تاڭداي قاقتىرار قابىلەت يەسى, التىن قولدى اۆتومەحانيك, اۋىلىنىڭ ارداقتى اقساقالى ءبورىباي ىسقاقوۆتى كۇللى قارقارالى جۇرتى تانيدى. ءبىر جاسىندا شەشەك اۋرۋىنا شالدىعىپ, جانارىنان ايىرىلعان تاعدىر يەسىنىڭ تالانتى تالايدى تاڭعالدىرادى. جاسى جەتپىس جەتىگە كەلسە دە قابىلەتتى قاريانىڭ كۇش-قۋاتى ءالى بويىندا. وسى جازدىڭ وزىندە اۋىلىنداعى ءۇش تراكتوردىڭ موتورىن جيناپ بەرىپتى.
قارقارالى ءوڭىرىنىڭ «اۆتودياگنوستيكاسى» اتانىپ كەتكەن ءبورىباي اقساقال وسى ءبىر ەڭبەگىنە اقى المايدى. «اقىنىڭ ەڭ قىمباتى – ادامنىڭ العىسى», دەيدى اتى اڭىزعا اينالعان اۆتومەحانيك. بويىنان بۇلقىنىپ شىققان بۇل قابىلەتى بالا كەزىندە بايقالسا كەرەك. وزدىگىنەن اۋىلداعى بالالاردىڭ ۆەلوسيپەدىن بۇزىپ, ونى قايتا قۇراپ, قولىن جاتتىقتىرادى. سودان سوڭ ۇيىندەگى راديوقابىلداعىش قۇرىلعىسىنىڭ مەحانيزمىن اشىپ-شاشىپ, ونى دا وڭاي مەڭگەرىپ العان جاس بالا اۋىلىنىڭ قاجەتىنە جارايدى. العاش شىققان لامپالى تەلەديداردىڭ دا قۇرىلىمىن تەز مەڭگەرىپ الادى. جانىپ كەتكەن ولارعا قايتا جان ءبىتىرىپ جۇرگەن كەزىندە ول ون جاستان ەندى اسقان كورىنەدى.
سودان بەرى اۆتومەحانيك ماماندىعىنا ماشىقتانادى. اۋىلدىڭ ەلەكتريگى دە ءوزى. اقباي-قىزىلباي اۋىلىنداعى اعايىن ىستەن شىققان توڭازىتقىش, مۇزداتقىش, تسيفرلى تەلەديدارلارىن قالاعا تاسىپ اۋرە بولمايدى. ءبورىباي اقساقال سيقىرلى ساۋساعىمەن-اق جان بىتىرەدى. ءتىپتى تاڭعاجايىبى, كەيىنگى شىققان پلازمالى تەلەديداردىڭ دا ءتىلىن ۇعىنىپ الادى. كەيىنگى كەز كەلگەن زاماناۋي تەحنيكاڭىزدى جوندەۋ ءبورىباي شەبەرگە ءسوز ەمەس. سودان دا بولار, قۇداي دارىتقان بۇل قاپىسىز قارىم-قابىلەتىن اقساقال ساۋدالاعان جوق.
اۆتومەحانيك اقساقالدىڭ كولىكتىڭ قاي بولشەگى ىستەن شىققانىن دىبىسىن تىڭداپ-اق تاباتىن قابىلەتى دە ەرەكشە دامىعان. اسىرەسە اۋىل شارۋاشىلىعى تەحنيكالارىنىڭ اقاۋىن تەز انىقتاپ بەرەدى. بولشەكتى اعىتىپ الىپ, قايتا جوندەپ, ونى ورنىنا ورنىقتىرعانشا ءبورىباي اقساقال بايىز تاپپايدى. وسى جازدىڭ وزىندە ءۇش تراكتوردىڭ موتورىن قايتا جيناپ شىعىپتى. ەكى-ءۇش «نيۆا» كولىگىنىڭ الدىڭعى تىرەگىن جاڭالاعان. جانە ۇنەمى وزىنە قولعابىس جاساپ جۇرەتىن ءىنىسىنىڭ كولىگىندەگى مەحانيكالىق بەرىلىس قورابىن جوندەپ بەرىپتى.
