جيىندا مەملەكەت باسشىسى 2019 جىلدان بەرى كەزەڭ-كەزەڭىمەن بىرنەشە ساياسي رەفورما جۇرگىزىلىپ, ساياسي جۇيەنىڭ دايەكتى تۇردە جاڭعىرتىلعانىن اتاپ ءوتتى, دەپ حابارلايدى Egemen.kz.
سونىمەن قاتار پرەزيدەنت وسى زالدا وتىرعان ازاماتتاردىڭ كوبى سول ۇلكەن وزگەرىستەردىڭ بەل ورتاسىندا جۇرگەنىن دە ايتتى.
«اشىعىن ايتقاندا, ءبىز ءبىرشاما كەدەرگىگە تاپ بولدىق. ساياسي ورتانىڭ بەلگىلى ءبىر بولىگى قوعامدى جاڭعىرتۋدى كوزدەيتىن باستامالارىمىزعا كۇمانمەن قارادى, ءتىپتى قابىلداي المادى. بۇگىندە ءبىز تاڭداعان ستراتەگيالىق باعىتتىڭ دۇرىس ەكەنىنە كوزىمىز جەتتى. بۇل ەلىمىزدى وركەنيەتتى قوعام قۇرۋ جولىنا باستايدى. 2022 جىلى وتكەن رەفەرەندۋم ۇلتىمىزدى بۇرىن-سوڭدى بولماعان دەڭگەيدە ۇيىستىرىپ, مەملەكەت الدىنداعى ستراتەگيالىق مىندەتتەردىڭ توڭىرەگىنە توپتاستاردى. ازاماتتارىمىزدىڭ جاڭا ساياسي باعداردى ءبىراۋىزدان قولداۋى العا ىلگەرىلەۋدەن باسقا جول جوق ەكەنىن ايقىن كورسەتتى», دەدى قاسىم-جومارت توقاەۆ.
مەملەكەت باسشىسى تاريحي ولشەم تۇرعىسىنان وتە قىسقا ۋاقىت ىشىندە قوعام ساياسي كەمەلدىك پەن ازاماتتىق جاۋاپكەرشىلىكتى كۇشەيتەتىن ىرگەلى وزگەرىستەردى باستان وتكەرگەنىن اتاپ ءوتتى.
«ادىلەتتى قازاقستاندى قۇرۋ پروتسەسىن ەندى ەشكىم توقتاتا المايدى. وتكەنگە ورالۋعا, ەڭ الدىمەن, ەلىمىزدىڭ جاستارى جول بەرمەيدى. ءبىلىمدى جاس ۇرپاق كەلەشەككە كوز تىگەدى. ولار قازاقستاندى جاڭا زاماننىڭ تالابىنا ساي كەلەتىن وركەنيەتتى مەملەكەت رەتىندە كورگىسى كەلەدى», دەدى پرەزيدەنت.