مەملەكەتتىك ورتالىق مۋزەيدە قازاق بەينەلەۋ ونەرىنىڭ دارا تۇلعاسى, كورنەكتى سۋرەتشى مولداحمەت كەنباەۆتىڭ تۋعانىنا 100 جىل تولۋىنا ارنالعان «جارقىن بوياۋلار شەبەرى» اتتى كوركەمونەر كورمەسى ەسىك اشتى.
قازاق بەينەلەۋ ونەرىندە ايشىقتى ءىز قالدىرعان داۋلەتيار دارىن يەسى – حح عاسىردا ۇلت ونەرىندەگى جاڭا كوركەمدىك ءداۋىردىڭ باستاۋىندا تۇرعان, ۇلتتىق بەينەلەۋ ونەرىنىڭ نەگىزىن قالاۋشىلاردىڭ ءبىرى. ول وتاندىق سۋرەت الەمىنىڭ قالىپتاسۋىنا جول اشىپ, تۇتاس ءبىر بۋىن سۋرەتشىلەرىنە ۇستاز بولا ءبىلدى.
كەنباەۆتىڭ شىعارماشىلىعى تەك كەسكىندەمەمەن شەكتەلمەيدى. 1960–1980 جىلدار ارالىعىندا ەلىمىزدە قوعامدىق عيماراتتاردا موزايكا ونەرىنىڭ دامۋىنا ايرىقشا ۇلەس قوستى. ونىڭ مونۋمەنتالدى شىعارمالارى بۇگىندە قازاقستان ساۋلەتتىك كەلبەتىنىڭ اجىراماس بولىگىنە اينالعان.
مۋزەي ۇجىمى كورمەنىڭ باستى ماقساتى ۇلت رۋحانياتىنا سۇبەلى ۇلەس قوسقان كوركەمونەر شەبەرىنىڭ باي مۇراسىن ۇلىقتاپ, كەلەشەك ۇرپاققا ناسيحاتتاۋ ەكەنىن ايتادى. ەكسپوزيتسيادا حالىق سۋرەتشىسىنىڭ 100-گە جۋىق تاڭداۋلى تۋىندىسى ۇسىنىلعان.
ءىس-شاراعا الماتى قالاسى اكىمدىگى, عىلىمي جانە شىعارماشىلىق زيالى قاۋىم وكىلدەرى, مادەنيەت پەن ونەر قايراتكەرلەرى, سونداي-اق مولداحمەت كەنباەۆ شىعارمالارىنا قۇرمەتپەن قارايتىن ونەر جاناشىرلارى قاتىستى. كورمەنىڭ اشىلۋ سالتاناتىندا ءسوز العان مەملەكەتتىك ورتالىق مۋزەيى ديرەكتورىنىڭ مىندەتىن اتقارۋشى سەرجان ساروۆ داڭقتى سۋرەتشىنىڭ مۇراسى ونەرتانۋشىلار ءۇشىن ورەلى قازىنا ەكەنىن ايتىپ, مادەنيەت جانە اقپارات ءمينيسترى ايدا بالاەۆانىڭ قۇتتىقتاۋىن جەتكىزدى. سونداي-اق كەنباەۆتىڭ ۇلتتىق ونەردەگى ورنى مەن مۋزەي قورىنداعى تۋىندىلارىنىڭ تاريحي ماڭىزىن ەرەكشە اتاپ ءوتتى.
