جەتىسۋ وبلىسى قۇرىلعاننان بەرى 20 جاڭا ءبىلىم ورداسى سالىنىپ, 22-ءسى كۇردەلى جوندەۋدەن وتكەن. بۇگىندە ارنايى قور ەسەبىنەن 2 بىردەي ءبىلىم بەرۋ نىسانىنىڭ قۇرىلىسى ءجۇرىپ جاتىر. ونىڭ ءبىرى – كوكساي اۋىلىندا بولسا, ءبىرى – تەكەلى قالاسىندا. ولار كەلەر جىلى وقۋشىلارعا ەسىگىن اشادى.
بەيىمدەلگەن مەكتەپ سانى ازايدى
بۇرىنىراقتا قارالماي كەلگەن شەتكەرى اۋداندارداعى ءبىلىم نىساندارىنا زاماناۋي وقۋ-قۇرالدارى جەتىپ, ءتىپتى IT-تەحنولوگيانىڭ اۋىل بالاسىنا ۇيرەتۋگە مۇمكىندىك تۋدى. قازىر قۇرىلىس ءجۇرىپ جاتقان قوس نىساندى اكىمدىك باقىلاپ وتىر. كەربۇلاق اۋدانىنا قاراستى كوكساي اۋىلىنداعى 60 ورىندىق ورتا مەكتەبىنىڭ قۇرىلىسى اياقتالىپ قالدى. ونى جىل سوڭىنا دەيىن پايدالانۋعا بەرۋ جوسپارلانعان. تەكەلى قالاسىنداعى رۋدنيچنىي مەكتەبىنىڭ قۇرىلىسى – 50 پايىز, اياقتالۋى مەرزىمى 2026 جىلدىڭ قاڭتار ايى دەپ كورسەتىلگەن.
«وڭىردە سوڭعى ءۇش جىلدا الەۋمەتتىك ينفراقۇرىلىمدى دامىتۋ قارقىندى جۇرگىزىلىپ كەلەدى. وبلىستىڭ قايتا قۇرىلۋىمەن باستالعان جاڭعىرۋ جولى بۇگىندە ناقتى ناتيجەلەرىن بەرىپ, ەلدى مەكەندەردىڭ ەڭ وزەكتى ماسەلەلەرىنىڭ شەشىلۋىنە جول اشتى. اسىرەسە ءبىلىم سالاسىندا اۋقىمدى جۇمىس اتقارىلىپ, وڭىردەگى وقۋشىلارعا قولايلى جاعداي جاسالىپ وتىر», دەيدى وبلىستىق ءبىلىم باسقارماسىنىڭ باسشىسى داۋرەن ءجۇنىسوۆ.
وبلىس اكىمى ءباسپاسوز قىزمەتىنىڭ مالىمەتىنشە, وڭىردە الەۋمەتتىك نىسانداردى جاڭارتۋ كورسەتكىشى 60 پايىزدان اسقان. بۇل – مەملەكەتتىك قولداۋ مەن جەرگىلىكتى باسقارۋ جۇيەسىنىڭ ۇيلەسىمدى جۇمىسىنىڭ ناتيجەسى. وبلىس قۇرىلعالى جاڭادان بوي كوتەرگەن ءبىلىم وردالارىنىڭ جالپى سىيىمدىلىعى 5 310 وقۋشى ورنىن قۇرايدى.
«ماسەلەن, اقسۋ, سارقان, قاراتال اۋداندارى مەن تالدىقورعان قالاسىندا – ەكى مەكتەپتەن, كوكسۋ اۋدانىندا – ءۇش مەكتەپ, پانفيلوۆ اۋدانىندا ءتورت مەكتەپ بوي كوتەردى. وسى ورايدا ەرەكشە اتاپ وتەرلىك نىسان – جاركەنت قالاسىندا «كەلەشەك مەكتەپتەرى» ۇلتتىق جوباسى اياسىندا تۇرعىزىلعان 1200 ورىندىق زاماناۋي ءبىلىم ورداسى. بۇل تەك جاڭا عيمارات ەمەس, جاڭا كوزقاراس, جاڭا مۇمكىندىكتەر مەكتەبى دەسە بولادى», دەيدى د.ءجۇنىسوۆ.
