پانفيلوۆ اۋدانىنىڭ ورتالىعى جاركەنت قالاسىندا تاۋلىگىنە 120 توننا جۇگەرى ءدانىن كەپتىرۋگە جانە 110 توننا تۇيىرشىكتەلگەن جەم شىعارۋعا قاۋقارلى زاماناۋي زاۋىت پايدالانۋعا بەرىلدى. قازاقستان مەن قىتايدىڭ بىرلەسكەن ينۆەستيتسيالىق جوباسى ارقاسىندا وڭىرگە 500 ملن تەڭگە كولەمىندە قارجى تارتىلدى.
جاركەنت تۋرالى اڭگىمە قوزعاي قالساڭىز, جۇگەرى شارۋاشىلىعىنان اينالىپ وتە المايسىز. بۇگىندە وبلىس كولەمىندە ءداندى داقىلدى وڭدەۋدە الدىڭعى ورىندا كەلە جاتىر. ءوڭىر تۇرعىندارىنىڭ ءتول داقىلىنا اينالعان جۇگەرىنىڭ ەگىس كولەمى بيىل 4 000 گەكتارعا جۋىق قىسقارىپ, جالپى 23 398 گەكتاردان استام جەرگە ەگىلدى. دەگەنمەن «دالا ارۋىن» ءتيىمدى پايدالانۋ ءداستۇرى نارىق تالابىنا بەيىمدەلىپ, جاڭعىرىپ جاتىر. وعان دالەل جاڭادان اشىلعان – قۇراما جەم زاۋىتى.
«كەپتىرۋ كەشەنى بار زاۋىتتىڭ ىسكە قوسىلۋى – جەرگىلىكتى شارۋالار ءۇشىن ۇلكەن قولداۋ. بۇدان بىلاي ديقاندار ءوز ءونىمىن ۋاقىت جوعالتپاي, ساپالى تۇردە كەپتىرەدى. بۇل تەك شىعىندى ازايتىپ قانا قويمايدى, سونىمەن قاتار شيكىزاتتى ۇزاق ساقتاۋعا مۇمكىندىك بەرەدى. مۇنىڭ ءبارى اۋىل شارۋاشىلىعى ونىمدەرىن وندىرۋشىلەردىڭ تابىسىن ارتتىرۋعا جانە ءوڭىر ەكونوميكاسىنىڭ دامۋىنا تىكەلەي ىقپال ەتەدى», دەدى پانفيلوۆ اۋدانىنىڭ اكىمى مارات ساعىمبەك.
زاۋىت ىسكە قوسىلعان ساتتەن باستاپ 30 ادام تۇراقتى جۇمىسپەن قامتىلعان. كاسىپورىن ديرەكتورى ەربول ورنەكەەۆتىڭ ايتۋىنشا, زاۋىت قۇرىلىسى وتكەن قىركۇيەكتە باستالعان. قىتايدان اكەلىنگەن جوعارى تەحنولوگيالى قوندىرعىلار كومەگىمەن زاۋىت تولىق قۋاتىنا شىققاندا ەكى اۋىسىمدا جۇمىس ىستەپ, اي سايىن 200 مىڭ توننادان استام جەم وندىرە الادى.
«شارۋالاردان باستاپقىدا تاۋلىگىنە 50 تونناعا دەيىن جۇگەرى قابىلدايمىز. ال بولاشاقتا ءوندىرىستى كەڭەيتىپ, ىشكى نارىقتى دا, ەكسپورتتى دا قامتيمىز. قازىرگى جوسپارىمىز – دايىن ءونىمدى قىتاي, يران جانە وزبەكستانعا جەتكىزۋ. ءونىمنىڭ ساپاسى ارنايى زەرتحانادا قاتاڭ تەكسەرۋدەن وتەدى», دەيدى زاۋىت باسشىسى. ايتۋىنشا, زاۋىت مالعا, قۇسقا جانە بالىققا ارنالعان جەمنىڭ بىرنەشە ءتۇرىن شىعارادى. بۇل وڭىردەگى مال شارۋاشىلىعى مەن قۇس شارۋاشىلىعىنا تىڭ سەرپىن بەرەدى.
وبلىس جۇگەرى ءوسىرۋ كولەمى جونىندە رەسپۋبليكادا الدىڭعى ورىندا تۇر. بيىل وڭىردە جۇگەرى ەگىستىگىنىڭ جالپى كولەمى 42,2 مىڭ گەكتارعا جەتتى. سونىڭ 23,1 مىڭ گەكتارى – پانفيلوۆ اۋدانىنىڭ ۇلەسىندە. مامانداردىڭ بولجامىنشا, الداعى ناۋقاندا كەمىندە 300 مىڭ توننا ءونىم جينالادى. اۋىل شارۋاشىلىعى سالاسىنىڭ ارداگەرى, اگرونوم قابىلحان نۇرسەيىتوۆ بۇل زاۋىتتىڭ اشىلۋىن ايماق ءۇشىن ۇلكەن جەتىستىك دەپ باعالادى.
«بۇرىن شارۋالار ءونىمدى كەپتىرۋ, ساقتاۋ جاعىنان ءبىراز قيىندىق كورەتىن. كەيدە جۇگەرى ۋاقتىلى وڭدەلمەي, ساپاسى تومەندەپ كەتەتىن. جاڭا كەشەن سول ماسەلەنى شەشۋگە مۇمكىندىك بەرىپ وتىر. ەڭ باستىسى – بۇل كاسىپورىن شارۋالاردىڭ ەڭبەگىن اقتاپ, تابىسىن ەسەلەيدى. ال ەكسپورتقا جول اشىلۋى – جەتىسۋدىڭ جۇگەرىسىن حالىقارالىق نارىقتا تانىمال ەتەتىن قادام», دەيدى.
ەكونوميكا عىلىمدارىنىڭ كانديداتى ايگۇل تولەۋبەكوۆانىڭ سوزىنشە, ەلىمىز ءۇشىن اگروونەركاسىپتىك كەشەندى دامىتۋ – ستراتەگيالىق باعىت. ايتا كەتەيىك, بۇگىندە 20 125 گەكتاردان استام القاپ ەكىنشى رەت سۋارىلىپ, 500 گەكتارعا جۋىق جەرگە ءۇشىنشى سۋ بەرۋ جۇمىستارى جۇرگىزىلىپ جاتىر. سۋارۋ ءىسى ءۇشارال, ۇلكەنشىعان, بىرلىك, باسقۇنشى جانە پەنجىم اۋىلدىق وكرۋگتەرىندە قولعا الىنعان. جۇگەرى تولىق ءپىسىپ-جەتىلگەنشە ورگانيكالىق جانە مينەرالدى تىڭايتقىشتار بەرۋ, وسىمدىك اۋرۋلارىنا قارسى وڭدەۋ سەكىلدى اگروتەحنيكالىق شارالار ءمىنسىز ورىندالۋى شارت.
«بىرقاتار ديقان ەرتە پىسەتىن سۇرىپتاردى ورۋدى باستادى. الداعى ناۋقانعا دايىندىق اياسىندا تەحنيكا جوندەلىپ, جانار-جاعارماي قورى ازىرلەنىپ, قىرماندار تازالانىپ, استىق قابىلداۋعا دايىندالىپ جاتىر. كەيىنگى جىلدارى اۋدان بويىنشا بىرنەشە قىرمانعا جوندەۋ جۇرگىزىلدى», دەيدى م. ساعىمبەك.
جەتىسۋ وبلىسى