مەملەكەتتىك ورتالىق مۋزەيدە قازاقستاننىڭ كورنەكتى سۋرەتشىسى, گرافيكا جانە كەسكىندەمە جانرلارىنىڭ حاس شەبەرى امان باقتىعالي ۇلىنىڭ 80 جىلدىق مەرەيتويىنا ارنالعان مەموريالدىق كورمە اشىلدى, دەپ جازادى Egemen.kz.
ەكسپوزيتسياعا سۋرەتشىنىڭ 1970-2020 جىلدار ارالىعىندا سالىنعان 60-قا جۋىق گرافيكالىق جانە كەسكىندەمەلىك تۋىندىلارى قويىلدى. ۋاقىت پەن زامان تىنىسىن ۇيلەسىمدى ۇندەستىرگەن شەبەردىڭ ءار تۋندىسى كورەرمەنگە ايرىقشا اسەر سىيلايدى. ەسكى مەن جاڭانىڭ قايشىلىعى, ادامداردىڭ مىنەز-قۇلقى, تابيعاتتىڭ سۇلۋ كەلبەتى كەنەپ بەتىندە شەبەرلىكپەن كورىنىس تاپقان.
امان باقتىعالي ۇلى (1945-2020) ارتىنا 100-دەن استام گرافيكالىق جانە كەسكىندەمەلىك تۋىندى قالدىرعان قازاقستاننىڭ كورنەكتى سۋرەتشىسى. ونىڭ «انا», «قۇرمانعازى», «شاشۋ», «مەن قازاقپىن», «ابىلاي حاننىڭ ارمانى», «بايقوڭىر», «ماحامبەتتى ەسكە الۋ», «مەنىڭ ولكەم», «جەڭىس كۇنى» سەكىلدى تانىمال شىعارمالارى حالىق جۇرەگىنەن ورىن العان.
ول ن. ۆ. گوگول اتىنداعى الماتى كوركەمسۋرەت ۋچيليششەسىن ۇزدىك ءبىتىرىپ, كەيىن ي. ە. رەپين اتىنداعى لەنينگراد كەسكىندەمە, ءمۇسىن جانە ساۋلەت ينستيتۋتىندا «گرافيكا» ماماندىعى بويىنشا جوعارى ءبىلىم العان. 1979-1988 جىلدار ارالىعىندا ن.ۆ.گوگول اتىنداعى الماتى كوركەمسۋرەت ۋچيليششەسىندە ساباق بەردى. شىعارماشىلىقپەن بەلسەندى اينالىستى. 1987-1989 جىلدارى – قازكسر سۋرەتشىلەر وداعى باسقارماسىنىڭ حاتشىسى قىزمەتىن اتقاردى. 1992 جىلى ن.ۆ. گوگول اتىنداعى الماتى كوركەمسۋرەت ۋچيليششەسىنىڭ ديرەكتورى بولىپ تاعايىندالدى.
سۋرەتشى امان باقتىعالي ۇلى قازاقستاننىڭ بەينەلەۋ ونەرىنىڭ دامۋىنا ەلەۋلى ۇلەس قوستى. ول ءومىرىنىڭ سوڭىنا دەيىن ۇستازدىق ەتىپ, كوپتەگەن جاس سۋرەتشىلەرگە ءتالىم بەردى. ا. باقتىعالي ۇلى, م. كيسامەدينوۆ, ي. يساباەۆ, ب. پاك, ا. راحمانوۆ, س. ايتباەۆ, ش. ساريەۆ, ت. دوسماعامبەتوۆ, ك. كامەتوۆ سياقتى تانىمال سۋرەتشىلەرمەن بىرگە ۇلتتىق ونەردىڭ اسپەكتىلەرىن, ونى قورشاعان شىندىقتىڭ سۇلۋلىعى مەن الۋان تۇرلىلىگىن اشۋعا جانە كورسەتۋگە تىرىستى. ونىڭ شىعارمالارىندا پاتريوتتىق تاقىرىپتار – تۋعان جەرگە دەگەن سۇيىسپەنشىلىك, قاراپايىم ادامنىڭ ءومىرى, ەڭبەك كۇندەرى, تۇرمىستىق كورىنىستەر, قازاقستاننىڭ كوركەم جەرلەرى مەن پەيزاجدارى بەينەلەنگەن. كورمەدە سۋرەتشىنىڭ پەيزاجدارى, پورترەتتەرى, ناتيۋرمورتتارى مەن تاقىرىپتىق كومپوزيتسيالارى ۇسىنىلعان. بۇل تۋىندىلار امان باحتىعاليەۆتىڭ دۇنيەتانىمى مەن شىعارماشىلىق جولىن ايقىن بەينەلەيدى.
سۋرەتشىنىڭ جۇمىستارى ەلىمىزدىڭ مەملەكەتتىك جانە شەتەلدىك مۋزەيلەرىندە, سونداي-اق جەكە كوللەكتسيالاردا (رەسەي, ۋكراينا, مەكسيكا جانە ت.ب.) ساقتالعان. سونىمەن قاتار, قر مەملەكەتتىك ورتالىق مۋزەيىندە سۋرەتشىنىڭ 8 گرافيكالىق تۋىندىسى بار.