بوراش. ەڭبەكتى سۇيگەن ەر, اۋىلىنا جاناشىر, اتىمتاي جومارت بورانباي مۇقاناليەۆتىڭ ەل ىشىندەگى ەكىنشى ەسىمى وسىنداي. بارشىن اۋىلىنىڭ ورىسىنە مىڭعىرعان مالىن ورگىزىپ, شارۋاشىلىعىن شالقىتىپ وتىرعان ەڭبەك ارداگەرى – اۋىلىنىڭ قامقورشىسى.
بورانباي قاسىمبەك ۇلى – جاقسىنىڭ جالعاسى, تەكتىنىڭ تۇياعى. اكەسى قاسىمبەك – ەكىنشى دۇنيەجۇزىلىك سوعىستىڭ ارداگەرى, «داڭق», باسقا دا وردەن-مەدالداردىڭ يەسى. ايبارلى اكەنىڭ تالىمىمەن جىگەرىن جانىپ وسكەن جاس جىگىت اسكەرگە شاقىرىلعان ۋاقىتتا اۋعانستان جەرىندە سوعىس ءجۇرىپ جاتقان ەدى. سول ايماقتا اسكەري بورىشىن ويداعىداي وتەپ, ەلگە ەسەن-امان ورالدى. اۋعان سوعىسىنىڭ ارداگەرى بورانباي قاسىمبەك ۇلىنىڭ دا ومىراۋىندا اۆياتسيا گەنەرال-مايورى «تالعات بيگەلدينوۆ», «ساعادات نۇرماعامبەتوۆ» مەدالى, «ينتەرناتسيوناليست-جاۋىنگەر» توسبەلگىسى بار. مۇنىڭ ءبارى – قاسىمبەك اكەنىڭ قانىمەن كەلگەن قايسارلىقتىڭ ۇلگىسى.
اۋعان دالاسىنان ورالا سالا ەڭبەككە ارالاسىپ, شاعىن مالمەن شارۋاشىلىق قۇرادى. سول قىسى-جازعى قىپ-قىزىل بەينەتتىڭ, ماڭداي تەردىڭ وتەۋى – ءورىسى تولعان مالى. بالا كەزىنەن مالساق بولىپ وسكەن ازامات ءۇيىر-ءۇيىر جىلقىسىنىڭ ءتۇسىن تۇستەپ تاني الادى. ءسويتىپ, بورانباي قاسىمبەك ۇلىنىڭ مۇقالماس جىگەرىمەن «مۇقاناليەۆ» فەرمەر قوجالىعى اۋدانداعى ىرگەلى اگروكەشەنگە اينالدى.
«بۇگىندە مەملەكەت اۋىل شارۋاشىلىعىن دامىتۋعا ەرەكشە كوڭىل ءبولىپ وتىر. مال شارۋاشىلىعىن دامىتۋدا جەڭىلدەتىلگەن نەسيەلەر, ءىرى قارا مالعا سۋبسيديالار بەرۋ, تەحنيكانى ليزينگكە الۋ ءىسى دۇرىس جولعا قويىلعان. سولاردى شارۋالار ۇتىمدى پايدالانسا بولعانى. وسى قولداۋلار ارقىلى شارۋاشىلىققا جاڭادان 5-6 مال قورا سالدىق. ءوزىم «سىباعا» باعدارلاماسىمەن 100 ءىرى قارا الىپ, ءوسىرىپ وتىرمىن. بايقاۋ ارقىلى جالعا جەر الىپ, جايىلىمدى كەڭەيتتىك. مالدىڭ تۇقىمىن اسىلداندىرۋ ماسەلەسى دە قولعا الىنا باستادى. بەس باس اسىل تۇقىمدى بۇقا اكەلىندى. جالپى, اسىل تۇقىمدى بۇقا ساتىپ الامىن دەگەن شارۋاعا مەملەكەت تاراپىنان بولاتىن كومەك قازىر قوماقتى. سۋبسيديا ارقىلى ونىڭ قۇنىنىڭ بەلگىلى ءبىر بولىگىن وتەپ بەرەدى. استاناعا جاقىن ماڭايدان جەر الىپ, مال بورداقىلاۋ الاڭىن سالدىق, ول دا ءوز جەمىسىن بەرىپ جاتىر», دەيدى شارۋاشىلىق باسشىسى.
