مەملەكەتتىك ورتالىق مۋزەيدە قىتاي سۋرەتشىلەرىنىڭ «تاڭعاجايىپ قىتاي: شىڭجاڭ ونەرى مەن سۇلۋلىعى» اتتى كوركەم فوتوسۋرەت پەن ونەر تۋىندىلارى كورمەسى اشىلدى, دەپ جازادى Egemen.kz.
بۇگىندە قازاقستان مەن قىتاي حالىق رەسپۋبليكاسى ء«بىر بەلدەۋ, ءبىر جول» باعدارلاماسى اياسىندا مادەني باستامالاردى بىرلەسە دامىتۋدا. باعدارلامانىڭ نەگىزگى ماقساتى – ۇلى جىبەك جولى داۋىرىنەن باستاۋ الاتىن حالىقتار اراسىنداعى ءوزارا ىقپالداستىقتى, تاريحي مۇرانى ناسيحاتتاۋ, مادەني بايلانىستاردى نىعايتۋ جانە ەلدەر اراسىنداعى حالىقارالىق تاجىريبە الماسۋدى ىلگەرىلەتۋ. وسى ماقساتتا قانات قاققان ونەر جارمەڭكەسى شىڭجاڭ-ۇيعىر اۆتونوميالىق اۋدانىنىڭ قۇرىلعانىنا 70 جىل تولۋى قارساڭىندا ۇيىمداستىرىلىپ وتىر.
كورمەدە شىڭجاڭنىڭ كوركەم كەلبەتىنە ارنالعان قىتاي كەسكىندەمەسىنىڭ 40-قا جۋىق تۋىندىسى ۇسىنىلعان. جۇمىستاردىڭ اراسىندا كورەرمەن نازارىنا اسەم تابيعات كورىنىستەرى – ورماندار, جايىلىمدار, پامير تاۋ جوتالارى, اۋىل تىرشىلىگى, ءۇرىمجى وزەندەرى مەن اڭعارلارى, سونداي-اق ادام ەڭبەگى مەن كۇندەلىكتى ءومىر پەيزاجدارى كورىنىس تاپقان.
كورمەدە ۇسىنىلاتىن كوركەم تۋىندىلار – بۇل قىتايدىڭ شىڭجاڭ ولكەسىنە جاسالاتىن ساپار, مادەنيەتتەر مەن وركەنيەتتەر اراسىنداعى ءوزارا بايلانىس. شىڭجاڭ – قىتايدى باتىسپەن بايلانىستىراتىن باستى قاقپا, سونىمەن قاتار ورتالىق ايماقتار جىبەك جولىنىڭ ەكونوميكالىق بەلدەۋى. قازاقستان مەن قىتايدىڭ مادەنيەت الماسۋ تاريحى تەرەڭ, ءارى ىنتىماقتاستىقتى دامىتۋعا مول مۇمكىندىك بار. 2025–2026 جىلدار قىتاي مەن ورتالىق ازيا اراسىنداعى جوعارى ساپالى ارىپتەستىكتى دامىتۋدىڭ جىلى دەپ جاريالاندى. 2025 جىلى شىڭجاڭ-ۇيعىر اۆتونوميالىق اۋدانىنىڭ قۇرىلعانىنا 70 جىل تولىپ وتىر. اتالعان كورمە شىڭجاڭنىڭ كوركەمدىك قۋاتىن پاش ەتەدى. ول شىڭجاڭداعى ءتۇرلى ۇلت وكىلدەرىنىڭ بىرلىگى مەن تاباندى ەڭبەگىن بەينەلەپ قانا قويماي, جاڭا ومىرگە دەگەن ۇمتىلىستى – ەكونوميكالىق جانە الەۋمەتتىك دامۋ, تۇرمىس ساپاسىنىڭ جاقسارۋى, مادەني وركەندەۋ مەن كوركەم تابيعي ورتانىڭ ۇيلەسىمىن ايقىن كورسەتەدى. سونىمەن بىرگە, بۇل كورمە قىتاي مەن ورتالىق ازيا ەلدەرى اراسىنداعى اشىقتىقتى كەڭەيتىپ, بىرلەسە «ازيا – ەۋروپا التىن ءدالىزىن» قۇرۋ, سونداي-اق جوعارى ساپالى دامۋ ارقىلى ورتاق جاڭعىرۋدى ىلگەرىلەتۋ باعىتىنداعى جارقىن بولاشاقتى دا رۋحاني تۇرعىدا سەزىندىرەدى», - دەيدى قر مەملەكەتتىك ورتالىق مۋزەيى سىرتقى بايلانىستار ءبولىمىنىڭ جەتەكشىسى اننا كۋششەنكو.
مادەني وقيعانىڭ جوعارى دەڭگەيدە وتۋىنە قىتاي حالىق رەسپۋبليكاسىنىڭ الماتى قالاسىنداعى باس كونسۋلدىعى, بۇكىلقىتايلىق مادەنيەت جانە ونەر قىزمەتكەرلەرى قاۋىمداستىعى جانە شۇار مادەنيەت جانە ونەر قىزمەتكەرلەرىنىڭ قاۋىمداستىعى مۇرىندىق بولعان.