«كەنباەۆ شىعارمالارىندا ۇلتتىق سارىن ەرەكشە باسىمدىققا يە. ونىڭ ءاربىر تۋىندىسىنان قازاق حالقىنىڭ سالت-ءداستۇرى, دۇنيەتانىمى مەن رۋحاني بولمىسى ايقىن اڭعارىلادى. سۋرەتشى تاريحي تاقىرىپتاردى, حالىقتىڭ ءومىر سالتىن, تۇرمىس-تىرشىلىگىن شەبەر بەينەلەپ, ۇلتتىق ونەردە وزىندىك ورنەگىن قالىپتاستىردى. ونىڭ كەسكىندەمەلىك تۋىندىلارى مەن موزايكالىق پاننولارى – ۇلت مادەنيەتىنىڭ شىنايى ايناسى ىسپەتتى. كەنباەۆ ءۇشىن بەينەلەۋ ونەرى – تەك ەستەتيكالىق قۇندىلىق قانا ەمەس, سونىمەن قاتار, قازاقتىڭ رۋحىن تانىتاتىن, ۇرپاققا جول سىلتەيتىن مادەني مۇرا» دەيدى سەرجان ساروۆ.
سالتاناتتى كەشتە ونەرتانۋ كانديداتى, دوتسەنت, «ARK» كوركەمونەر گالەرەياسىنىڭ نەگىزىن قالاۋشى ءارى ديرەكتورى, كسرو ساۋلەتشىلەر وداعىنىڭ لاۋرەاتى ەليزاۆەتا مالينوۆسكايا مەن قازاقستان سۋرەتشىلەر وداعى حاتشىلىعىنىڭ مۇشەسى ءاسيا حايرۋلينا, الماتى قالاسى مادەنيەت باسقارماسىنىڭ ورىنباسارى ارمان حالبەكوۆ سۋرەتشى شىعارماشىلىعى حاقىندا جىلى لەبىزدەرىن جەتكىزدى.
«مولداحمەت كەنباەۆتىڭ قولتاڭباسىندا فيلوسوفيالىق كۇش جاتىر. ول حالقىنىڭ ارمان-مۇراتىن ونەردىڭ زاماناۋي ۇدەرىستەرىمەن ۇيلەستىرە الدى. حالىق سۋرەتشىسى اتاق-داڭققا بىردەن جەتە سالعان جوق. ونىڭ ءومىرى مىنەزى مەن شەبەرلىگىن شىڭداعان قيىندىقتار مەن سىناقتاردان تۇرادى. شىعارماشىلىق جولىنىڭ ەڭ العاشقى كۇنىنەن باستاپ تۋىندىلارىنىڭ باستى تاقىرىبىن قازاق مادەنيەتى مەن ۇلتىنىڭ رۋحاني بەينەسىنە ارنادى», دەيدى ونەرتانۋشى سانجار سىرعاباەۆ.
كورمەنىڭ ۇيىمداستىرۋشىسى ءارى اكە ونەرىن جالعاستىرۋشى الپامىس مولداحمەت ۇلى جينالعان قاۋىمعا شىنايى العىسىن ءبىلدىرىپ, اكەسىنىڭ شىعارماشىلىق جولى مەن رۋحاني مۇراسى تۋرالى ەستەلىكتەرىمەن ءبولىستى. م.كەنباەۆتىڭ «تسەلينا» اتتى تۋىندىسى سۋرەتشىنىڭ وتباسى اتىنان مەملەكەتتىك ورتالىق مۋزەي قورىنا سىيعا تارتىلدى. بۇل شىعارما مۋزەيدىڭ كەسكىندەمە توپتاماسىن تولىقتىرىپ, ۇلتتىق بەينەلەۋ ونەرىنىڭ التىن قورىن بايىتا تۇسپەك.
سونىمەن قاتار كەنباەۆتار وتباسى ورتالىق مۋزەيگە سۋرەتشىنىڭ ۇلتتىق بەينەلەۋ ونەرى سالاسىنداعى جەتىستىكتەرىن دالەلدەيتىن ديپلومدارىن, ماراپاتتارى مەن سەرتيفيكاتتارىن سىيعا تارتتى. بۇل زاتتار شەبەردىڭ جەكە مۋزەيلىك كەشەنىن قالىپتاستىرىپ, كەنباەۆتىڭ كوركەم مۇراسىن ساقتاۋ, قورعاۋ جانە ناسيحاتتاۋ جۇمىستارىنا دا زور سەپتىگىن تيگىزەتىنى انىق.
الماتى