مال باققانعا بىتەدى. شارۋانىڭ باسى-قاسىندا بورانباي قاسىمبەك ۇلىنىڭ ءوزى جۇرەدى. ات ءمىنىپ, ءورىسىن ارالاپ, ءتورت ت ۇلىگىن تۇگەندەمەسە, كوڭىلى كونشىمەيدى. ءومىر بويعى سالتى سولاي. سودان دا بولار, ەڭبەگى جاندى, بەينەتى باعىن دا, بارىن دا ەسەلەدى.
اۋىلدى كۇل-قوقىستان تازالاۋ, سۋ قۇبىرلارى ىستەن شىعىپ قالسا, ونى جوندەۋ سەكىلدى شارۋالار بورانباي مىرزانىڭ دەمەۋشىلىگىمەن جۇزەگە اسادى. مۇنىمەن قوسا, اۋىلدا قاڭىراپ قالعان عيماراتتى ءوز قاراجاتىنا كۇردەلى جوندەۋدەن وتكىزىپ, بالالار مەن جاسوسپىرىمدەرگە سپورتزال اشىپ بەردى. قازىر اۋىل بالالارى بوكس, كۇرەس سەكتسيالارىنا بارىپ ءجۇر.
اۋىلىنداعى توقسان جاستاعى انانىڭ ەسكى ءۇيىن ءسۇرىپ, جاڭا ءۇي سالىپ بەرگەن ساقي دا ءوزى. اۋىلدىڭ مەكتەبىنە, اۋرۋحاناسىنا ۇنەمى كومەكتەسەدى. الەۋمەتتىك توپتاعى اعايىنعا جىل سايىن تەگىن سوعىم بەرەدى. بىلتىر نۇرا اۋدانىنىڭ 90 مۇقتاج وتباسىنا ەت تاراتتى. ودان بولەك, مال سويۋ الاڭىن سالىپ, قولدانىسقا بەردى. اۋىل زيراتىن قورشاتتى. نۇرا وڭىرىندەگى مادەني, سپورتتىق ءىس-شارالارعا ۇنەمى دەمەۋشىلىك كورسەتەدى. پاندەميا كەزىندە اۋىلىن تەگىن ءدارى-دارمەكپەن قامتاماسىز ەتتى. مال جايىلىمىنداعى سۋ شايىپ بۇزىلعان ەكى بوگەتتى قالپىنا كەلتىردى. كورشى تىكەنەكتى اۋىلىنداعى مەشىتتىڭ قۇرىلىسىنا قارجىلاي كومەك كورسەتتى. اۋىلىنا كوشىپ كەلگەندەرگە دە قارايلاسادى. سوعىمىن, جەمشوبىن, كەرەك بولسا الدىنا مالىنا دەيىن سالىپ بەرەدى.
بورانباي قاسىمبەك ۇلى اۋداندىق ءماسليحاتتىڭ بىرنەشە شاقىرىلىم دەپۋتاتى. ەل اماناتىن ورىنداۋ ماقساتىندا استانا, قاراعاندىعا ءجيى قاتىناپ ءجۇرىپ, اۋىلعا «بيلاين» موبيلدىك بايلانىس جۇيەسىن ورناتىپ بەردى. مىنە, بۇل اتىمتاي ازامات جاساعان جاقسىلىقتىڭ ءبىز بىلەتىن ءبىر پاراسى عانا.