ودان بولەك, كولىكتىڭ دە كەز كەلگەن تۇيىقتالىپ قالعان توعىن قالپىنا كەلتىرەدى. اۆتوكولىكتىڭ رەدۋكتورى, داتچيگى, رەلەسى دەگەن بولشەكتەردى دە جازباي تانيدى. ەڭ العاش ءبىر مالعا الىنعان «موسكۆيچ-2140» كولىگىن جوندەپتى. ء«بىر ءوزىم ەسىگىن جاڭالاپ سالىپ, توقتارىن رەتكە كەلتىرگەن كەزىمدە جالىنداعان جاس جىگىت ەدىم», دەيدى.
«تەمىردە دە ءتىل بار. ونى سەزىنە ءبىلۋ كەرەك. قۇداي وسىنداي قابىلەت بەرگەن ەكەن, ءدان ريزامىن. ەڭ كۇشتى ەرمەگىم – وسى شارۋام. ەكى كوزىمنىڭ قىزمەتىن ەكى قولىم ارتىعىمەن اتقارىپ وتىر. سوعان تاۋبە ەتەمىن. ەگەر وسىنداي ونەرىم بولماسا, بۇل ءومىردى قالاي وتكەرەتىنىمدى دە ەلەستەتە المايمىن. وسى ءبىر جۇمىستان بويىما كۇش الامىن. سەكسەننىڭ سەڭگىرىنە دە جاقىنداپ قالدىق. وڭاي جاس ەمەس. قۇداي بەرگەن قابىلەتىم اۋىلىمنىڭ يگىلىنە جاراپ تۇر. سونى كوڭىلىمە مەدەت قىلامىن», دەيدى مايتالمان مەحانيزاتور.
ايتپاقشى, ءبورىباي اقساقالدىڭ ادال جارى رايا اجەيسىز شارۋاسى تىنبايدى. كوپ-كورىم كومەكشىسى. رايا اجەي دە كىلت-سايماننىڭ ءتۇر-تۇسىنە دەيىن بىلەدى. اۆتومەحانيكتىڭ وڭ قولىنا اينالعان اجەي دە تەحنيكانىڭ ءتىلىن ءبىرشاما ءتۇسىنىپ قالعان.
اۋىلدىڭ دۇرىلدەپ تۇرعان تۇسىندا ءبورىباي اقساقالسىز توي دا, مەرەكەلىك كونتسەرت تە وتپەيتىن بولىپتى. ويتكەنى دومبىراسىن شەرتىپ, بايانىن تارتىپ ءان سالعاندا ساحنا شىركىن جايناپ كەتەتىن ەدى دەيدى ەل-جۇرت. بالا كەزىنەن ءان-جىرعا اۋەستەنگەن كەيىپكەرىمىز دومبىرانىڭ قوڭىر ءۇنىن جانىنا جالاۋ قىلادى. ءان ونەرىنەن ومىرىنە وسىلايشا ءار الادى.
اۋىلىنان الىستاعىسى كەلمەيدى. الايدا قاجىرلى كەزىندە قالاعا دا كوشكىسى كەلەدى. وكىنىشكە قاراي, وسىدان ون شاقتى جىل بۇرىن اۋىلداعى قاراشاڭىراعىنىڭ توبەسى توزىپ, وپىرىلىپ ورتاسىنا ءتۇسىپتى. سودان بوس قالعان اۋىلداسىنىڭ ۇيىندە تۇرىپ جاتىر. قاراعاندىعا بولماسا دا, قارقارالىعا كوشسەك دەيدى. تاعدىرىنا ەشقانداي شاعىمى جوق ءبىرىنشى توپ مۇگەدەگى شاعىن بولسا دا پاتەر ارمانداپ وتىر. رايا اجەي ەكەۋىنىڭ ەندىگى ەلگە ارتار ءۇمىتى, اماناتى وسىنداي. ءبىزدىڭ دە اقجۇرەك اۆتومەحانيكتىڭ, عالامات دارىن يەسىنىڭ ءوز باسپاناسىنا قول جەتكىزەتىن كۇننىڭ الىس ەمەستىگىن ءىشىمىز سەزەدى.
قاراعاندى وبلىسى,
قارقارالى اۋدانى,
اقباي-قىزىلباي اۋىلى