا ۇزاق ءماتىن وقۋعا دەگەن شىدامدىلىق كۇرت تومەندەگەن. بىراق بۇل كىتاپتىڭ ءمانى جوعالدى دەگەن ءسوز ەمەس. كەرىسىنشە, رۋحاني اشتىق ارتقان سايىن ادام بالاسى قايتادان كىتاپقا بەت بۇرادى. كىتاپ – ادامدى اداستىرمايتىن شامشىراق. وقىعان ادام – ويلى ادام. ال ويلى قوعام – وركەنيەتتى قوعام. سوندىقتان تسيفرلىق داۋىردە كىتاپتىڭ قادىرىن ارتتىرۋ – ارقايسىمىزدىڭ بورىشىمىز», دەيدى م.اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى ەرعانات قۋاتبەك ۇلى.
كىتاپ مەرەكەسىندە وقۋ مادەنيەتىن ەرتە جاستان قالىپتاستىرۋ, كىتاپتى جاڭا فورماتتا ناسيحاتتاۋ, كىتاپحانالاردى جاڭعىرتۋ ماسەلەسى دە سارالاندى. اسىرەسە «كىتاپفەست», «وقى جانە ءبولىس», ء«بىر ايدا – ءبىر كىتاپ» سەكىلدى جوبالار كىتاپتى ترەندكە اينالدىرا الاتىنى, Tik Tok, Instagram ءتارىزدى تانىمال الاڭدار ارقىلى مازمۇندى شىعارمالاردى ناسيحاتتاۋ, بەلگىلى تۇلعالاردىڭ كىتاپ تۋرالى وي ءبولىسۋى كىتاپ وقۋ مادەنيەتىن جانداندىرۋعا وڭتايلى اسەر ەتەتىنى ايتىلدى.
الماتى