جاڭا مەكتەپتەردىڭ اشىلۋى ناتيجەسىندە بۇرىنعى كەڭسە, بالاباقشا سياقتى بەيىمدەلگەن عيماراتتاردا ءبىلىم العان وقۋشىلاردىڭ جاعدايى جاقساردى. ەگەر 2022 جىلى وبلىس اۋماعىندا 69 بەيىمدەلگەن مەكتەپ بولسا, قازىر 39-عا قىسقارعان. مىسالى, سارقان اۋدانىنىڭ بىرلىك اۋىلىندا اشىلعان جاڭا مەكتەپتە وقۋشىلار ءبىر اۋىسىمدا وقىپ, تۇستەن كەيىن ءتۇرلى ۇيىرمەلەرگە قاتىسادى.
«بۇرىن ەسكى عيماراتتىڭ تار بولمەلەرىندە ەكى اۋىسىمدا وقيتىن ەدىك. قازىر كەڭ ءارى جارىق سىنىپتاردا ساباق وقيمىز. حيميا, فيزيكا, بيولوگيا پاندەرىنە ارنالعان زەرتحانالىق كابينەتتەر, اسحانا, سپورت زال – ءبارى زاماناۋي تالاپقا ساي. ءتىپتى فۋتبول وينايتىن گازون الاڭى دا بار», دەيدى مەكتەپ وقۋشىسى اقنۇر جالىنباي.
قالاي دەسەك تە, 2025 جىل – جەتىسۋداعى ءبىلىم سالاسى ءۇشىن جاڭا بەلەس بولماق. بيىلدىڭ وزىندە 1080 وقۋشىعا ارنالعان ءتورت جاڭا مەكتەپ ەل يگىلىگىنە بەرىلەدى. اتاپ ايتقاندا, الاكول اۋدانىنىڭ دوستىق اۋىلىندا, اقسۋ اۋدانىنىڭ كولتابان اۋىلىندا, پانفيلوۆ اۋدانىنىڭ لەسنوۆكا اۋىلىندا, كەربۇلاق اۋدانىنىڭ كوكساي اۋىلىندا جاڭا مەكتەپتەر سالىنىپ جاتىر. بۇل – اۋىل مەن قالا اراسىنداعى ءبىلىم ساپاسىن تەڭەستىرۋگە جاسالعان تاعى ءبىر ماڭىزدى قادام.
ءۇش اۋىسىمدى ءبىلىم وشاعى جوق
وبلىستا ءۇش اۋىسىمدى مەكتەپ ماسەلەسى تولىق شەشىلگەن. الايدا كەيبىر اۋدانداردا وقۋشى سانىنىڭ ءوسۋى مەن دەموگرافيالىق كورسەتكىشتەردىڭ جوعارى بولۋىنا بايلانىستى وبلىس اكىمدىگى الدىن الا ارەكەت ەتىپ, جاڭا مەكتەپتەر سالۋدى كەزەڭ-كەزەڭىمەن جۇزەگە اسىرىپ كەلەدى. بۇل – ءبىلىم سالاسىنىڭ ۇزدىكسىز جۇمىسىن قامتاماسىز ەتۋدىڭ ماڭىزدى العىشارتى.
«جەتىسۋ وڭىرىندە جۇرگىزىلىپ جاتقان ءبىلىم جوبالارى مەملەكەت باسشىسىنىڭ دا نازارىندا. پرەزيدەنتىمىزدىڭ تالدىقورعان قالاسىنداعى ىنتىماق اۋىلىنداعى جاڭا مەكتەپتى رەسپۋبليكاعا ۇلگى رەتىندە اتاپ ءوتۋى بۇل باعىتتاعى جۇمىستىڭ تيىمدىلىگىن دالەلدەيدى. ءۇش جىلدىڭ ىشىندە وبلىستا 270 الەۋمەتتىك نىسان جاڭادان سالىنىپ, كۇردەلى جوندەۋدەن ءوتتى. بۇل – تەك ساندار مەن كورسەتكىشتەر عانا ەمەس, بولاشاققا سالىنعان ينۆەستيتسيا. جەتىسۋ وبلىسى ءبىلىم سالاسىندا ايقىن ماقسات قويىپ, جۇيەلى تۇردە ناتيجە كورسەتىپ كەلەدى. ءاربىر جاڭادان اشىلعان مەكتەپ – ءۇمىت پەن سەنىمنىڭ, بولاشاقتىڭ مەكتەبى. بۇل مەكتەپتەردە جاڭا بۋىن قالىپتاسىپ, جاڭا قازاقستاننىڭ تىرەگى بولاتىن ازاماتتار تاربيەلەنەدى», دەيدى وبلىس اكىمىنىڭ ورىنباسارى مارلەن كولباەۆ.