زايىبى زاۋرە قازانبايقىزى – مەملەكەتتىك قىزمەتتىڭ قازانىندا قايناعان جان. قازىر قۇرمەتتى ەڭبەك دەمالىسىندا. قىزمەت ەتكەن جىلدارى اۋىلىنىڭ ءوسىپ-وركەندەۋىنە ولشەۋسىز ۇلەس قوسىپ, ەلدىڭ باتاسىن العان. زاۋرە مۇقاناليەۆانىڭ ەڭبەگى جانىپ, مەملەكەتتىك قىزمەت ىستەرى اگەنتتىگى ۇيىمداستىرعان «ۇزدىك اۋىل اكىمى» رەسپۋبليكالىق بايقاۋىنىڭ «ۇزدىك اشىق اكىم» اتالىمىن جەڭىپ العان. تەڭىز وڭىرىنە وركەنيەت سىيلاعان اكىم رەتىندە ەسىمى ەل اۋزىندا. ول اكىم بولىپ تۇرعان تۇستا اتقارىلعان جۇمىس از ەمەس. اتاپ ايتار بولساق, «اۋىل – ەل بەسىگى» جوباسى اياسىندا كوشەلەر اسفالتتالدى. 284 جارىق شامدارى قويىلدى. اۋىلدىڭ پوليتسيا ءبولىمىنىڭ عيماراتى كۇردەلى جوندەۋدەن ءوتتى. ەكى ەلەكتر ترانسفورماتورى الىندى. ءتورت بىردەي ەلدى مەكەنگە بالالار ويىن الاڭى ورناتىلدى. اۋىل جاستارىنا ارنالىپ كوۆوركينگ ورتالىعى اشىلدى. اۋرۋحاناعا جاڭا جىلىتۋ قازاندىعى قويىلدى. جەدەل جاردەم كولىگى, مەكتەپ بالالارىن تاسىمالداۋعا اۆتوبۋس ساتىپ الىندى.
مۇنىمەن قوسا, جاس ماماندارعا ەكى پاتەرلى ءۇي سالىنعان. ەكى بىردەي دوڭگەلەك جوندەۋ شەبەرحاناسى مەن ناۋبايحانا, ءدامحانا اشىلىپ, قازىر اۋىل حالقىنا قىزمەت كورسەتىپ وتىر. وسىنداي يگىلىكتى ءىستىڭ بارىنە زاۋرە اكىم ۇيىتقى بولدى. وعان باستى قولداۋدى ارينە, اسىل ازاماتى بورانباي قاسىمبەك ۇلى كورسەتتى.
جارى زاۋرەش ەكەۋىنىڭ وسىدان قىرىق جىل بۇرىن قۇرعان شاڭىراقتارى بۇگىندە ءۇبىرلى-ءشۇبىرلى اۋلەتكە اينالعان. ۇلدارىن ۇياعا, قىزدارىن قياعا قوندىرعان. بارىنە ەڭبەكتى ەرتەدەن ۇيرەتكەن ەكەۋى بالالارىنىڭ, نەمەرە, جيەندەردىڭ قىزىعىنا كەنەلىپ وتىر.
ماڭداي تەر ءتۇبى تورگە شىعارادى. ەڭبەگىمەن ەڭسەلى بورانباي قاسىمبەك ۇلى ابىروي بيىگىندە, قۇرمەتتىڭ تورىندە. كەۋدەسىندە مەملەكەت باسشىسىنىڭ جارلىعىمەن بەرىلگەن «ەرەن ەڭبەگى ءۇشىن», «شاپاعات» مەدالى جارقىرايدى. نۇرا اۋدانىنىڭ قۇرمەتتى ازاماتى.
تەڭىز ءوڭىرىنىڭ وركەندەۋىنە تەلەگەي ۇلەسى بار بارشىن باعلانىنىڭ جۇرەگى وسىلايشا «اۋىلىم» دەپ بۇلكىلدەيدى. ارداقتى ازاماتتى اۋىلى دا سايكەسىنشە الاقانىنا سالىپ وتىر. «بۇدان اسقان قانداي باقىت بار؟» دەيدى اتپال ازاماتتىڭ ءوزى.
قاراعاندى وبلىسى,
نۇرا اۋدانى,
بارشىن اۋىلى