شىنىندا, شەكارالىق اۋداندارعا كوڭىل كوپ ءبولىنىپ وتىر. ماسەلەن, پانفيلوۆ اۋدانى – حالىق سانىنىڭ ءوسۋى, الەۋمەتتىك جانە ەكونوميكالىق دامۋ قارقىنى جونىنەن وبلىستا الدىڭعى قاتاردا تۇر. ءۇش جىل ىشىندە اتالعان ايماق سەرپىلىس كەزەڭىنە اياق باستى. مۇندا بىرنەشە الەۋمەتتىك جانە ينۆەستيتسيالىق جوبا جۇزەگە اسىپ, حالىقتىڭ ءومىر ءسۇرۋ ساپاسى ەداۋىر جاقساردى. جاركەنت قالاسىنداعى «كەلەشەك مەكتەپتەرى» ۇلتتىق جوباسى اياسىندا جاڭادان سالىنعان 1 200 ورىندىق مەكتەپ سونىڭ ءبىر دالەلى
«زاماناۋي ۇلگىدەگى ءبىلىم ورداسى بارلىق تالاپقا ساي جابدىقتالعان. ءبىلىم وشاعىندا 64 سىنىپ, ونىڭ ىشىندە 6 جاڭا ۇلگىدەگى, touch-ەكراندارمەن جابدىقتالعان ارنايى ءپان كابينەتتەرى بار. سونىمەن قاتار ەكى ينفورماتيكا كابينەتى, كەڭ كولەمدى كىتاپحانا, اكت جانە بي زالى, ۇلكەن اسحانا, شىعارماشىلىق پەن دەمالىسقا ارنالعان كوۆوركينگ ايماقتارى مەن شەبەرحانالار بار», دەيدى مەكتەپ ديرەكتورى ايگۇل دارۋباەۆا.
بالالار مۇندا ءبىر اۋىسىممەن وقيدى, ال تۇستەن كەيىن ءارتۇرلى تەگىن ۇيىرمەلەرگە قاتىسادى. مۇمكىندىگى شەكتەۋلى بالالاردا دا بارلىق جاعداي قاراستىرىلعان.
وڭىردە جالپى 232 اۋىل مەكتەبىنىڭ ماتەريالدىق-تەحنيكالىق قورى جابدىقتالعان. بارلىق ورتا مەكتەپ ينتەرنەت جەلىسىنە قوسىلعان. بيىل ينتەرنەت جىلدامدىعى تومەن 43 مەكتەپ «Starlink» تەحنولوگياسى ارقىلى جوعارى جىلدامدىقتى ينتەرنەتكە تىركەلدى. ءبىلىم ۇيىمدارى تسيفرلىق ءبىلىم پلاتفورمالارىن پايدالانادى. مەكتەپتەردە 734 جاڭارتىلعان زاماناۋي وقۋ كابينەتى جۇمىس ىستەپ تۇرسا, بيىل تاعى 70 زاماناۋي وقۋ كابينەتىن ساتىپ الۋ جوسپارلانىپ وتىر. ءبىلىم ۇدەرىسىن قارجىلاندىرۋدىڭ اشىقتىعىن قامتاماسىز ەتۋ ماقساتىندا تالدىقورعان قالاسىنداعى بارلىق مەكتەپكە دەيىنگى ۇيىمدار مەن 100 مەكتەپتە «الەۋمەتتىك ءاميان» جۇيەسى ارقىلى ۆاۋچەرلىك قارجىلاندىرۋ ەنگىزىلگەن.
ايتا كەتەيىك, ەڭبەك نارىعىنىڭ قاجەتتىلىگىنە قاراي سۇرانىسقا يە ماماندىقتارعا سوڭعى ءۇش جىلدا جەرگىلىكتى بيۋدجەتتەن 300-دەن استام ءبىلىم گرانتى بولىنسە, ونىڭ 104-ءى پەداگوگيكالىق ماماندىققا بەرىلگەن.
جەتىسۋ وبلىسى